އިންފަންޓީނޯގެ ހުށަހެޅުމާ ދެކޮޅަށް ފްރާންސްގެ ރައީސް މެކްރޮން ވެސް މަސައްކަތް ކުރެއްވިކަން ހާމަވެއްޖެ

ދުނިޔޭގެ ފުޓުބޯޅައިގެ މައި އިދާރާ (ފީފާ)ގެ ރައީސް ޖިއާނީ އިންފަންޓީނޯ އަށް ކުރިމަތިވެފައިވާ ފިއްތުންތަކާއި، އެ އިދާރާގެ ތެރޭގައި އުފެދިފައިވާ މައްސަލަތަކުގެ ތެރެއަށް ފްރާންސްގެ ރައީސް އިމަނުއެލް މެކްރޮން ވަދެވަޑައިގެންފައިވާ ކަމަށް ރިޕޯޓުކޮށްފި އެވެ. 

ފްރާންސްގެ ނޫހެއް ކަމަށްވާ ލެކީޕް އިން ރިޕޯޓުކޮށްފައިވާ ގޮތުގައި، ފީފާގެ ވިޔަފާރީގެ އުސޫލުތަކަށް ގެންނަން ބަދަލުތަކާ ގުޅިގެން އުފެދުނު މައްސަލަތަކުގެ ތެރޭގައި، މެކްރޮން ވަނީ އަމަލީ ގޮތުން ބައިވެރިވެވަޑައިގެން، އެކަމުގައި އެކި ބޭފުޅުންނާ ވާހަކަ ދައްކަވައިފަ އެވެ.

މި މައްސަލަ ފެންމަތިވެފައި ވަނީ ފީފާ ފޯވާޑް އެންޓަޕްރައިޒްގެ ނަމުގައި ފީފާގެ ސަބްސިޑަރީ ކުންފުޏެއް އުފައްދައި، އަމިއްލަ އިންވެސްޓަރުންނަށް އޭގެ ހިއްސާ ވިއްކުމަށް ރާވާފައިވާ ކަމަށް ޖުލައި މަހުގެ ފަހުކޮޅު ފެންމަތިވުމުންނެވެ. މި މަޝްރޫއުގެ ދަށުން ފީފާ އައު ކުންފުނީގެ 20 އިންސައްތަ ހިއްސާ ބޭރުގެ އިންވެސްޓަރުންނަށް ވިއްކުމަށް އޮތީ ހަމަޖެހިފައި އެވެ. 

މީގެ އިތުރުން ފީފާ ވޯލްޑް ކަޕް އާއި، ކުލަބު ވޯލްޑް ކަޕް ފަދަ މުބާރާތްތަކުގެ ބްރޯޑްކާސްޓިން ރައިޓްސް އާއި، ޓިކެޓު ވިއްކުމާއި، ސްޕޮންސަރޝިޕް އަދި ލައިސަންސް ފަދަ މުހިންމު ވިޔަފާރިތައް ބަލަހައްޓާނީ އެ ކުންފުނިން ކަަމަށް އޮތީ ނިންމައިފަ އެވެ.  

މިކަމާ ގުޅިގެން ފްރާންސްގެ ރައީސް މެކްރޮން ވަނީ، ފާއިތުވި ދުވަސްތަކުގައި ފުޓުބޯޅައިގެ އެކި އިދާރާތަކުގެ ވެރިންނަށް ފޯނުން ގުޅުއްވައި މަޝްވަރާ ކުރައްވައިފަ އެވެ. ރިޕޯޓުތަކުގައި ބުނެފައިވާ ގޮތުން ފީފާގެ ޕްލޭންއާ ދެކޮޅު ހައްދަވައި، މެކްރޮން ތާއީދު ކުރެއްވީ ޔުއެފާގެ ނިންމުމަށެވެ. މެކްރޮންއާ ގާތް ގުޅުން އޮންނަ ފަރާތަކުން މައުލޫމާތު ދީފައިވާ ގޮތުގައި، 2021 ވަނަ އަހަރު ޔޫރަޕިއަން ސުޕަރ ލީގު އުފެއްދުމާ ދެކޮޅަށް މެކްރޮން ނުކުންނެވި ފަދައިން، މިފަހަރު ވެސް އޭނާ ހުންނެވީ ފީފާގެ ނިންމުމާ ދެކޮޅަށެވެ. 

ފީފާގެ ތެރޭގައި އުފެދުނު ބޮޑެތި ޚިޔާލު ތަފާތުވުންތަކާ ގުޅިގެން، އަމިއްލަ އިންވެސްޓަރުން ބައިވެރިކޮށްގެން ކުންފުނި އުފެއްދުމުގެ މަޝްރޫއު އެންމެ ފަހުން މިދިޔަ ހުކުރު ދުވަހު ވަނީ ކުއްލި ގޮތަކަށް ހުއްޓާލައިފަ އެވެ. ނަމަވެސް، މި މައްސަލައިގެ ސަބަބުން އިންފަންޓީނޯގެ ލީޑަރޝިޕް އަދި ފީފާ އަށް ވެސް ވަނީ ބޮޑެތި ފާޑުކިޔުންތަކެއް އަމާޒުވެފައި އެވެ. އަދި އިންފަންޓީނޯއާ ދެކޮޅަށް ގިނަ ބަޔަކު އަންނަނީ މިހާރު އަޑު އުފުލަމުންނެވެ. 

މި މައްސަލައިގައި އިނގިރޭސިވިލާތުގެ ބޮޑު ވަޒީރު އެންޑީ ބާންހަމް ވަނީ، އިންފަންޓީނޯ އަކީ ފީފާ ހިންގުމަށް އެކަށީގެންވާ ބޭފުޅާ ނޫން ކަމަށް ވިދާޅުވެ، އޭނާގެ އިސްތިއުފާ އަށް ގޮވާލައްވައިފަ އެވެ. މި މައްސަލައިގައި މެކްރޮން ވެސް އަމަލީ ގޮތުން ބައިވެރިވެ ވަޑައިގެންފައިވާ ކަމަށް ރިޕޯޓު ކޮށްފައި ވީ ނަމަވެސް، މި މައްސަލައިގައި މެކްރޮން އާންމުކޮށް އެއްޗެއް ވިދާޅުވެފައި ނުވެ އެވެ. އެހެން ނަމަވެސް، ފީފާގެ ނިންމުންތަކާއި، ހިންގުމާމެދު މެކްރޮންގެ ވެސް ހިތްހަމަނުޖެހުން އޮތް ކަމަށް މިކަމުން ދޭހަވާ ކަމަށް މީޑިއާތަކުގައި ބުނެފައިވެ އެވެ.