ބެލެންޑިއޯ އެވޯޑުގައި 100 ފަހަރު ވެސް ވޯޓު ދޭނީ މެސީ އަށް: ޒިދާން
10 ސެޕްޓެމްބަރު 2026 | ބުރާސްފަތި 07:46ޒިދާން ބުނީ މިއަހަރުގެ ބެލެންޑިއޯ އެވޯޑަށް ވޯޓު ދިނުމުގެ ފުރުސަތު އޭނާ އަށް ލިބިއްޖެ ނަމަ، އެހެން ހުރިހާ ކުޅުންތެރިންނަށް ވުރެ އިސްކަން ދޭނީ މެސީ އަށް ކަމަށް
އާޖެންޓީނާގެ ކެޕްޓަން މެސީ އާއި ފްރާންސްގެ ކޯޗު ޒިދާން | ރޮއިޓާސް
ފްރާންސް ފުޓުބޯޅަ އިން ދުނިޔޭގެ އެންމެ މޮޅު ކުޅުންތެރިޔާާ އަށް ދެމުން އަންނަ ބެލެންޑިއޯ އެވޯޑުގައި 100 ފަހަރު ވެސް ވޯޓު ލާނީ އާޖެންޓީނާގެ ކެޕްޓަން ލިއޮނަލް މެސީ އަށް ކަމަށް، ޒިނެދިން ޒިދާން ބުނެފި އެވެ.
ދާދި ފަހުން ފްރާންސް ޤައުމީ ޓީމުގެ ކޯޗުކަމާ ހަވާލުވި ޒިދާން މިހެން ބުނެފައި ވަނީ، ސްޕެއިންގެ މަޝްހޫރު ކުޅިވަރު ނޫސް "މާކާ" އަށް ދިން އިންޓަވިޔުއެއްގަ އެވެ. އެގޮތުން ޒިދާން ބުނީ، މިއަހަރުގެ ބެލެންޑިއޯ އެވޯޑަށް ވޯޓު ދިނުމުގެ ފުރުސަތު އޭނާ އަށް ލިބިއްޖެ ނަމަ، އެހެން ހުރިހާ ކުޅުންތެރިންނަށް ވުރެ އިސްކަން ދޭނީ މެސީ އަށް ކަމަށެވެ.
އެ މޭރުމުން ވާހަކަ ދައްކަމުން ޒިދާން ބުނީ، އޭނާ އަށް ފުރުސަތު ލިބިއްޖެ ނަމަ 100 ފަހަރު ވެސް ވޯޓު ދޭނީ މެސީ އަށް ކަމަށެވެ. ޒިދާންގެ ނަޒަރުގައި އުމުރުން 39 އަހަރުގައި ވެސް މެސީ ދައްކަމުންދާ ކުޅުމަކީ އާދައިގެ ކުޅުމެއް ނޫނެވެ. އޭނާ ފާހަގަކުރި ގޮތުގައި އެ އުމުރުގައި ވެސް ދުނިޔޭގެ އެންމެ މޮޅު ކުޅުންތެރިންގެ ތެރޭގައި މެސީ ހިމެނުމަކީ ކިހާ ވަރެއްގެ ކަމެއްކަން ގިނަ މީހުންނަށް ވަޒަން ނުކުރެވެނީ އެވެ. މިއީ މެސީގެ ހުނަރާއި ފެންވަރު ހުރި މިންވަރު ހާމަކޮށްދޭ ކަމެއްގެ ގޮތުގައި ޒިދާން ސިފަކުރި އެވެ.
މީގެ އިތުރުން، މެސީ އަދިވެސް އިތުރު ބެލެންްޑިއޯ އެވޯޑެއް ކާމިޔާބު ކުރުމަކީ ނުވާނެ ކަމެއްގެ ގޮތުގައި ދެކިގެން ނުވާނެ ކަމަށް ޒިދާން ބުނެފައިވެ އެވެ. އޭނާ ބުނި ގޮތުގައި ކުރިއަށް އޮތްތަނުގައި ވެސް މެސީ އެ އެވޯޑު ކާމިޔާބުކޮށްފި ނަމަ، އެއީ އޭނާ ހައިރާންވާނެ ކަމަކަށް ނުވާނެ އެވެ.
މެސީ އަކީ ބެލެންޑިއޯ އެވޯޑުގެ ތާރީޚުގައި ވެސް އެންމެ ގިނަ ފަހަރު އެ އެވޯޑު ކާމިޔާބުކޮށްފައިވާ ކުޅުންތެރިޔާ އެވެ. މެސީ ވަނީ މިހާތަނަށް އަށް ފަހަރެެއްގެ މަތިން ބެލެންޑިއޯ އެވޯޑު ކާމިޔާބު ކޮށްފައި އެވެ. އެގޮތުން މެސީ ވަނީ 2009، 2011، 2012، 2013، 2016، 2019، 2021، އަދި 2023 ވަނަ އަހަރު ބެލެންޑިއޯ އެވޯޑު ކާމިޔާބުކޮށްފަ އެވެ.
