މަޓޭ ހައްޔަރުކުރި މައްސަލަ އައިޕީޔޫ އަށް ހުށަހަޅައިފި

ބޮޑު ކަންނެލި މަސްވެރިންގެ މުޒާހަރާ އިން ކެންދޫ ދާއިރާގެ މެންބަރު މައުރޫފް ޒާކިރު (މަޓޭ) ހައްޔަރުކުރީ ގާނޫނާ ހިލާފަށް ކަމަށް ބުނެ އެ މައްސަލަ އިންޓަރ ޕާލަމެންޓްރީ ޔޫނިއަން (އައިޕީޔޫ) އަށް އެމްޑީޕީގެ ޕާލަމަންޓްރީ ގްރޫޕުން ހުށަހަޅައިފި އެވެ.

އައިޕީޔޫ ގެ އިތުރުން ކޮމިޓީ އޮން ދަ ހިއުމަން ރައިޓްސް އޮފް ޕާރލިމެންޓޭރިއަންސް އަށާއި ކޮމަންވެލްތު ޕާރލަމެންޓްރީ އެސޯސިއޭޝަން (ސީޕީއޭ) އަށް ވެސް މަޓޭ ހައްޔަރުކުރި މައްސަލަ އެމްޑީޕީ އިން ވަނީ ހުށަހަޅާފަ އެވެ.

އައިޕީޔޫ އަށް ހުށަހެޅި މައްސަލައިގައި އެމްޑީޕީ އިން ވަނީ، މަޖިލިސް މެންބަރުންގެ އިންސާނީ ހައްގުތައް ހިމާޔަތްކޮށް، ޑިމޮކްރެޓިކް އުސޫލުތައް ހިފެހެއްޓުމަށް އޮންނަ އައިޕީޔޫ ގެ ޒަމާންވީ މެންޑޭޓާ އެއްގޮތަށް، މަޖިލީހުގެ ނަޒާހަތްތެރިކަމާއި މެންބަރުންގެ ހައްގުތަކާއި ރާއްޖޭގައި ގާނޫނީ ވެރިކަން ރައްކާތެރިކުރުމަށް ކޮންމެހެން އަޅަންޖެހޭ ފިޔަވަޅުތައް އެޅުމަށް އެދިފަ އެެވެ. 

މީގެއިތުރުން ރައްޔިތުންގެ މަޖިލީހުގެ މެންބަރުންގެ މަސައްކަތަށް ސިޔާސީ ގޮތުން ފިއްތުންތައް ކުރިމަތިކުރުވުން ހުއްޓުވުމަށް، ސީޕީއޭ އިން ގެންގުޅޭ ހަރުދަނާ އުސޫލުތަކާ އެއްގޮތަށް މަޓޭ ހައްޔަރުކުރި މައްސަލަ ބަލައިދިނުމަށް އެމްޑީޕީގެ ޕާލަމަންޓްރީ ގްރޫޕުން އެދިފައިވެ އެވެ.

އެމްޑީޕީގެ ޕާލަމަންޓްރީ ގްރޫޕުން ބުނީ މަޓޭގެ އިތުރުން އެތައް ބަޔަކު ގާނޫނާ ހިލާފަށް ހައްޔަރުކުރުން ކުށްވެރިކުރާ ކަމަށާއި ރައްޔިތުންގެ އަސާސީ ހައްގުތަކާއި މިނިވަންކަމަށް ހުރަސް އެޅޭ ކަންކަން ކުރުން ހުއްޓާލައި އެންމެން ވަގުތުން ދޫކޮށްލަން ގޮވާލާ ކަމަށެވެ.

މަސްވެރިންގެ މުޒާހަރާގައި ބައިވެރިވި ދޯނިތަކަށް ފުލުހުން އަރަން ފެށީ މުޒާހަރާގައި ބިދޭސީން ބައިވެރިވާ ކަމަށް ބުނެ އެވެ. އަދި އެ ދޯނި ތަކުގައި ގަވާއިދާ އެއްގޮތަށް އުޅުނު 4 ބިދޭސީ އެއްފުލުހުންގެ ބެލުމުގެ ދަށަށް ވަނީ ގެންގޮސްފަ އެވެ. މީގެ އިތުރުން މުޒާހަރާގައި ބައިވެރިވި ތިން ދޯނި ވެސް ފުލުހުންގެ ބެލުމުގެ ދަށަށް ވަނީ ގެންގޮސްފަ އެވެ. އަދި ދެ ދޯންޏެއްގެ ކެޔޮޅުން ފުލުހުންގެ ބެލުމުގެ ދަށަށް ގެންދިޔަ އެވެ.

ބޮޑުކަންނެލި މަސްވެރިންގެ ޔޫނިއަން އިން އިންތިޒާމުކޮށްގެން މަސްވެރިންގެ މުޒާހަރާ ފެށީ ބުދަ ދުވަހު ހެނދުނު ހުޅުމާލޭ ކަންނެލި ޖެޓީގަ އެވެ. އެ މުޒާހަރާ ފެށިއިރު، ރާއްޖޭގެ އެކި ކަންކޮޅުގައި ކަންނެލި މަސްވެރިކަން ކުރާ 49 އުޅަނދު ބައިވެރިވި އެވެ.

މުޒާހަރާގައި މަސްވެރިން ސަރުކާރަށް ތިން ޑިމާންޑެއް ކުރި އެވެ. އެއީ ރައީސް މުއިއްޒު ގެ ރިޔާސީ ވައުދާ އެއްގޮތަށް ސަރުކާރުން ކަންނެލި ގަންނަން ފެށުމާއި ކަންނެލީގެ އަގު 80ރ. އާއި 100ރ. އާ ދެމެދު ހިފެހެއްޓުމާއި ބޭސް ރޭޓުގައި ތެލާއި އައިސް ލިބޭނެ ގޮތް ހެދުމެވެ.

ރައީސް މުއިއްޒުގެ ސަރުކާރަށް 2 އަހަރު ދުވަސް ވެފައިވާއިރު ބޮޑު ކަންނެލި މަސްވެރިންނަށް ވެފައިވާ އެއްވެސް ވައުދެއް ފުއްދުމުގެ ކޮޅުމަތިވެސް ނުފެންނަ ކަމަށް މުޒާހަރާގެ ބައިވެރިން ވަނީ ފާހަގަކޮށްފަ އެވެ. އަދި މިއަދާ ހަމަޔަށް އައި އިރު ވެސް ބޮޑުކަންނެލި މަސްވެރިންގެ ކަންބޮޑުވުންތަކަށް އެއްވެސް ހައްލެއް ސަރުކާރުން ހޯދަދީފައި ނުވުމުން ދޭހަވަނީ، ރައީސް މުއިއްޒު އަކީ އެއްވެސް ކަހަލަ އިހުލާސްތެރި ކަމެއް ނެތި ވައުދުވާ ވެރިއެއް ކަމުގަ އެވެ.