ސުލްހަވެރިކަމާ އެކު އިހުތިޖާޖު ކުރާ މަސްވެރިންނަށް ބިރު ދައްކައިގެން ހުއްޓުވޭނެ ކަމަށް ވިސްނުމަކީ ވަރަށް ބޮޑު ގޯހެއް: މައުރޫފް ޒާކިރު
ދޯނިތަކުގައި އުޅޭ ބިދޭސީން މުޒާހަރާގައި ބައިވެރި ވެއްޖެ ނަމަ ހައްޔަރު ކުރާނެ ކަމަށް ބުނެ ފުލުހުން އިންޒާރު ދީފައިވޭ
ބޮޑު ކަންނެލި މަސްވެރިންގެ ޔޫނިއަންގެ ކޯ ފައުންޑަރ މައުރޫފް ޒާކިރު
މަސްވެރިންގެ ޑިމާންޑް ތަކަށް ހައްލު ހޯދައި ދިނުމުގެ ބަދަލުގައި ސުލްހަވެރި ކަމާއެކު އިހުތިޖާޖު ކުރަމުންދާ މަސްވެރިންނަށް ބިރު ދައްކައިގެން ހުއްޓުވޭނެ ކަމުގެ ވިސްނުން ގެންގުޅުމަކީ ވަރަށް ބޮޑު ގޯހެއް ކަމަށް ރައްޔިތުން މަޖިލީހުގެ މެންބަރު އަދި ބޮޑު ކަންނެލި މަސްވެރިންގެ ޔޫނިއަން ގެ ކޯ ފައުންޑަރ މައުރޫފް ޒާކިރު ވިދާޅުވެއްޖެ އެވެ.
މައުރޫފް ވިދާޅުވީ ދޯނިތަކުގައި އުޅޭ ބިދޭސީން މުޒާހަރާގައި ބައިވެރި ނުވެވޭނެ ކަމަށް ބުނެ އެމީހުން ބައިވެރި ވެއްޖެ ނަމަ ހައްޔަރު ކުރާނެ ކަމަށް ބުނެ ފުލުހުން އިންޒާރު ދީފައިވާ ކަމަށެވެ. އެހެން ނަމަވެސް އެމީހުންނަކީ ދޯނި ތަކުގައި ދިރިއުޅޭ މީހުން ކަން ފާހަގަ ކުރައްވާ މައުރޫފް ވިދާޅުވި، އެމީހުންގެ ގެދޮރު ދާ ކޮންމެ ތާކަށް އެމީހުން ދާނެ ކަމަށެވެ. މައުރޫފް ވިދާޅުވީ ދޯނި ތަކުގައި ބިދޭސީން އުޅޭކަން ގަބޫލު ކުރާ ކަމަށާ އޭގެ ތެރެއިން ގިނަ ވާނި ސައްހަ ކޯޓާގައި މަސައްކަތް ކުރާ ބިދޭސީން ކަން ގަބޫލުކުރާ ކަމަށް މައުރޫފް ވިދާޅުވި އެވެ.
ކަމާ ކަންފަށާފަ ބިދޭސީން މުޒާހަރާ ކުރާކަށް ނާދޭ. މިދޯނި ތަކުގެ ވެރިންނާއި ކެޔޮޅުންނާއި އިސް ފަރާތްތަކުން މި މުޒާހަރާގައި ބައިވެރިވާން ނިންމައިގެން އައިސް އެބޭފުޅުން މީގަ ބައިވެރިވެ ކުރިއަށް މިގެންދަނީ. އެހެންވީމަ ސަރުކާރަށް އަޅުގަނޑުމެންނަށް ބިރު ދެއްކުމުގެ ގޮތުން ބިދޭސީންނަށް މުޒާހަރާ ނުކުރެވޭނޭ ހައްޔަރު ކުރާނަމޭ ފިޔަވަޅު އަޅާނަމޭ އެހެން ބުނުމުން އަޅުގަނޑުމެންނަށް މި އެނގިގެން މިދަނީ ސަރުކާރަށް ދެން އެނޫންގޮތެއް ދެން ނެތޭ. މިސާލަކަށް މި ދޯނިތަކުގައި ތިބި ބިދޭސީން ހިފާ ހައްޔަރު ކުރިޔޯ. މުޒާހަރާ ހުއްޓޭނެތޯ. ސަރުކާރުގެ ވައުދު ފުއްދޭނެ ތޯ. ކޮންހާލަތަކަށްތޯ ދެން މިހާލަތު އެ ބަދަލުވެގެން ދަނީ. އެހެންމާ ހަގީގަތުގައި ހެޔޮ ނިޔަތެއް ނެތްކަން އަޅުގަނދުމެންނަށް މި އެނގިގެން މިދިޔައި.ރައްޔިތުން މަޖިލީހުގެ ކެންދޫ ދާއިރާގެ މެންބަރު އަދި ބޮޑު ކަންނެލި މަސްވެރިންގެ ޔޫނިއަން ގެ ކޯ ފައުންޑަރ މައުރޫފް ޒާކިރު
މައުރޫފް ވިދާޅުވި މަސްވެރިންނާއި މަޝްވަރާ ކޮށްގެން މަސްވެރިންގެ ހުރި ކަންބޮޑުވުންތައް އަޑު އައްސަވާ މައްސަލަ ހައްލު ކޮށްދެއްވުމަށް ވަޒީރު ޝިޔާމަށް އަދި ރައީސުލްޖުމްހޫރިއްޔާ އަށް ވެސް ދަންނަވާފައިވާނެ ކަމަށެވެ. އަދި މިދިޔަ އޮކްޓޫބަރު މަހުގައި ވަޒީރަށް ސިޓީ އެއް ފޮނުވި ކަމަށާއި ހަމަ އެގޮތަށް މިދިޔަ ސެޕްޓެމްބަރު މަހުގައި ރައީސް މުޢިއްޒު އަށް ވެސް ސިޓީ އެއް ފޮނުވި ކަމަށް މައުރޫފް ވިދާޅުވި އެވެ.
އޭގެ އިތުރުން މި އިހުތިޖާޖު އޮންނާނެ ވާހަކަ އަންގާ އިއުލާނެއް ވެސް ކުރި ކަމަށް މައުރޫފް ވިދާޅުވި އެވެ. އެ އިއުލާނުގައި މަޝްވަރާ ކުރުމަށް ފުރުސަތު އޮތް ވާހަކަ ދަންނަވާފައި ވާނެ ކަމަށާއި އެހެން ނަމަވެސް ހެނދުނު އިހުތިޖާޖު ފަށައިގެން މެންދުރު ވަންދެން ކުރިއަށް ގެންދިޔައިރު ވެސް އެއްވެސް ފަރާތަކުން މަޝްވަރާ ނުކުރައްވާ ކަމަށް މައުރޫފް ވިދާޅުވި އެވެ. އެހެން ކަމުން ފަޅުން ނިކުމެ އެއް ނަންބަރު ޖެޓީ އާއި ހިސާބަށް އައީ ފުރިހަމަ ކުރަންޖެހޭ ހުރިހާ އިޖްރާތްތަކެއް ފުރިހަމަ ކޮށްފައި ކަމަށް މައުރޫފް ވިދާޅުވި އެވެ.
