ނިއު ރޭޑިއަންޓަށް ފުރަތަމަ ޑިވިޝަން އިން ޖާގަ ދޭން އެފްއޭއެމް އިން ނިންމައިފި

ނިއު ރޭޑިއަންޓް ސްޕޯޓްސް ކުލަބަށް އަލުން ފުރަތަމަ ޑިވިޝަން އިން ޖާގަ ދިނުމަށް، ފުޓުބޯޅަ އެސޯސިއޭޝަން އޮފް މޯލްޑިވްސް (އެފްއޭއެމް) އިން ނިންމައިފި އެވެ.

އެފްއޭއެމްގެ ހިންގާ ކޮމެޓީ އިން އާދީއްތަ ދުވަހު ބޭއްވި ބައްދަލުވުމުގައި ނިންމާފައި ވަނީ ނިއު ރޭޑިއަންޓަށް ފުރަތަމަ ޑިވިޝަންގެ ޖާގަ ދިނުމަށެވެ.

އެގޮތުން 2025/2026 ވަނަ އަހަރުގެ ދިވެހި ޕްރިމިއާ ލީގުގެ ޤަވާއިދުގެ ދެ ވަނަ ނަންބަރާއި، އެ ޤަވާއިދުގެ 12.2 ވަނަ ނަންބަރުގައި ބަޔާން ކޮށްފައިވާ ޙާލަތު ދިމާވެފައިވާތީ، އެ ޤަވާއިދު ބަޔާން ކުރާ ގޮތުން މުބާރާތުން ވަކިވާ ކުލަބު ނިސްބަތްވާ ރީޖަނަލް ލީގުގެ ދެން އެންމެ ނަތީޖާ ރަނގަޅު ކުލަބަކަށް ފުރުސަތު ދިނުމާ މެދު އެފްއޭއެމް އިން ގޮތެއް ނިންމަމް ލާޒިމު ކުރެ އެވެ.

އެފްއޭއެމް އިން ބުނެފައި ވަނީ 2023 ވަނަ އަހަރުގެ ދެ ވަނަ ޑިވިޝަންގެ ޗެމްޕިއަން ޓީމު އަދި ރަނައަޕް ޓީމު ދިވެހި ޕްރިމިއާ ލީގަށް ކޮލިފައިވެފައިވާތީ، އެ މުބާރާތުގެ ދެން އެންމެ ރަނގަޅު ނަތީޖާ ނެރެފައިވާ ޓީމަށް ފުރުސަތު ދޭން ނިންމާފައިވާ ކަމަށެވެ.

އެގޮތުން އެ މުބާރާތުގެ ސެމީ ފައިނަލްގައި ވާދަކޮށްފައިވާ ނިއު ރޭޑިއަންޓާއި، ޓެންޓް ސްޕޯޓްސް ކުލަބުން ނެރެފައިވާ ނަތީޖާތަކަށް ބިނާކޮށް، އެފްއޭއެމްގެ ކޮމްޕެޓިޝަން ކޮމެޓީ އިން، ސްޕޯޓްސް ކްރައިޓީރިއާ އަށް ބެލުމަށް ފަހު ނިއު ރޭޑިއަންޓަށް އެ ފުރުސަތު ދިނުމަށް އެފްއޭއެމް އިން ވަނީ ނިންމައިފަ އެވެ.

ނިއު ރޭޑިއަންޓަށް ދިވެހި ޕްރިމިއާ ލީގުގެ ފުރުސަތު ދިނުމަށް އެފްއޭއެމް އިން ނިންމާފައި ވަނީ، ފުރަތަމަ ޑިވިޝަންގައި ވާދަ ކުރަމުން އައި ސުޕަ ޔުނައިޓެޑު ސްޕޯޓްސް (ސަސް) މުބާރާތުން ވަކިވާން ނިންމުމުންނެވެ. ސަސް އިން އެ ނިންމުން ނިންމާފައި ވަނީ، އެ ކުލަބުގެ މާލީ ޙާލަތު ދަށްވެފައިވާތީ އެވެ.

ނިއު ރޭޑިއަންޓަށް އަލުން ފުރަތަމަ ޑިވިޝަންގެ ޖާގަ ދިނުމަށް އެފްއޭއެމް އިން ނިންމާފައިވާއިރު، ނިއު ރޭޑިއަންޓުގެ އައު މެނޭޖުމަންޓުގެ އެންމެ ބޮޑު ވައުދަކީ ވެސް އެ ކުލަބު ފުރަތަމަ ޑިވިޝަން އަށް ގެނައުމެވެ.

އެގޮތުން ނިއު ރޭޑިއަންޓުގެ އައު ޗެއާމަންކަމާ ހަވާލުވެ ވަޑައިގެންނެވި އަޙުމަދު މުބީން އާއި އޭނާގެ ޓީމުން ވަނީ އެ ކުލަބު ވަރުގަދަ ކުރުމަށް މަސައްކަތް ކޮށްފަ އެވެ. އެ މަސައްކަތުގެ ތެރެއިން ނިއު ރޭޑިއަންޓުން ވަނީ ރާއްޖޭގެ ތަޖުރިބާ ހުރި ގިނަ ކުޅުންތެރިން ތަކެއް އެ ކުލަބަށް ގެނެސްފަ އެވެ.

އެގޮތުން ނިއު ރޭޑިއަންޓުގެ ކޯޗަކަށް ހަމަޖައްސާފައި ވަނީ ދާދި ފަހުން ރާއްޖޭގެ ސީނިއާ ޤައުމީ ޓީމުގެ ކޯޗަކަށް ހުރި ތަޖުރިބާ ކާރު ކޯޗު އަލީ ސުޒޭން އެވެ. އޭގެ އިތުރުން ރާއްޖޭގައި އުފެދުނު އެންމެ މޮޅު ފުޓުބޯޅަ ކުޅުންތެރިޔާ އަލީ އަޝްފާގު (ދަގަނޑޭ) އަދި ޤައުމީ ޓީމުގެ ފޯވާޑު އަލީ ފާޞިރު (ސެންޓޭ) ވެސް ވަނީ ނިއު ރޭޑިއަންޓަށް ގެނެސްފަ އެވެ.

އެފްއޭއެމް އިން ނިއު ރޭޑިއަންޓް ސަސްޕެންޑު ކޮށްފައި ވަނީ، އެފްއޭއެމްގެ ކުރީގެ ރައީސް ބައްސާމް އަދީލް ޖަލީލްގެ ދައުރުގެ ތެރޭގަ އެވެ. އެފްއޭއެމް އިން އޭރު ނިއު ރޭޑިއަންޓް ސަސްޕެންޑު ކޮށްފައި ވަނީ އެ ޓީމަށް ކުޅުނު ބައެއް ކުޅުންތެރިންނަށް ދޭން ޖެހުނު މުސާރަައިގެ މައްސަލަގައިގަ އެވެ. ނަމަވެސް އޭރު ވެސް ނިއު ރޭޑިއަންޓުގެ ވެރިން އަދި ސަޕޯޓަރުން ވެސް ބުނަމުން ދިޔައީ އެ ކުލަބަށް ދީފައި ވަނީ ނުހައްގު ސަސްޕެންޝަނެއް ކަމަށެވެ.