ސުލްޙަ އަށް ޓްރަމްޕް ހުށަހަޅުއްވާފައިވާ ޕްލޭން އިސްލާޙު ކުރަން ޖެހޭ: މެކްރޮން

ރަޝިޔާ އާއި ޔުކްރެއިންއާ ދެމެދު ހިނގަމުން އަންނަ ހަނގުރާމަ ނިމުމަކަށް ގެނައުމަށް އެމެރިކާގެ ރައީސް ޑޮނަލްޑް ޓްރަމްޕް ހުށަހަޅުއްވާފައިވާ ސުލްޙައިގެ ޕްލޭން އިސްލާޙު ކުރަން ޖެހޭ ކަމަށް، ފްރާންސްގެ ރައީސް އިމަނުއެލް މެކްރޮން ވިދާޅުވެއްޖެ އެވެ.

ޓްރަމްޕްގެ ފަރާތުން ހުށަހަޅާފައިވާ ޕްލޭންއާ މެދު ޔޫރަޕުގެ ޤައުމު ތަކުގެ ކަންބޮޑުވުން އެބަ އޮތެވެ. އެކަމާ ގުޅޭ ގޮތުން މެކްރޮން ވިދާޅުވެފައި ވަނީ، ރަޝިޔާ-ޔުކްރެއިން ހަނގުރާމަ ނިންމުމަށް ޓްރަމްޕް ހުށަހަޅުއްވާފައިވާ ޕްލޭން ރަނގަޅު މިސްރާބެއްގައި ކުރިއަށްދާ ކަމަށެވެ. ނަމަވެސް، ޔުކްރެއިން އާއި ޔޫރަޕުގެ ޤައުމު ތަކަށް ޤަބޫލު ކުރެވޭ ގޮތަށް އެ ޕްލޭންގެ ކަންކަން ރަނގަޅު ކުރަން ޖެހޭ ކަމަށް ވެސް މެކްރޮން ވަނީ ވިދާޅުވެފަ އެވެ.

އަންގާރަ ދުވަހު އާރްޓީއެލް ރޭޑިއޯ އަށް ދެއްވި އިންޓަވިއުއެއްގައި މެކްރޮން ވިދާޅުވީ، ޓްރަމްޕްގެ އިސްނެގުން ސުލްޙައާ ދިމާލަށް ދާ ކަމަށް ޤަބޫލު ކުރެވޭ ކަމަށެވެ. ނަމަވެސް، ބައެއް ކަންކަމަށް މަޝްވަރާ ކުރަން ޖެހޭ ކަމަށާއި، އެއާ އެކު އިސްލާޙު ގެންނަން ޖެހޭ ކަންކަން ހުރި ކަމަށް ޤަބޫލު ކުރައްވާ ކަމަށް ވެސް މެކްރޮން ވަނީ ވިދާޅުވެފަ އެވެ.

މީގެ އިތުރުން ފްރާންސް އިން ބޭނުން ވަނީ އަވަސް އަދި ދެމެހެއްޓެނިވި ސުލްޙައެއް ކަމަށް މެކްރޮން ވިދާޅުވެފައިވެ އެވެ. އެހެން ނަމަވެސް، އެއީ ހަނގުރާމަ އިން ޔުކްރެއިން ބަލިވެ، ރަޝިޔާ އިން ހުށަހަޅާފައިވާ ސުލްޙަ އަކަށް ވެގެން ނުވާނެ ކަމަށް ވެސް މެކްރޮން ވިދާޅުވި އެވެ. އެގޮތުން ޔުކްރެއިންގެ ބިމުން ބައެއް ދޫކޮށްލުމުގެ ކަންތަކާ މެދު ގޮތެއް ނިންމާނީ އެ ޤައުމުގެ ރައްޔިތުން ކަމަށް ވެސް މެކްރޮން ފާހަގަ ކުރެއްވި އެވެ.

