ޔޫވީ އަތުން ބުރަށް ނުވަ ލަނޑުގެ މޮޅެއް

މިހާރު ކުރިއަށްދާ ދިރާގު ދިވެހި ޕްރިމިއާ ލީގުގެ ދެ ވަނަ ބުރުގައި ޔުނައިޓެޑު ވިކްޓަރީ (ޔޫވީ)އާ ދެކޮޅަށް ކުޅުނު މެޗުން، ބުރު ސްޕޯޓްސް ކުލަބު ބޮޑު މޮޅެއް ހޯދައިފި އެވެ. 

ހުކުރު ދުވަހުގެ ރޭ ގަލޮޅު ރަސްމީ ދަނޑުގައި ކުޅުނު މެޗު ބުރުން ކާމިޔާބު ކުރީ 9-0 އިންނެވެ. މެޗުގެ ފުރަތަމަ ހާފުގައި ބުރުން ހަތް ލަނޑު ޖެހިއިރު، އަނެއް ދެ ލަނޑު އެ ޓީމުން ޖެހީ މެޗުގެ ދެ ވަނަ ހާފުގަ އެވެ. 

މެޗު ފަށައިގެން ހަ ވަނަ މިނެޓުގައި ބުރުން ވަނީ ލަނޑު ޖަހައި ލީޑު ނަގައިފަ އެވެ. އެ ލަނޑު އެ ޓީމަށް ޖަހައިދިނީ ޑިއަވަންޑޫ ނިއާންގް ޑިއާނޭ އެވެ. އޭނާ އަކީ މިފަހަރު ބުރަށް އަލަށް ގެނައި ސެނެގާލްގެ ކުޅުންތެރިޔެކެވެ. އޭގެ ތިން މިނެޓު ފަހުން ހުޑްސަން ޑިއާޒް ވަނީ ބުރުގެ ދެ ވަނަ ލަނޑު ޖަހައިފަ އެވެ.

މެޗުގެ 12 ވަނަ މިނެޓުގައި ޑިއަވަންޑޫ ވަނީ ބުރުގެ ތިން ވަނަ ލަނޑު ޖަހައި އިތުރަށް ލީޑު ފުޅާ ކޮށްދީފަ އެވެ. އޭގެ ދެ މިނެޓު ފަހުން ބުރުގެ ހަތަރު ވަނަ ލަނޑު ޖެހީ މުޙައްމަދު ނާއިމް އެވެ. ފުރަތަމަ ހާފުގައި ބުރުން އިތުރު ތިން ލަނޑު ޖެހިއިރު، 25 ވަނަ މިނެޓުގައި އެ ޓީމުގެ ފަސް ވަނަ ލަނޑު ޖެހީ އަރީން ޢަބްދުﷲ އިބްރާހީމް އެވެ.

އޭގެ ފަހުން މެޗުގެ 31 ވަނަ މިނެޓުގައި ހުޑްސަން ވަނީ ބުރުގެ ހަ ވަނަ ލަނޑު ޖަހައިފަ އެވެ. އަދި ފުރަތަމަ ހާފުގެ ފުރިހަމަ ވަގުތު ހަމަވާން މިނެޓަކަށް ވެފައި ވަނިކޮށް ބުރުގެ ހަތް ވަނަ ލަނޑު ޖެހީ ކުޅުންތެރިޔާ އަޙުމަދު ޢަބްދުﷲ އެވެ.

މެޗުގެ ދެ ވަނަ ހާފު ފަށައިގެން ދެ ވަނަ މިނެޓުގައި ހުޑްސަން ވަނީ ބުރުގެ އަށް ވަނަ ލަނޑު ޖަހައި، މެޗުގައި އޭނާގެ ހެޓްރިކް ހަމަ ކޮށްފަ އެވެ. އަދި އޭގެ ފަހުން މެޗުގެ 64 ވަނަ މިނެޓުގައި އޭނާ ވަނީ ހަތަރު ވަނަ ލަނޑެއް ވެސް ޖަަހައި، ބުރަށް ނުވަ ލަނޑުގެ މޮޅެއް ހޯދައިދީފަ އެވެ. 

ލީގުގައި ހުކުރު ދުވަހުގެ ހަވީރު ނިއު ރޭޑިއަންޓް ސްޕޯޓްސް ކުލަބުން ވަނީ، ކުލަބު ވެލެންސިއާއާ ދެކޮޅަށް ކުޅުނު މެޗުން މޮޅުވެފަ އެވެ. އެ މެޗު ނިއު ރޭޑިއަންޓް އިން ކާމިޔާބު ކުރީ 3-1 އިންނެވެ. މެޗުގައި ނިއު ރޭޑިއަންޓްގެ ލަނޑުތައް ޖެހީ ގޯމޭސް ޑަ ސިލްވާ، މުޙައްމަދު ފާސިރު އަދި ޙަސަން ރާއިފް އަޙުމަދު އެވެ. މެޗުގައި ވެލެންސިއާގެ ހަމައެކަނި ލަނޑު ޖެހީ އައިދު މުޙައްމަދު ޖަވީޒް އެވެ.

މި ނަތީޖާއާ އެކު ބުރު އޮތީ ލީގު ތާވަލްގެ ހަތަރު ވަނަ މަގާމުގަ އެވެ. އެއީ މިހާތަނަށް ލީގުގައި ކުޅެފައިވާ 10 މެޗުން 17 ޕޮއިންޓު ހޯދައިގެންނެވެ. ލީގު ތާވަލްގެ ތިން ވަނަ މަގާމުގައި ނިއު ރޭޑިއަންޓް އޮތީ މިހާތަނަށް ކުޅެފައިވާ 10 މެޗުން 20 ޕޮއިންޓާ އެކު އެވެ.