މަސްވެރިންގެ ދުވަހު މުހިއްމީ ޖަލްސާ ބައްވާ އެވޯޑު ދިނުމެއް ނޫން، މުހިއްމީ މަސްވެރިންގެ ކަންބޮޑުވުން އަޑު އަހައި ހައްލު ހޯދުން: މައުރޫފް
މި ސަރުކާރު ވެރިކަމަށް އައީ މަސްވެރިންނަށް ގިނަ ވައުދުތަކެއް ވުމަށްފަހު
އިހުތިޖާޖަށް މަސްވެރިން ތައްޔާރު ވަމުން ދަނީ
މަސްވެރިންގެ ދުވަހު މުހިއްމީ ކުލަގަދަ، ބޮޑު ޖަލްސާއެއް ބާއްވާ ބަޔަކަށް އެވޯޑުތަކެއް ދިނުން ނޫން ކަމަށާ އެއަށް ވުރެ މުހިއްމީ މަސްވެރިންގެ ކަންބޮޑުވުންތައް އަޑުއަހައި، އެކަންކަމަށް ހައްލު ހޯދައިދިނުން ކަމަށް ބޮޑު ކަންނެލި މަސްވެރިންގެ ޔޫނިއަންގެ މެންބަރު އަދި ރައްޔިތުންގެ މަޖިލީހުގެ ކެންދޫ ދާއިރާ ގެ މެންބަރު މައުރޫފް ޒާކިރު ވިދާޅުވެއްޖެ އެވެ.
ބޮޑު ކަންނެލި މަސްވެެރިންގެ ޔޫނިއަނުން ކުރިއަށް ގެންދާ މަސްވެރިންގެ އިހުތިޖާޖުގެ ތެރެއިން ރާއްޖެޓީވީ އަށް ދެއްވި އިންޓަވިއު އެއްގައި މައުރޫފް ވިދާޅުވީ ޑިސެމްބަރު މަހުގެ 10 ވަނަ ދުވަހު ފާހަގަކުރާ މަސްވެރިންގެ ދުވަހު މަސްވެރިންގެ ކަންބޮޑުވުންތައް ފާޅު ކުރުމަށްޓަކައި ބީކޭއެމްޔޫ އިން އިން އިސްނަގައިގެން ގިނަ މަސައްކަތްތަކެއް ކުރަމުންދާ ކަމަށެވެ.
މައުރޫފް ވިދާޅުވީ މި ސަރުކާރު ވެރިކަމަށް އައީ މަސްވެރިންނަށް ގިނަ ވައުދުތަކެއް ވުމަށްފަހުގަ އެވެ.
މި ސަރުކާރު ވެރިކަމަށް އައުމަށްޓަކައި ސަރުކާރުގަ އަޅުގަނޑުމެން ގެ ޑިމާންޑުތައް އެއީ ބޮޑު ކަންނެލި މަސްވެރިންގެ ޑީމާންޑު ތައް އަޑު އަހައި، އޭގެތެރޭގަ އެންމެ މުހިއްމު ގޮތެއްގަ އަޅުގަނޑު މެން ފާހަގަކުރަމުން އައި ތިން ޑިމާންޑު ސަރުކާރުގެ ވައުދުތަކުގެ ތެރޭގައި ހިމަނައި، މެނިފެސްޓޯގައި ޖެހި، ރިޔާސީ ވައުދުގެ ގޮތުގަ ވަނީ އިއުލާނު ކުރެވިފަ،ބޮޑު ކަންނެލި މަސްވެރިންގެ ޔޫނިއަންގެ މެންބަރު އަދި ރައްޔިތުންގެ މަޖިލީހުގެ ކެންދޫ ދާއިރާ ގެ މެންބަރު މައުރޫފް ޒާކިރު
މި އިހުތިޖާޖު ގައި މަސްވެރިން މައިގަނޑު ގޮތެއްގައި ސަރުކާރަށް ކުރަމުން ދަނީ 3 ޑިމާންޑެކެވެ.
އެއީ މި ސަރުކާރުގެ މެނިފެސްޓޯގައި ވެސް ހިމަނާފައިވާ ގޮތަށް ސަރުކާރުގެ މަސް ކުންފުނި، މިފްކޯ އަށް ބޮޑު ކަންނެލި ގަންނަން ފެށުމާއި، ކަންނެލި ގަނެވޭނެ އެންމެ ދަށް އަގަކީ 80 ރުފިޔާ އާއި 100 ރުފިޔާ އާ ދެމެދު ކަމަށް ކަނޑައެޅުމުގެ އިތުރުން ބޭސް ރޭޓުގައި މަސްވެރިންނަށް ތެލާއި އައިސް ލިބޭނެ ގޮތް ހަދައިދިނުމެވެ.
މައުރޫފް ވިދާޅުވީ މެނިފެސްޓޯގައި މި ވައުދުތައް ހިމަނައި، މަސްވެރިންގެ ވޯޓާއެކު މި ސަރުކާރު ވެރިކަމަށް އައީ އެއީ އެ ކަންކަމަކީ މި ސަރުކާރަށް ކުރެވޭނެ ކަންކަމަށް ވާތީ ނޫންތޯ ވިދާޅުވެފަ އެވެ. އެހެން ކަމަށް ވާނަމަ ވައުދުތައް ނުފުއްދެންވީ ސަބަބެއް އޮތް ކަމަށް ގަބޫލު ނުކުރައްވާ ކަމަށް ވެސް ވިދާޅުވި އެވެ.
މިފަދަ ދުވަހުގެ ފާހަގަ ކުރާއިރު މުހިއްމީ ކުލަގަދަ، ބޮޑު ޖަލްސާއެއް ބާއްވާ ބަޔަކަށް އެވޯޑުތަކެއް ދިނުން ނޫން ކަމަށާ އެއަށް ވުރެ މުހިއްމީ މަސްވެރިންގެ ކަންބޮޑުވުންތައް އަޑުއަހައި، އެކަންކަމަށް ހައްލު ހޯދައިދިނުން ކަމަށް ވެސް މައުރޫފް ވިދާޅުވި އެވެ.
