މައުރޫފް ހައްޔަރުކުރުމުން ބޭއްވި ކޮމިޓީ ގައި ވޯޓަށް އަހަން ބޭނުންވާ މިންވަރަށް މެމްބަރުން ހަމަ އެއް ނުވި
ވޯޓަށް އަހަން ކޯރަމް ހަމަ ވަނީ 6 މެމްބަރުން ކޮމިޓީގެ ބައްދަލުވުމުގައި ތިބެގެން
މެންބަރު މައުރޫފު ހައްޔަރުކުރުމާ ގުޅިގެން ބޭއްވި އިމްތިޔާޒު ކޮމެޓީ ބައްދަލުވުން
ބޮޑު ކަންނެލީގެ މަސްވެރިން ކުރަމުން ގެންދާ މުޒާހަރާގެ ތެރެއިން ކެންދޫ ދާއިރާގެ މެންބަރު މައުރޫފް ޒާކިރު ފުލުހުންގެ ބެލުމުގެ ދަށަށް ގެންގޮސްފައިވާ މައްސަލަ އާއި ގުޅިގެން މަޖިލީހުގެ އިމްތިޔާޒާއި ސުލޫކު ކޮމެޓީގައި ވޯޓަށް އަހަން ބޭނުންވާ ވަރަށް މިންވަރަށް މެމްބަރުން ހަމަ ނުވުމުން އެއްވެސް ކަމަކަށް ވޯޓަށް އެހޭ ގޮތެއް ނުވި އެވެ.
ބުރާސްފަތި ދުވަހުގެ ރޭ ބޭއްވި އެ ކޮމިޓީ އަށް ހާޒިރުވީ 5 މެމްބަރުންނެވެ. ވޯޓަށް އަހަން ކޯރަމް ހަމަ ވަނީ 6 މެމްބަރުން ކޮމިޓީގެ ބައްދަލުވުމުގައި ތިބެގެންނެވެ. ކޮމިޓީ އަށް ހާޒިރުވި 5 މެމްބަރުންނަކީ ކޮމިޓީގެ މުގައްރިރު ދިއްދޫ ދާއިރާގެ މެމްބަރު އަބްދުއްލަތީފް މުހައްމަދު، ކަނޑިތީމް ދާއިރާގެ މެމްބަރު އަމީން ފައިސަލް ގެ އިތުރުން، ހުޅުމާލެ އުތުރު ދާއިރާގެ މެމްބަރު ހުސައިން ޝަރީފް، މަޑުއްވަރީ ދާއިރާގެ މެމްބަރު އަހުމަދު ޒާހިރު އަދި މަޑަވެލި ދައިރާގެ މެމްބަރު މުހައްމަދު ޝަމީޒް އެވެ.
އެ ކޮމިޓީ އާއި މެދު ރާއްޖެ އެމްވީ އަށް މައުލޫމާތުދެއްވަމުން މެމްބަރު އަމީން ވިދާޅުވީ ކޮމިޓީ ގައި ވޯޓުގެ ކޯރަމް ހަމަ ނުވީ ބައެއް މެމްބަރުން ރަށުގައި ނެތުމުން ކަމަށެވެ. ނަމަވެސް ޕީއެންސީ އިން ބޭނުން ވެގެން ކަމެއް ކުރާ ނަމަ ކޮންމެ ގޮތެއް ހަދާފަ ވެސް ކޯރަމް ހަމަކުރާނެ ކަމަށް އޭނާ ވިދާޅުވި އެވެ.
"ޖިނާއީ ތަހުގީގެއް ހިންގާ މިންވަރަކަށް ކުށްވެރިވާ ކަމެއް ނޫން މިއީ. މިއީ އެފަދަ ހާލަތެއް ނޫން. މައުރޫފް އާއި މެދު ދެކެނީ ވަކިން ތަފާތުކޮށް. ކޮމިޓީ އަށް މީހުން އަންނާނެ ޕީއެންސީ އަށް ބޭނުންވާ ކަމެއް ކުރަން ވެއްޖެއްޔާ. 5 މީހުން ހަމަވީ. ގަސްތުގައި ކަމަށް ބެލެވެނީ." އަމީން
މި ބައްދަލުވުން ފެށިތާ 10 ވަރަކަށް މިނިޓު ތެރޭގައި ބައްދަލުވުން ވަނީ ނިންމާލާފަ އެވެ.
މައުރޫފް ހައްޔަރު ކުރި މައްސަލަ މަޖިލީހުގެ އިމްތިޔާޒާއި ސުލޫކު ކޮމެޓީއިން ބަލައި ދިނުމަށް އެދި ހުށަހެޅީ މާވަށު ދާއިރާގެ މެންބަރު އަހުމަދު ޝާކިރު އެވެ. ބުރާސްފަތި ދުވަހު ބޮޑު ކަންނެލީގެ މަސްވެރިން ކުރަމުން ގެންދާ މުޒާހަރާގެ ތެރެއިން ކެންދޫ ދާއިރާގެ މެންބަރު މައުރޫފް ޒާކިރު ފުލުހުންގެ ބެލުމުގެ ދަށަށް ގެންދެވިފައިވާ ކަމަށް ފުލުހުން އަންގާފައި ވުމުން، ކެންދޫ ދާއިރާގެ މެންބަރު މައުރޫފް ޒާކިރު ގެންދެވިފައިވަނީ ހައްޔަރަށްތޯ ނުވަތަ ނޫންކަން ފުލުހުންގެ ކިބައިން ސާފުކޮށް ދިނުމަށް ވަނީ އެދިފަ އެވެ.
އަދި ކޮމެޓީގެ މުގައްރިރު ދިއްދޫ ދާއިރާގެ މެންބަރު އަބްދުއްލަތީފް މުހައްމަދު ވަނީ މެންބަރު މައުރޫފް އަދިވެސް ހުރީ ހައްޔަރުގައި ކަން ކަށަވަރު ކޮށްދީފަ އެވެ.
ކޮމިޓީ އަށް މައްޗަންގޮޅި އުތުރު ދާއިރާގެ މެމްބަރު މުހައްމަދު އިބްރާޙިމް (ކުޑޫ) ވެސް ވަނީ ކޮމިޓީ އަށް ސިޓީ އެއް ހުށަހަޅުއްވާފަ އެވެ.
ބުރާސްފަތި ދުވަހުގެ ރޭގެ ބައްދަލުވުމުގައި އޮތީ ޝާކިރު އާއި ކުޑޫ އާއި ދެ މީހުން ފޮނުވި ސިޓީ އާއި މެދު މަޝްވަރާކުރުމެވެ.
ކެންދޫ ދާއިރާގެ މެންބަރު މައުރޫފް ޒާކިރު ބައިވެރިވެފައިވަނީ ސުލްހަވެރި މުޒާހަރާއެއް ކަމަށް ވާއިރު މައުރޫފް އާއި މެދު އެހެން މީހުންނާއި މެދު އަމަލު ނުކުރާ މޭރުމަކުން އަމަލުކުރާ ކަމަށް ބުނެ މެމްބަރު އަމީން ވަނީ ވަރަށް ބޮޑަށް ކަންބޮޑުވުން ފާޅުކުރައްވާފަ އެވެ.
