މަސްވެރިންގެ މުޒާހަރާގެ ތެރެއިން 2 ދޯންޏާއި 3 މީހަކު ފުލުހުންގެ ބެލުމުގެ ދަށަށް ގެނެސްފި، މެންބަރ މައުރޫފު ވެސް ހިމެނޭ
އިހުތިޖާޖުގައި ބިދޭސީން ހަރަކާތްތެރިވާކަމަށް ބުނެ ދޯނިތަކަށް ފުލުހުން އަރައި 3 މީހަކު ހައްޔަރު ކޮށްފައިވޭ
އިހުތިޖާޖު ކުރަމުންދާ މަސްދޯނި ތަކަށް ފުލުހުން އަރައި ކެންދޫ ދާއިރާގެ މެންބަރު ހައްޔަރު ކުރަނީ
ބޮޑު ކަންނެލި މަސްވެރިންގެ ޔޫނިއަން އިން ކުރަމުންދާ މުޒާހަރާގެ ތެރެއިން 2 ދޯންޏާއި 3 މީހަކު ފުލުހުންގެ ބެލުމުގެ ދަށަށް ގެނެސްފައިވާ ކަމަށް ފުލުހުން ބުނެފި އެވެ.
ފުލުހުން ބުނީ މަސްވެރިން މިހާރު ކުރަމުންދާ އިހުތިޖާޖު ގައި ބިދޭސީން ބައިވެރިވަމުންދާކަން ފާހަގަކުރެވުމާއެކު، އެކަން އެގޮތަށް ނުކުރުމަށް ނަސޭހަތްތެރިވުމަށްފަހު، އެ ދޯނި ތަކުގައި މަސައްކަތް ކުރާ ބިދޭސީންނާ ގުޅޭ މައުލޫމާތު ހޯދުމަށްޓަކައި ފުލުހުންނާއި އިމިގްރޭޝަން ގުޅިގެން މަސައްކަތް ކުރަމުންދާ ކަމަށެވެ. އެގޮތުން ބުރާސްފަތި ދުވަހު ފުލުހުން ވަނީ އިހުތިޖާޖު ގައި ބިދޭސީން ހަރަކާތްތެރިވާ ކަމަށް ފާހަގަކުރެވިފައިވާ ކަމަށް ބުނެ ދޯނިތަކަށް އަރާފައެވެ.
ފުލުހުން ބުނީ މަސްވެރިން މިހާރު ކުރަމުންދާ އިހުތިޖާޖާ ގުޅިގެން 2 ދޯނި ފުލުހުންގެ ބެލުމުގެ ދަށަށް ގެނެވިފައިވާ ކަމަށެވެ. އަދި ފުލުހުންގެ އަމުރަށް ނުކިޔަމަންތެރިވެ، ފުލުހުންގެ ދައުރު އަދާކުރުމަށް ހުރަސް އެޅިކަމުގެ ތުހުމަތުގައި 3 މީހަކު ފުލުހުންގެ ބެލުމުގެ ދަށަށް ގެނެސްފައިވާ ކަމަށާއި، މި މީހުންގެ ތެރޭގައި ރައްޔިތުންގެ މަޖިލީހުގެ ކެންދޫ ދާއިރާގެ މެމްބަރު މައުރޫފް ޒާކިރު ހިމެނޭ ކަމަށެވެ.
ފުލުހުންގެ އަމުރަށް ނުކިޔަމަންތެރިވެ، ފުލުހުންގެ ދައުރު އަދާކުރުމަށް ހުރަސްއެޅިކަމުގެ ތުހުމަތުގައި 3 މީހަކާއި 2 ދޯނި ފުލުހުންގެ ބެލުމުގެ ދަަށަށް ގެނައި އިރު، އަމުރަށް ނުކިޔަމަންތެރިވި ގޮތެއް ފުލުހުންނާއި ސުވާލުކުރުމުން ސާފުކޮށް ނުދިނެވެ. އަދި ކަނޑުމަތީގައި ސުލްހަވެރި މުޒާހަރާ އެއް ކުރަމުން ދިޔަ މަސްވެރިން ފުލުހުންގެ ދައުރު އަދާކުރުމަށް ހުރަސްއެޅި ގޮތެއް ވެސް ފުލުހުންނާއި ސުވާލު ކުރުމުން ބުނެދީފައި ނުވެ އެވެ.
ފުލުހުންގެ ބެލުމުގެ ދަށަށް ގެނައި ދޯނީގެ ތެރެއިން އެއް ދޯނީ ގައި ރާއްޖެޓީވީ ގެ ނޫސްވެރިޔާ އާއި ކެމެރާމަން ދަނީ ހަރަކާތްތެރިވަމުންނެވެ. އަދި ފުލުހުން އަންގައިގެން ރާއްޖެޓީވީގެ ލައިވް ވެސް ވަނީ މެދުކަނޑާލާފަ އެވެ.
ހައްޔަރު ކުރި މީހުންނާއި ދޯނިތައް ގެންދަނީ ދޫނިދޫ އަށެވެ.
