ފަނޑިޔާރު ގޭގައި ޖާގަ ނެތިގެން ރައްޔިތުންނަށް އިންސާފު ނުލިބުމަކީ ހުއްޖަތެއް ނޫން: މައުރޫފް
1 ޑިސެމްބަރު 2025 | ހޯމަ 14:40އަދުލު އިންސާފު ހޯދުމުގައި ތަފާތުކުރުން ހުރިކަން ހުރިހާ މެމްބަރުންގެ ވާހަކައިން ވެސް އެނގޭ
ކެންދޫ ދާއިރާގެ މެންބަރު މައުރޫފް ޒާކިރު
ފަނޑިޔާރުގޭގައި ޖާގަ ނެތިގެން މައްސަލަތައް ކުރިއަށް ނުދާ ކަމަށް ޝަރުއީ ދާއިރާ އިން ފާހަގަކުރާ ކަަމަށާއި، ފަނޑިޔާރު ގޭގައި ޖާގަ ނެތިގެން ރައްޔިތުންނަށް އިންސާފު ނުލިބުމަކީ ހުއްޖަތެއް ނޫން ކަމަށް ކެންދޫ ދާއިރާގެ މެމްބަރު މައުރޫފް ޒާކިރު ވިދާޅުވެއްޖެ އެވެ.
އޭނާ އެފަދައިން ވިދާޅުވީ ހޯމަ ދުވަހުގެ މަޖިލީހުގެ ޖަލްސާގައި ވާހަކަ ދައްކަވަމުންނެވެ.
އަދުލު އިންސާފު ހޯދުމުގައި ހުރި ދަތިތައް ހާމަކޮށް އެކަމަށް މަޖިލީހުގައި ބަހުސްކުރުމަކީ މިއަދު މަޖިލީހުގެ މެމްބަރުންގެ ބޮލުގައި އެޅިފައިވާ ޒިންމާ އެއް ކަމަށް މައުރޫފް ވިދާޅުވި އެވެ. ރާއްޖޭގެ ރަށްތަކާއި، ޕާޓީތަކާއި އާއިލާތަކަށް ބެލި އަސް އަދުލު އިންސާފު ނެތްކަން ހާމަވާ ކަމަށް އޭނާ ވިދާޅުވި އެވެ.
"އަދުލު އިންސާފު ޤާއިމްކުރުމުގެ ނިޒާމްގެ ކަންބޮޑުވުމުގެ ވާހަކަ ދެއްކުމަކީ ވަރަށް ބޮޑު ހިތްހަމަޖެހުމެއް. އަދުލު އިންސާފު ހޯދުމުގައި ތަފާތުކުރުން ހުރިކަން ހުރިހާ މެމްބަރުންގެ ވާހަކައިން ވެސް އެނގޭ." އޭނާ ވިދާޅުވި އެވެ.
އަދުލު އިންސާފު ޤާއިމްކުރެވޭކަން ނުވަތަ ނޫންކަން ނިންމާނީ އާއްމުން ކަމަށާއި އެކަން ނިންމާނީ ވެރިން ނޫން ކަމަށް ވެސް މައުރޫފް ވިދާޅުވި އެވެ. އަދި ހަމައެކަނި ވެރިން ބުނާ ބުނުމަކުން އިންސާފު ލިބުނު ކަމަށް ނުބެލޭނެ ކަަމަށާއި އަދުލު އިންސާފު ޤާއިމް ކުރެވިފައި ވާ ނަމަ އެކަން އާއްމުންނަށް ވެސް އިހުސާސް ވާނެ ކަމަށް އޭނާ ވިދާޅުވި އެވެ.
މައުރޫފް ވިދާޅުވީ އަދުލު އިންސާފު ނުލިބުމަކީ ޤައުމަށް ދިމާވެފައިވާ އެންމެ ބޮޑު އެއް މައްސަލަ ކަމަށެވެ. އިދާރާތަކާއި މުއައްސަސާތަކަށް އޮތް އިތުބާރު ޤާއިމްކޮށް އެކަން ދަމަހައްޓައިފި ނަމަ އާއްމުން ވެސް އިންސާފު ލިބޭނެ ކަމަށް ޤަބޫލުކުރާނެ ކަމަށް މައުރޫފް ވިދާޅުވި އެވެ.
