މަޢުރޫފް ހައްޔަރުކުރީ އަނިޔާވެރިކޮށް، އޭނާ ވަގުތުން ދޫކޮށްލާން ގޮވާލަން: އެމްޑީޕީ ގެ ޕީޖީ
މަސްވެރިންނަށް ވައުދުވި 48 ގަޑިއިރު ތެރޭގައި ފައިސާދިނުމާއި ޑޮލަރުން ފައިސާލިބޭނެ ގޮތް ހަމަޖައްސައިދިނުމުގައި ސަރުކާރުން ފެއިލްވެފައިވާކަމަށް އެމްޑީޕީ ޕީޖީ ގްރޫޕުން ބުނެފައިވޭ
އެމްޑީޕީގެ ޕީޖީ ގުރޫޕުގެ ނޫސްވެރިންގެ ބައްދަލުވުމެއް ތެރެއިން
މަސްވެރިން ގެ ސުލްހަވެރި އިހުތިޖާޖުގެ ތެރެއިން، ރައްޔިތުންގެ މަޖިލީހުގެ ކެންދޫ ދާއިރާ ގެ މެންބަރު މަޢުރޫފް ޛާކިރު ހައްޔަރު ކުރީ އަނިޔާވެރިކޮށް ކަމަށް ފާހަގަކޮށް އެކަން އެމްޑީޕީ ގެ ޕީޖީ ގްރޫޕުން ކުށްވެރިކޮށްފި އެވެ.
އިޙްތިޖާޖުކުރުމަށްޓަކައި ހަޅުތާލުކުރުމުގެ ގޮތުން މަސައްކަތް ހުއްޓައިލައިގެން ތިބުމުގެ ޙައްޤު ދިވެހިރާއްޖޭ ގައި ވަޒީފާ އަދާކުރާ މީހުންނާއި އެނޫންވެސް މަސައްކަތްތެރީންނަށް ލިބިގެންވާ ކަމަށް، ޤާނޫނުއަސާސީގެ 31 ވަނަ މާއްދާގައި ވަނީ ބަޔާންކޮށްފަ އެވެ. އެހެންނަމަވެސް ޤާނޫނުއަސާސީން ކަށަވަރުކޮށްދީފައިވާ ހައްގެއްގެ ބޭނުން ހިފަމުން ދަނިކޮށް، އެ އިހުތިޖާޖު ނިމުމަކަށް ގެނައުމަށް ސަރުކާރުން ބޭނުންވެގެން އިހުތިޖާޖުގެ ބައިވެރިންގެ ތެރެއިން ބަޔަކު ވަނީ، ފުލުހުން ހާލަތާ ނުބައްދަލު ބާރު ގެ ބޭނުންކޮށްގެން ޤާނޫނާ ހިލާފަށް ހައްޔަރުކޮށްފަ އެވެ. މެމްބަރުން ވަނީ މިކަންކަމަށް ރިއާޔަތްކޮށް، މެންބަރު މަޢުރޫފް ޛާކިރު ޤާނޫނާ ހިލާފަށް ހައްޔަރުކުރުން ކުށްވެރިކޮށް، ވަގުތުން ދޫކޮށްލުމަށް ގޮވާލާފަ އެވެ.
އަދި، ރައްޔިތުން ގެ އަސާސީ ހައްގުތަކާއި މިނިވަންކަމަށް ހުރަސްނޭޅުމަށާއި، މަސްވެރިންނަށް ވެފައިވާ ވައުދުތައް ފުއްދައިދިނުމަށް ދިވެހިރައްޔިތުން ގެ ޑިމޮކްރެޓިކް ޕާޓީ ގެ ޕާލިމެންޓަރީ ގްރޫޕުން ރައީސް މުއިއްޒު ގެ ސަރުކާރަށް މެމްބަރުން ވަނީ ގޮވާލާފަ އެވެ.
އެމްޑީޕީ ގެ ޕީޖީ ގްރޫޕް ގެ މެމްބަރުން ސޮއިކޮށް ނެރުނު ބަޔާނުގައި މި ސަރުކާރުން މަސްވެރިންނާއި މެދު ޢަމަލުކުރާ ގޮތް ވަރަށް ބޮޑަސް ކުށްވެރިކޮށްފަ އެވެ.
