އެސްޓަން ވިލާ ބަލިކޮށް، ޕީއެސްޖީ އިން ޔުއެފާ ސުޕަ ކަޕް ދިފާއުކޮށްފި

ޔުއެފާ ސުޕަ ކަޕްގައި އެސްޓަން ވިލާއާ ދެކޮޅަށް ކުޅުނު މެޗުން މޮޅުވެ، އެންމެ ފަހުގެ ޗެމްޕިއަން ޕެރިސް ސެއިންޓް ޖާމަން (ޕީއެސްޖީ) އިން މުބާރާތުގެ ތަށި ދިފާއު ކޮށްފި އެވެ.

ބުދަ ދުވަހުގެ ރޭ ދަންވަރު ކުޅުނު މެޗު ޕީއެސްޖީ އިން ކާމިޔާބު ކޮށްފައި ވަނީ 2-1 އިންނެވެ. މެޗުގައި ޕީއެސްޖީ އިން ލަނޑު ޖަހައި ލީޑު ނަގާފައި ވަނިކޮށް، އެސްޓަން ވިލާ އިން ނަތީޖާ ހަމަހަމަ ވެސް ކުރި އެވެ. ނަމަވެސް، ދެ ވަނަ ލަނޑެއް ޖަހައިގެން ޕީއެސްޖީ ވަނީ މެޗުން މޮޅުވެފައި އެވެ.

މެޗު ފަށައިގެން 20 ވަނަ މިނެޓުގައި ޕީއެސްޖީ އަށް ލީޑު ނަގައިދިނީ ކްވިޗާ ކްވަރެޝްކޭލިއާ އެވެ. އެ ލަނޑު ޖަހަން އޭނާ އަށް ފުރުސަތު ތަނަވަސްކޮށްދިނީ ޑެޒީރޭ ޑޫއޭ އެވެ. ނަމަވެސް، ފުރަތަމަ ހާފުގެ 45 ވަނަ މިނެޓުގައި ބްރަޔަން މަޑްޖޯ ވަނީ ލަނޑު ޖަހައި އެސްޓަން ވިލާ އަށް ނަތީޖާ ހަމަހަމަ ކޮށްދީފައި އެވެ. މެޗުން ޕީއެސްޖީ މޮޅުވެފައި ވަނީ 61 ވަނަ މިނެޓުގައި ޑޫއޭ ޖެހި ލަނޑުންނެވެ. އެއީ ފްރާންސްގެ އޮސްމާން ޑެމްބެލޭ ތަނަވަސްކޮށްދިން ފުރުސަތެއްގައި އޭނާ ޖެހި ލަނޑެކެވެ. 

މޮޅާ އެކު ޕީއެސްޖީ އިން ޔުއެފާ ސުޕަ ކަޕް ކާމިޔާބު ކުރިއިރު، މިދިޔަ އަހަރުގެ ފައިނަލްގައި އެ ޓީމުން ވަނީ ޓޮޓެންހަމް ބަލިކޮށްފައި އެވެ. އަނެއްކޮޅުން މިއީ ޕީއެސްޖީގެ ކޯޗުކަމާ ލުއިސް އެންރީކޭ ހަވާލުވި ފަހުން، އެ ޓީމުން ކާމިޔާބު ކުރި 13 ވަނަ ތައްޓެވެ.