މަސްވެރިންގެ ސުލްހަވެރި މުޒާހަރާގައި ކެންދޫ ދާއިރާގެ މެންބަރު މައުރޫފް ޒާކިރު ފުލުހުން ހައްޔަރުކޮށްފައިވާއިރު މަސްވެރިން ބުނީ ސަރުކާރުން ބިރުދައްކަން މިކަންކުރީ ކަމަށް. މަސްވެރިން އަންނަނީ ބޮޑު ކަންނެލީގެ މަހަށް ހަމަ އަގު ހޯދުމަށް އެދި އާދޭސްކުރަމުން. ސަރުކާރުން ވީ ވައުދު ފުއްދާނީއްކަމާމެދު މަސްވެރިން ކަންބޮޑުވުން ފާޅުކޮށް ވައުދުތައް ފުއްދާންދެން މުޒާހަރާ ކުރިއަށްގެންދާނެ ކަމަށް ބުނެފައިވޭ.
މަސްވެރިންގެ ކަންބޮޑުވުންތައް ރާއްޖެ އެމްވީ އާއި ހިއްސާކުރަނީ
ސުލްހަވެރިކަމާއި އެކު މަސްވެރިން ކުރަމުން ދިޔަ އިހުތިޖާޖަށް ފުލުހުން އަރާ ދިނީ ޓެރަރިސްޓް ހަމަލާ އެއް ކަމަށް މަސްވެރިއަކު ސިފަކޮށްފި އެވެ.
އޭނާ އެފަދައިން ސިފަކޮށްފައި ވަނީ މަސްވެރިންގެ ޝުޢޫރުތައް ރާއްޖެ އެމްވީ އާއި ހިއްސާކުރުމަށް ދިން ބަސްތީގަތުމެއްގަ އެވެ.
ބޮޑު ކަންނެލީގެ މަސްވެރިން ކުރަމުން ގެންދާ މުޒާހަރާގެ ތެރެއިން ކެންދޫ ދާއިރާގެ މެންބަރު މައުރޫފް ޒާކިރު ފުލުހުންގެ ބެލުމުގެ ދަށަށް ގެންގޮސްފައި ވަނީ ބިރުދައްކަން ކަމަށާއި މަސްވެރިން ތިބީ ސަރުކާރުން ދައްކާ ބިރަކަށް ފަހަތަށް ޖެހޭ ގޮތަށް ނޫން ކަމަށް އޭނާ ވަނީ ބުނެފަ އެވެ. އަދި ފުލުހުން ހައްޔަރު ކުރި ބިދޭސީންގެ ތެރޭގައި ޤާނޫނާއި އެއްގޮތަށް ހަރަކާތްތެރިވަމުން އައި މީހުން ތިބި ކަމަށް އޭނާ ވަނީ ބުނެފަ އެވެ.
"ސަރުކާރުން ކޮންމެ ކަމެއް ކުރިއަސް ހައްގު ހޯދަން މަސައްކަތް ކުރާނަން. ސަރުކާރުގެ ލަދެއް ނެތް. ވެރިކަމަށް އައީ އާދޭސްކޮށްގެން މަސްވެރިކަން އާ ހަރުފަތަކަށް ގެންދާނަމޭ ކިޔައިގެން." އޭނާ ވަނީ ބުނެފަ އެވެ.
ރާއްޖެ އެމްވީ އާއި ވާހަކަދެއްކި ޒުވާން މަސްވެރިއަކު ބުނީ ސަރުކާރުން ވީ ވައުދެއް ނުފުއްދައިގެން ސުވާލުކުރުމުން މަސްވެރިން ކުށްވެރިކުރުމަކީ ބަލައިގަނެވޭ ކަމެއް ނޫން ކަމަށެވެ. އިތުރު ޒުވާނަކު ބުނީ މަސްވެރިން ސަރުކާރަށް ވަރަށް ވަގުތު ދިން ކަމަށް ޤަބޫލު ނުކާ ކަމަށެވެ. މަސްވެރިން އެދެނީ މަސްވެރިން ބާނަ މަހަށް ހަމަ އަގު ހޯދުމަށް ކަމަށާއި އެކަން ކޮށްދޭން އެދި އާދޭސްކުރަން ނުޖެހޭ ކަމަށް އޭނާ ވަނީ ބުނެފަ އެވެ.
"މިކަން ހުއްޓާލާނީ ބޮޑުކަންނެލި މަސްވެރިންނަށްވީ ވައުދު ފުއްދުމުން. ފަހަތަކަށް ނުޖެހޭނަން. ޖަލަށް ދާން ޖެހުނަސް އެކަން ވެސްކުރާނަން ހައްގު ހޯދަން." އޭނާ ވަނީ ބުނެފަ އެވެ.
އިތުރު މަސްވެރި އަކު ވަނީ އައިސް ނުލިބިގެން އާދޭސް ކުރަން ސަރުކާރުން މަޖުބޫރުކުރުވާފައިވާ ކަމަށް ބުނެފަ އެވެ. އާއްމުން ނިކަމެތި ވާއިރު ސަރުކާރުން ތިބެނީ ހެވިފައި ކަމަށާއި އެއީ ބަލައިގަނެވޭ ކަމެއް ނޫން ކަމަށް އޭނާ ވަނީ ބުނެފަ އެވެ. ވެރިކަމަށް އަންނަން ވުމުން ބޮޑެތި އެތައް ވައުދެއް ވުމަށް ފަހު މި މޭރުމުން ވެރިކަމަށް އައިސް އަމަލުކުރުމަކީ ވަރަށް މާޔޫސްވާ ކަމެއް ކަަމަށް މަސްވެރިން ވަނީ ބުނެފަ އެވެ.
މަސްވެރިންގެ އިހުތިޖާޖުގެ ތެރެއިން ފުލުހުންގެ އަމުރަށް ނުކިޔަމަންތެރިވެ، ފުލުހުންގެ ދައުރު އަދާކުރުމަށް ހުރަސްއެޅިކަމުގެ ތުހުމަތުގައި 3 މީހަކާއި 2 ދޯނި ފުލުހުންގެ ބެލުމުގެ ދަަށަށް ގެންދިޔަ އެވެ. ނަމަވެސް އަމުރަށް ނުކިޔަމަންތެރިވި ގޮތެއް ފުލުހުންނާއި ސުވާލުކުރުމުން ސާފުކޮށް ނުދިނެވެ. އަދި ކަނޑުމަތީގައި ސުލްހަވެރި މުޒާހަރާ އެއް ކުރަމުން ދިޔަ މަސްވެރިން ފުލުހުންގެ ދައުރު އަދާކުރުމަށް ހުރަސްއެޅި ގޮތެއް ވެސް ފުލުހުންނާއި ސުވާލު ކުރުމުން ބުނެދީފައި ނުވެ އެވެ.