މަސްވެރިން ބާނާ މަހަށް، 48 ގަޑިއިރު ގެ ތެރޭގައި ފައިސާ ދިނުމާއި، ޑޮލަރުން ފައިސާ ލިބޭނެގޮތްވެސް ހަމަޖައްސައިދިނުމަކީ، ރިޔާސީ އިންތިހާބު ގެ ކެމްޕޭން ތެރޭގައި، މިހާރު ރައީސް ޑޮކްޓަރ މުޙައްމަދު މުއިއްޒު މަސްވެރިންނަށް ވައުދުވެވަޑައިގެންފައިވާ ކަމެކެވެ. އެހެން ނަމަވެސް، އެ ވައުދުތައް ފުއްދުމުގައި ސަރުކާރުން ވަނީ ވަރަށް ބޮޑަށް ފެއިލްވެފައި ކަމަށް މެމްބަރުން ވަނީ ބުނެފަ އެވެ.
އެ ބަޔާނުގައި ބުނެފައި ވަނީ ޑރ. މުއިއްޒު ވެރިކަމަށް ގެނައުމަށް މަސްވެރިންނާއި މަސްވެރި އާއިލާތަކުން ވޯޓު ދިނީ، ރާއްޖޭ ގެ މަސްވެރިކަން އައު ހަރުފަތަކަށް ގެންދަވާނެކަމަށް އެ މަނިކުފާނު ވެވަޑައިގެންނެވި ވައުދުފުޅާގުޅިގެން ކަމަށެވެ. އެހެންނަމަވެސް މި ސަރުކާރުގައި މަސްވެރިންނަށް ދަތިކުރަމުންދާކަމަށާއި، މިހައި ދަތި ދުވަސްވަރެއް އަދި ނުދެކޭކަމަށް މަސްވެރިން ދަނީ ބުނަމުންކަން މެމްބަރުން ފާހަގަކުރެ އެވެ.
ބޮޑުކަންނެލީ ގެ މަސްވެރިކަން ކުރާ ފަރާތްތަކުން ބާނާ ބޮޑުކަންނެލި ކިރުމަށް ޓަކައި އެތައް ދުވަހެއް ވަންދެއް ކިޔުގައި މަޑުކުރަން ޖެހުން އާއްމުވެ، ކަންނެލި ކިރޭނެ ގޮތް ނުވުމާއި، ކަންނެލި ކިރުމަށްފަހު ފައިސާ ލިބުން އިންތިހާއަށް ލަސްވަމުންދިޔުމާއި، މަސްވެރިކަން ކުރުމަށް އެކި ގޮތްގޮތުން ދިމާވާ ދަތިތައް އިތުރުވަމުން އަންނާތީ، ހައްގުތައް ހޯދުމަށް ޓަކައި މަސްވެރިން ސުލްހަވެރި އިހުތިޖާޖެއް ކުރަން ފެށިކަން އޭނާ ގެ ސިޓީގައި ބުނެފައިވެ އެވެ.
ސަރުކާރުން ކުރާ ކަންތައްތައް ހިނގާނުހިނގާ ގޮތް ބެލުމާއި ޖަވާބުދާރީކުރުވުމަށް ރައްޔިތުން ގެ މަޖިލީހާ މަތިކޮށްފައިވާ ދުސްތޫރީ ވާޖިބު އަދާކުރުމާއި، ރައްޔިތުން ގެ އަސާސީ ހައްގުތަކާއި މިނިވަންކަމު ގެ ދިފާއުގައި ކުރަންޖެހުނު ކޮންމެ ކަމެއް ކުރުމުގައި ފަސްޖެހުމެއްނެތި، ދިވެހިރައްޔިތުން ގެ ޑިމޮކްރެޓިކް ޕާޓީ ގެ ޕާލިމެންޓަރީ ގްރޫޕް ދެމި އޮންނާނެކަމު ގެ ޔަގީންކަން ރައްޔިތުންނަށް އެމްޑީޕީ ޕީޖީ ގްރޫޕު ގެ ފަރާތުން ވަނީ ދީފަ އެވެ.
