ޑެމްބެލޭ، ބެލެންޑިއޯ ކާމިޔާބު ކޮށްފި
23 ސެޕްޓެމްބަރު 2025 | އަންގާރަ 06:26ޑެމްބެލޭ ވަނީ މިދިޔަ ސީޒަންގައި ޕީއެސްޖީ އާއެކު ގިނަ ކާމިޔާބީތަކެއް ހޯދުމުގެ އިތުރުން، އެ ޓީމުގައި މޮޅު ކުޅުމެއް ދައްކައިފަ އެވެ. އެގޮތުން އޭނާ ވަނީ ޕީއެސްޖީ އާއެކު ފްރާންސް ލީގުގެ އިތުރުން، ފްރާންސް ކަޕް، ޓްރޮފީ ޑީ ޗެމްޕިއަންސް އަދި ޔުއެފާ ޗެމްޕިއަންސް ލީގު ކާމިޔާބު ކޮށްފަ އެވެ.
ޕީއެސްޖީ އަށް ކުޅެމުން އަންނަ އޮސްމާން ޑެމްބެލޭ، ބެލެންޑިއޯ އެވޯޑާ އެކު | ރޮއިޓާސް
ފްރާންސް ފުޓުބޯޅަ އިން ދުނިޔޭގެ އެންމެ މޮޅު ފުޓުބޯޅަ ކުޅުންތެރިޔާ އަށް ދެމުން އަންނަ ބެލެންޑިއޯ އެވޯޑު، ޕެރިސް ސެއިންޓް ޖާމަން (ޕީއެސްޖީ) އަށް ކުޅެމުން އަންނަ އޮސްމާން ޑެމްބެލޭ ހޯދައިފި އެވެ.
ހޯމަ ދުވަހުގެ ރޭ އޮތް ބެލެންޑިއޯ އެވޯޑު ހަފުލާގައި ޑެމްބެލޭ ބެލެންޑިއޯ ހޯދާފައި ވަނީ ބާސެލޯނާ އަށް ކުޅެމުން އަންނަ ސްޕެއިންގެ ލަމީން ޔަމާލް އަދި ޕީއެސްޖީ އަށް ކުޅެމުން އަންނަ ޕޯޗުގަލްގެ ވިޓީނިއާއާ ވާދަކޮށެެވެ.
ޑެމްބެލޭ ވަނީ މިދިޔަ ސީޒަންގައި ޕީއެސްޖީ އާއެކު ގިނަ ކާމިޔާބީތަކެއް ހޯދުމުގެ އިތުރުން، އެ ޓީމުގައި މޮޅު ކުޅުމެއް ދައްކައިފަ އެވެ. އެގޮތުން އޭނާ ވަނީ ޕީއެސްޖީ އާއެކު ފްރާންސް ލީގުގެ އިތުރުން، ފްރާންސް ކަޕް، ޓްރޮފީ ޑީ ޗެމްޕިއަންސް އަދި ޔުއެފާ ޗެމްޕިއަންސް ލީގު ކާމިޔާބު ކޮށްފަ އެވެ.
ޕީއެސްޖީ އިން އެ ކުލަބުގެ ތާރީޚުގައި ފުރަތަމަ ފަހަރަށް ޗެމްޕިއަންސް ލީގު ކާމިޔާބު ކުރިއިރު، ޑެމްބެލޭ ވަނީ އެކަމުގައި މުހިންމު ދައުރެއް އަދާ ކޮށްފަ އެވެ. މިދިޔަ ސީޒަންގައި ޑެމްބެލޭ ވަނީ ޕީއެސްޖީ އަށް ކުޅެދިން 53 މެޗުގައި 35 ލަނޑު ޖަހައިފަ އެވެ.
ބެލެންޑިއޯ އެވޯޑު ކާމިޔާބު ކުރުމަށް ފަހު ޑެމްބެލޭ ވަނީ އޭނާގެ މަންމަ އަށް ޚާއްސަ ޝުކުރެއް އަދާ ކޮށްފަ އެވެ. އެގޮތުން ޑެމްބެލޭ ބުނެފައި ވަނީ، ކޮންމެ ވަގުތެއްގައި ވެސް އޭނާއާ އެކު ހުރީ އޭނާގެ މަންމަ ކަމަށާއި، މަންމަ އަބަދު ވެސް އޭނާ އަށް ހިތްވަރު ދީފައިވާ ކަމަށެވެ.
މީގެ އިތުރުން ބެލެންޑިއޯ އެވޯޑުގެ އެންމެ ޒުވާން ކުޅުންތެރިޔަކަށް ހޮވުނީ ބާސެލޯނާގެ ޔަމާލް އެވެ. އެންމެ މޮޅު ގޯލު ކީޕަރަކަށް ހޮވުނީ ދާދި ފަހުން ޕީއެސްޖީ ދޫކޮށް މެންޗެސްޓަރ ސިޓީ އަށް ބަދަލުވި ޖިއާންލުއިޖީ ޑޮންނަރުންމާ އެވެ. އެންމެ މޮޅު ކޯޗަކަށް ހޮވުނީ ޕީއެސްޖީ އަށް އިރުޝާދު ދެމުން އަންނަ ލުއިސް އެންރީކޭ އެވެ.
