ރައީސް މުއިއްޒު، މަސްވެރިންގެ އަޑު އިވޭތޯ؟ އިވެންޏާ ވެސް އަންގާލަދެއްވާ. ނީވެންޏާ ވެސް އަންގާލަދެއްވާ!
މަސްވެރިންގެ އިހުތިޖާޖުގެ 4 ވަނަ ދުވަހުގެ އަޑުތަކުން އެނގެނީ މަސްވެރިން މާޔޫސްވާ ވަރު ކަމަށް ވާއިރު ރައީސް މުއިއްޒު އަށް މި އަޑުތައް އިވޭހެން ހިއެއް ނުވޭ
މަސްވެރިންގެ އިހުތިޖާޖުގެ ތެރެއިން
ރައީސް މުއިއްޒު، މަސްވެރިންގެ އަޑު އިވޭތޯ އެވެ؟ އިވެންޏާ ވެސް އަންގާލަދެއްވާށެވެ. ނީވެންޏާ ވެސް އަންގާލަދެއްވާށެވެ. މިހެން ބުނަން މި ޖެހުނީ މަސްވެރިންގެ އާދޭހުގެ އަޑު އިވޭހެން މަނިކުފާނުގެ އަމަލުފުޅުތަކުން ހަމަ ހިލާ ނުފެންނާތީ އެވެ. މިއީ އަޅުގަނޑު ބުނާ ވާހަކަ އެއް ނޫނެވެ. މިއީ މަސްވެރިންގެ އަޑެވެ.
"މި ގަރުނުގައި އަންނާނެ ރައްޔިތުންނާއި އެންމެ ދުރުން ވެރިކަން ކުރާނެ މީހާ މިއީ. ހި އެއް ނުވޭ ދެން މިކަހަލަ ވެރިއަކު އައިސްދާނެހެން. އަޑުއަހާލަދޭށޭ ކަންބޮޑުވުންތައް. އަޑުއަހަން ނެތިއްޔާ ނެތް ވާހަކަ ވެސް ބުނެލަ ދޭށޭ" މިއީ މަސްވެރިއަކު މަސްވެރިންގެ އިހުތިޖާޖުގެ ތެރެއިން ދެއްކި ވާހަކަ އެވެ.
މިއީ މަސްވެރިންގެ އިހުތިޖާޖުގެ 4 ވަނަ ދުވަހުގެ އަޑުތަކެވެ. އިހުތިޖާޖުން އިވެނީ މަސްވެރިންގެ އާދޭހާއި ހާލުގެ ދުލުން ކިޔާދޭ އެތައް ތުރާލެއްގެ ވާހަކަ އެވެ. ތިމާމެންގެ އާއިލާތައް ނިކަމެތިވާން ދޫކޮށް ނުލާން އެ މަސްވެރިން ދަނީ އެދެމުންނެވެ. މިއަދު އެ މަސްވެރިންގެ އަޑު ސަރުކާރަށް އިވޭކަމާއި މެދު އެ މަސްވެރިން އެ ދަނީ ސުވާލު އުފައްދަމުންނެވެ. މަސްވެރިން ދެކެނީ މި ވެރިކަމަކީ މަސްވެރިންނާއި ދުރުން ފެޔަށް ޖެހިގެން މަސައްކަތް ކުރާ މަސްވެރިންނާއި ބީރައްޓެހި ސަރުކާރެއް ކަމަށެވެ.
"ފިޝަރީޒް މިނިސްޓަރ ޝިޔާމް އިސްތިއުފާ"، "ހައްޔަރީން ދޫކޮށްލާ"، "މަސްވެރިންގެ ހައްގުތައް އަދާކުރޭ" މަސްވެރިން ތިބީ ފަހަރެއްގާ ވެސް ފަހަތަށް ޖެހޭ ގޮތަކަށް ނޫނެވެ. މަސްވެރިންގެ އުދާސްތައް ބައިވަރެވެ. މަސްވެރިން ކުރާ ސުވާލަކީ މި އަޑުތައް ރައީސް ޑރ.މުހައްމަދު މުއިއްޒު އާއި ފިޝަރީޒް މިނިސްޓަރ އަހުމަދު ޝިޔާމް އަށް ނީވެނީތޯ ކުރާ ސުވާލެވެ.
"އަޅުގަނޑު ބުނާނީ މަސްވެރިންގެ އަޑު ނީވޭ ބީރު ވަޒީރަކު އިސްތިއުފާ ދެއްވާށޭ. ރައީސް އަށް ދަންނަވާނީ ވަޒީރު ވަކިކޮށްދެއްވާށޭ." މަސްވެރިޔަކު ވަނީ ބުނެފަ އެވެ.
ސާފުކޮށް ހަރު އަޑުން މަސްވެރިން ބުނަނީ މި ސަރުކާރަށް މަސްވެރިންގެ އަޑު ނީވޭ ކަމަށެވެ. ފޮނި ވައުދުތަކެއް ވެގެން މަސްވެރިން ގުއިރޯނުގައި ޖައްސަން ސަރުކާރުގެ އިސްވެރިން މަސައްކަތް ކުރިކަން މި މަސްވެރިންނަށް އިހުސާސްކުރެވެއެވެ. މަސްވެރިން ބުނާ ވާހަކަ އަކީ ތިމަންނާމެންނަކީ ސިޔާސީ މީހުންކަމަށް ދައްކަން މަސައްކަތް ނުކުރުމަށް އެދި ކުރާ އާދޭހުގެ ވާހަކަތަކެވެ. އާދޭހާއި އެކު އެދެނީ މަސްވެރިންގެ ކަންބޮޑުވުންތައް ބަލައިގަތުމެވެ.
މަސްވެރިންގެ ބެލެނިވެރި ފަރާތުން މަސްވެރިން ބިކަކޮށްލިކަމުގެ އިހުސާސް އެ މަސްވެރިންނަށް ކުރެވުމަކީ މިއަދު މި މަސްވެރިންނަށް ލިބޭ ނިކަމެތިކަމެކެވެ. ކޯޓާ އާއި އިދާރީ ކަންކަން ހަމަ ނުޖެހިގެން މި މަސްވެެރިންނަށް ވަނީ އިންތިހާ ނިކަމެތިކަމާއި ކުރިމަތިލާން ޖެހިފަ އެވެ.
" މަސްވެރިންގެ ދަރަޖަ ވަރަށް ސާފު މި ކަންކަން ކުރާ ގޮތުން. މަސްވެރިންގެ އަޑެއް ނާހާ. މަސްވެރިންގެ އަޑު އަހަން ވަޑައިގަންނަވަން ވީ ނޫންތޯ.
މަސްވެރިންގެ ބަސް ވަރަށް ސާފެވެ. ވީ ވައުދުތައް ވީ ބިލާހަކަށެވެ. ވީ ވައުދު ނުފުއްދައިގެން ޖަވާބުދާރީ ކުރަން ނިކުތީމަ އެ ކަމުގައި ވެސް އެންމެ އިސްކޮށް ތިބި މީހުން ދަމާ ކޫތާފައި ވިޔަސް ހައްޔަރުކޮށްގެން ގެންގޮސް ކުޑަގޮޅިއަށް ގަޅުވާލީ އެވެ. މިއީ އާއްމު މަސްވެރިޔާ އަށް ހައްގު މިންވަރުތޯ މިއަދު މި މަސްވެރިން ސުވާލުކުރެ އެވެ.