އިތުރަށް ވާހަކަ ދައްކަވަމުން މެކްރޮން ވިދާޅުވީ، މިހާރު ހުށަހަޅާފައިވާ ކަންކަމަށް ރަޝިޔާ އިން އެއްބަސްވެ، އެކަން ޤަބޫލު ކުރުމުގެ ވިސްނުން ގެންގުޅޭ ކަމުގެ އިޝާރާތް ތަކެއް ފެންނަމުން އަންނަ ކަމަށެވެ. ނަމަވެސް، އެއީ ޔުކްރެއިން އާއި، ޔޫރަޕުގެ ޤައުމު ތަކުން ޤަބޫލު ކުރަން ޖެހޭ ކަމެއް ނޫން ކަމަށް މެކްރޮން ވަނީ ވިދާޅުވެފަ އެވެ.

ހަނގުރާމަ ނިންމުމަށް ވަރަށް ބޮޑަށް ވަކާލާތު ކުރައްވަމުން އަންނަ މެކްރޮން ވިދާޅުވީ، ރަޝިޔާއާ އެކު ސުލްޙައިގެ އެއްބަސްވުމެއް ޤާއިމު ކުރާ ނަމަ، ޔުކްރެއިންގެ ފުރަތަމަ ދިފާއީ ފަރުދާ އަކަށް ވާނީ އެ ޤައުމުގެ ސިފައިންގެ ބޭރު އަލިން ބަދަހި ކުރުން ކަމަށާއި، އެކަމަށް ހަނި ކުރުމެއް އޮވެގެން ނުވާނެ ކަމަށެވެ. ހަމަ އެހެންމެ، ފްރީޒް ކޮށްފައިވާ ރަޝިޔާގެ އެންމެހާ އެސެޓުތައް ހުރީ ޔޫރަޕުގައި ކަމަށާއި، އެ އެސެޓުތަކާ ބެހޭ ގޮތުން ގޮތެއް ނިންމާނީ ވެސް ޔޫރަޕުން ކަމަށް މެކްރޮން ވިދާޅުވެފައިވެ އެވެ.

މެކްރޮންގެ އެ ވާހަކަތަކާ ގުޅިގެން އޭނާއާ ވަނީ އިތުރު ސުވާލެއް ކުރިމަތި ކޮށްފަ އެވެ. އެގޮތުން ސުލްޙައިގެ ރަނގަޅު މަގެއް ހޯދުމަށް، ނުވަތަ "ޑީލެއް" ހޯދުމަށް އެމެރިކާ އަށް ދިޔުމަށް ތައްޔާރަށް ހުންނެވިތޯ ވަނީ ސުވާލު ކޮށްފަ އެވެ. އެ ސުވާލާ ގުޅިގެން މެކްރޮން ވިދާޅުވެފައި ވަނީ، މިވަގުތަށް އެފަދަ ޕްލޭނެއް ނުވަތަ، ވިސްނުމެއް ނެތް ކަމަށެވެ.

ދެ އަހަރަށް ވުރެ ގިނަ ދުވަހަށް ދެމިގެންދާ ހަނގުރާމަ ނިމުމަކަށް ގެނައުމަށް ބައިނަލްއަޤުވާމީ މުޖުތަމައުން މިހާތަނަށް ގިނަ މަސައްކަތް ތަކެއް ކުރަމުން އަންނައިރު، ފްރާންސް އަކީ އެކަމުގައި މުހިންމު ދައުރެއް އަދާ ކުރާ ޤައުމެކެވެ. ޔޫރަޕުގެ ސަލާމަތާއި ރައްކާތެރި ކަމަށް ނުރައްކާވާ މި ހަނގުރާމައިގައި، ޔުކްރެއިންގެ ބިން ބާރު ގަދަ ގޮތުގައި ރައްކާތެރި ކުރުމަށް ވެސް ފްރާންސް އިން ވަނީ ގޮވާލައިފަ އެވެ.

ޓްރަމްޕްގެ ފަރާތުން ހުށަހަޅުއްވާފައިވާ ޕްލޭންއާ ގުޅޭ ގޮތުން މެކްރޮން ވާހަކަ ދައްކަވާފައިވާއިރު، މިއީ އެ ހުށަހެޅުމާ ގުޅޭ ގޮތުން ޔޫރަޕުގެ ފަރާތުން ވާހަކަ ދައްކާފައިވާ ފުރަތަމަ ފަހަރެވެ.