މެންބަރު މައުރޫފް ހައްޔަރު ކުރި މައްސަލަ މަޖިލީހުން ބަލައިދިނުމަށް އެދި ހުށަހަޅައިފި
ފުލުހުންގެ ދައުރު އަދާކުރުމަށް ހުރަސްއެޅިކަމުގެ ތުހުމަތުގައި 3 މީހަކާއި 2 ދޯނި ފުލުހުންގެ ބެލުމުގެ ދަަށަށް ގެންދިޔަ
ރައްޔިތުން މަޖިލީހުގެ މެންބަރު މައުރޫފް ޒާކިރު
ބޮޑު ކަންނެލީގެ މަސްވެރިން ކުރަމުން ގެންދާ މުޒާހަރާގެ ތެރެއިން ކެންދޫ ދާއިރާގެ މެންބަރު މައުރޫފް ޒާކިރު ފުލުހުންގެ ބެލުމުގެ ދަށަށް ގެންގޮސްފައިވާ މައްސަލަ މަޖިލީހުގެ އިމްތިޔާޒާއި ސުލޫކު ކޮމެޓީއިން ބަލައި ދިނުމަށް އެދި ހުށަހަޅައިފި އެވެ.
ރައްޔިތުން މަޖިލީހުގެ މާވަށު ދާއިރާގެ މެންބަރު އަހުމަދު ޝާކިރު ރައްޔިތުން މަޖިލީހުގެ ރައީސް އަބްދުއްރަހީމް އަބްދުﷲ އަށް ފޮނުއްވި ސިޓީއެއްގައި ވިދާޅުވީ، ބުރާސްފަތި ދުވަހު ބޮޑު ކަންނެލީގެ މަސްވެރިން ކުރަމުން ގެންދާ މުޒާހަރާގެ ތެރެއިން ކެންދޫ ދާއިރާގެ މެންބަރު މައުރޫފް ޒާކިރު ފުލުހުންގެ ބެލުމުގެ ދަށަށް ގެންދެވިފައިވާ ކަމަށް ފުލުހުން އަންގާފައި ވުމުން، ކެންދޫ ދާއިރާގެ މެންބަރު މައުރޫފް ޒާކިރު ގެންދެވިފައިވަނީ ހައްޔަރަށްތޯ ނުވަތަ ނޫންކަން ފުލުހުންގެ ކިބައިން ސާފުކޮށް ދިނުމަށް އެދޭ ކަމަށެވެ.
އަދި ކެންދޫ ދާއިރާގެ މެންބަރު މައުރޫފް ޒާކިރު ބައިވެރިވެފައިވަނީ ސުލްހަވެރި މުޒާހަރާއެއް ކަމަށް ވެފައި ފުލުހުން މެންބަރު ހައްޔަރުކޮށްފައިވަނީ ގާނޫނާއި ހިލާފަށްކަން ފާހަގަ ކުރެވިފައިވާ ކަމަށް އެސީޓީގައި ބުނެފައިވެ އެވެ. އޭގެ އިތުރުން ފުލުހުން ބޭނުންކޮށްފައިވަނީ ގާނޫނާއި ހިލާފަށް ބޭނުންކުރަންޖެހޭ މިންވަރަށްވުރެ އިތުރަށް ބާރުގެ ބޭނުންކޮށްގެން ކަމަށާއި މިއީ ކަނޑައެޅިގެން މަޖިލީހުގެ މެންބަރުންގެ ކަރާމާތައް އަރައިގަތުން ކަމަށް ވެސް އެސިޓީގައި ފާހަގަ ކޮށްފައިވެ އެވެ.
މެންބަރު މައުރޫފް ޒާކިރު ހައްޔަރު ކޮށްފައިވާ މައްސަލަ މަޖިލީހުގެ އިމްތިޔާޒާއި ސުލޫކު ކޮމެޓީއިން ބައްލަވައިދެއްވާ މިކަމާ ގުޅޭގޮތުން ކޮމެޓީ ބައްދަލުވުމެއް ވެސް ތާވަލުކޮށް ދިނުމަށް ވަނީ އެދިފަ އެވެ.
މާވަށު ދާއިރާގެ މެންބަރު އަޙްމަދު ޝާކިރު، މަޖިލީހުގެ ރައީސް އަށް ފޮނުވި ސިޓީގެ ޖަވާބުގައި އިމްތިޔާޒާއި ސުލޫކު ކޮމެޓީގެ މުގައްރިރު، ދިއްދޫ ދާއިރާގެ މެންބަރު އަބްދުއްލަތީފް މުހައްމަދު އަށް ރައްޔިތުން މަޖިލީހުގެ އަމީން އާންމު ފޮނުވި ސިޓީގައި ވިދާޅުވީ، ބުރާސްފަތި ދުވަހު މަސްވެރިން ކުރަމުންދިޔަ މުޒާހަރާއެއްގެ ތެރެއިން، ކެންދޫ ދާއިރާގެ މެންބަރު މައުރޫފް ޒާކިރު، ފުލުހުންގެ ބެލުމުގެ ދަށަށް ގެންދެވިފައި ވާކަމުގެ މައުލުމާތު، ފުލުހުންގެ ހިދުމަތުން ހިއްސާ ކުރައްވާފައި ވާތީ، ރައްޔިތުން މަޖިލީހުގެ ގަވައިދުގެ 259 ވަނަ މާއްދާގައިވާ ގޮތުގެ މަތިން އެކަން އިމްތިޔާޒާއި ސުލޫކު ކޮމެޓީއަށް އެންގުމަށް ރައްޔިތުންގެ މަޖިލީހުގެ ރައީސް ވިދާޅުވި ކަމަށެވެ.
ފާހަގަ ކޮށްލެވޭ ގޮތުގައި ފުލުހުންގެ އަމުރަށް ނުކިޔަމަންތެރިވެ، ފުލުހުންގެ ދައުރު އަދާކުރުމަށް ހުރަސްއެޅިކަމުގެ ތުހުމަތުގައި 3 މީހަކާއި 2 ދޯނި ފުލުހުންގެ ބެލުމުގެ ދަަށަށް ގެނައި އިރު، އަމުރަށް ނުކިޔަމަންތެރިވި ގޮތެއް ފުލުހުންނާއި ސުވާލުކުރުމުން ސާފުކޮށް ނުދިނެވެ. އަދި ކަނޑުމަތީގައި ސުލްހަވެރި މުޒާހަރާ އެއް ކުރަމުން ދިޔަ މަސްވެރިން ފުލުހުންގެ ދައުރު އަދާކުރުމަށް ހުރަސްއެޅި ގޮތެއް ވެސް ފުލުހުންނާއި ސުވާލު ކުރުމުން ބުނެދީފައި ނުވެ އެވެ.
