މައްސަލަ ހައްލު ނުވާނަމަ ގިނަ ބަޔަކު މަރުވެދާނެ، ގިނަ ބަޔަކު މަރުވުމަކީ އެންމެ ބޭނުންވާ ގޮތެއް ނޫން: ޓްރަމްޕް

އެމެރިކާާ އާއި އީރާންއާ ދެމެދު ކުރިއަށް ގެންދެވޭ މަޝްވަރާތައް ހޯމަ ދުވަހު ފަށާނެ ކަމަށާއި، ހުރްމުޒް ކަނޑުއޮޅީގެ މައްސަލައިގައި އެއްބަސްވުމަކަށް އާދެވިފައިވާ ކަމަށް އެމެރިކާގެ ރައީސް ޑޮނަލްޑް ޓްރަމްޕް ވިދާޅުވެއްޖެ އެވެ. 

އެއާފޯސް ވަންގައި ހުންނަވައި ނޫސްވެރިންނާ ވާހަކަ ދައްކަވަމުން ޓްރަމްޕް ވިދާޅުވީ، އީރާންގެ ނިއުކްލިއަރ ހަތިޔާރުތައް ނައްތާލުމުގެ މައްސަލައިގައި ވެސް އެއްބަސްވުމަކަށް އާދެވޭނެ ކަމަށް އުންމީދު ކުރައްވާ ކަމަށެވެ. ޓްރަމްޕް ވިދާޅުވީ އީރާންއާ ވާހަކަ ދައްކަމުން އަންނަނީ މެދުވެރިން މެދުވެރިކޮށް ކަމަށާއި، ހޯމަ ދުވަހުގެ މެންދުރު ފަހުގެ ވަގުތެއްގައި މަޝްވަރާތައް ފެށޭނެ ކަމަށް ލަފާ ކުރައްވާ ކަމަށެވެ. 

މީގެ އިތުރުން ޓްރަމްޕް ވިދާޅުވީ، އެމެެރިކާ އިން އީރާންގެ އިސްވެރިންނާ ވާާހަކަ ދައްކާނީ މަޝްވަރާތަކެއްގެ ސިފައިގައި ކަމަށެވެ. އަދި މައްސަލަތަކުން އަރައިގަނެ، މައްސަލަ ހައްލު ކުރަން އެމެރިކާ އިން ބޭނުންވާ ކަމަށާއި، އެހެން ނޫން ނަމަ ގިނަ ބަޔަކު މަރުވެދާނެ ކަމަށް ޓްރަމްޕް ވިދާޅުވި އެވެ. 

ހަމަ އެހެންމެ، މި ކަންކަމަށް ބޭނުން ނުވާ ވަރުގެ ބާރުގަދަ އަދި ހަރުކަށި ފިޔަވަޅުތައް އަޅަން ޖެހިދާނެ ކަމަށް ވެސް ޓްރަމްޕް އިންޒާރު ދެއްވި އެވެ. ޓްރަމްޕް ވިދާޅުވީ، އެމެރިކާ އިން ބޭނުންވާ ކޮންމެ ވަގުތެއްގައި ވެސް ފިޔަވަޅު އެޅޭނެ ކަމަށާއި، އެމެރިކާ އޮތީ އެކަމަށް ތައްޔާރަށް ކަމަށެވެ. އެހެން ނަމަވެސް، މީހުން މެރުމުގެ ބަދަލުގައި އެއްބަސްވުމަކަށް އައިސް މައްސަލަ ހައްލު ކުރަން އެމެރިކާ އިން ބޭނުންވާ ކަމަށް ޓްރަމްޕް ތަކުރާރުކޮށް ވިދާޅުވި އެވެ. 

ދާދި ފަހުން ޓްރަމްޕް ވަނީ އެމެރިކާ އިން އީރާން އަށް ދިނުމަށް ރާވާފައިވާ ބޮޑެތި ހަމަލާތަކެއް ކެންސަލް ކުރައްވާފައިވާ ކަމަށް ވެސް ވިދާޅުވެފައި އެވެ. އެގޮތުން އެއީ ސައުދީ އަރަބިއްޔާ އާއި އެކުވެރި އަރަބި އިމާރާތް (ޔޫއޭއީ) އާއި ޤަތަރު އަދި އީރާންއާ ވާހަކަ ދެއްކުމަށް ފަހު ނިންމެވި ނިންމުމެއް ކަމަށް ވެސް ޓްރަމްޕް ވިދާޅުވި އެވެ. ޓްރަމްޕް ސިފަ ކުރެއްވި ގޮތުގައި އެމެރިކާ އިން ދޭން ރޭވި އެ ހަމަލާތަކަކީ، ދެ ވަނަ ބޮޑު ހަނގުރާމައިގެ ފަހުން ދޭނެ އެންމެ ބޮޑު ހަމަލާތަކެވެ. 

މި ވޭތުވެދިޔަ ދުވަސްތަކުގައި އެމެރިކާ އިން ވަނީ އީރާން އަށް އަމާޒުކޮށް ގިނަ ހަމަލާތަކެއް ދީފައި އެވެ. އޭގެ ރައްދުގައި އީރާން އިން ވެސް ވަނީ މެދުއިރުމަތީގެ ސަރަހައްދުގައި ހުރި އެމެރިކާގެ އަސްކަރީ އަމާޒުތަކަށް ހަމަލާތަކެއް ދީފައި އެވެ. އެކަމުގެ ސަބަބުން ދެ ޤައުމުގެ ދެ މެދުގައި އޮތް ހަނގުރާމަ ހުއްޓާލުމުގެ އެއްބަސްވުން ނާފުޒު ޙާލަތަކަށް ދިޔަ އެވެ.