ޑޯރީގެ ހެޓްރިކާއެކު، ބުރު އަތުން ނިއު ރޭޑިއަންޓަށް ބޮޑު މޮޅެއް

މިހާރު ކުރިއަށްދާ ކަޕް ވިނާސް ކަޕްގައި ބުރު ސްޕޯޓްސް ކުލަބާ ދެކޮޅަށް ކުޅުނު ފުރަތަމަ މެޗުން، ނިއު ރޭޑިއަންޓް ސްޕޯޓްސް ކުލަބުން ބޮޑު މޮޅެއް ހޯދައިފި އެވެ.

ހޯމަ ދުވަހުގަ ހަވީރު ގަލޮޅު ރަސްމީ ދަނޑުގައި ކުޅުނު މެޗު ނިއު ރޭޑިއަންޓް އިން ކާމިޔާބު ކުރީ 5-0 އިންނެވެ. މެޗުގެ ފުރަތަމަ ހާފުގައި ނިއު ރޭޑިއަންޓް އިން އެއް ލަނޑު ޖެހިއިރު، އަނެއް ހަތަރު ލަނޑު އެ ޓީމުން ޖެހީ ދެ ވަނަ ހާފުގައި އެވެ.

މެޗު ފަށައިގެން ފުރަތަމަ މިނެޓުގައި ނިއު ރޭޑިއަންޓް އިން ވަނީ ބުރު ކޮޅަށް ލަނޑު ޖަހައި ލީޑު ނަގައިފަ އެވެ. އެ ލަނޑު ނިއު ރޭޑިއަންޓަށް ޖަހައިދިނީ ބްރެޒިލްގެ ޑޮރިއެލްޓަން ގޯމޭޒް ނަސިމެންޓޯ (ޑޯރީ) އެވެ. އޭގެ ފަހުން މެޗުގެ ދެ ވަނަ ހާފުގެ 60 ވަނަ މިނެޓުގައި ޑޯރީ ވަނީ ދެ ވަނަ ލަނޑެއް ޖަހައި ލީޑު ފުޅާ ކޮށްފައި އެވެ. 

ދެ ވަނަ ލަނޑެއް ޖެހިތާ ތިން މިނެޓު ފަހުން ޑޯރީ ވަނީ ތިން ވަނަ ލަނޑެއް ވެސް ޖަހައި މެޗުގައި އޭނާގެ ހެޓްރިކް ހަމަކޮށްފައި އެވެ. ނިއު ރޭޑިއަންޓް އިން ރަނގަޅަށް ކުޅުނު މެޗުގެ 68 ވަނަ މިނެޓުގައި އެ ޓީމުގެ ހަތަރު ވަނަ ލަނޑު ޖެހީ އަލީ ފާސިރު (ސެންޓޭ) އެވެ. އަދި މެޗުގައި ނިއު ރޭޑިއަންޓްގެ ފަސް ވަނަ ލަނޑު ޖެހީ ލައިބީރިއާގެ ޢަބްދުﷲ ބިލިޓީ އެވެ. 

ބުރު އަތުން ބޮޑު މޮޅެއް ހޯދައި ނިއު ރޭޑިއަންޓް އިން އެ ޓީމުގެ ފެށުން ރަނގަޅު ކޮށްފައިވާއިރު، މުބާރާތުގައި ނިއު ރޭޑިއަންޓްގެ ދެ ވަނަ މެޗުގައި ކުޅޭނީ އޮޑި ސްޕޯޓްސް ކުލަބާ ދެކޮޅަށެވެ. މިފަހަރުގެ ފުޓުބޯޅަ ސީޒަން ފެށިއިރު، ނިއު ރޭޑިއަންޓް އިން ވަނީ އެ ޓީމުގެ ސްކޮޑު ވަރަށް ބޮޑަށް ވަރުގަދަކޮށްފައި އެވެ.