ކޮޅުފުށީގެ 100 ހައުސިންގ ޔުނިޓުތައް ނިންމައި ހަވާލުކުރި ފަހުން 4 މަސް، ފެނާއި، ކަރަންޓު އަދި ނަރުދަމާ ގުޅޭނެ ދުވަހެއް ނޭނގޭ
އެ މަސައްކަތް ފެނަކަ ކޯޕްރޭޝަންއާ ހަވާލު ކުރުމަށް އެންވަޔަރަމެންޓް މިނިސްޓްރީން ދަނީ މަސައްކަތް ކުރަމުން
ރައްޔިތުން މަޖިލީހުގައި ހައުސިން އަދި ކޮންސްޓްރަކްޝަން މިނިސްޓަރު ޑރ. އަބްދުﷲ މުއްތަލިބު ވާހަކަދައްކަވަނީ
މ.ކޮޅުފުށީގައި އިމާރާތް ކުރި 100 ހައުސިންގ ޔުނިޓުތައް ނިންމައި ހަވާލުކުރި ނަމަވެސް އެ ޔުނިޓްކަށް ފެނާއި، ކަރަންޓު އަދި ނަރުދަމާ ގުޅޭނެ ދުވަހެއް ނޭނގޭ ކަމަށް ކޮންސްޓްރަކްޝަން އެންޑް ހައުސިންގ މިނިސްޓަރު ޑރ. އަބްދުﷲ މުއްތަލިބު ވިދާޅުވެއްޖެއެވެ.
ބުދަ ދުވަހު ރައްޔިތުން މަޖިލީހުގެ ޖަލްސާގައި މުލަކު ދާއިރާގެ މެންބަރު އިބްރާހިމް ނައުފަލް ވަނީ މ.ކޮޅުފުށީގައި އިމާރާތް ކޮށްފައިވާ 100 ހައުސިން ޔުނިޓްތައް ނިމިފައިވާކަން ފާހަގަކުރައްވާފައެވެ. ފެބްރުއަރީ މަހުގެ ތެރޭގައި އެއްކޮށް މަސައްކަތް ނިމިފައިވާއިރު، ފެނާއި، ކަރަންޓު އަދި ނަރުދަމާ ގުޅޭނެ އެއްވެސް ގޮތެއް ނެތުމުގެ ސަބަބުން ހަތަރު މަސްވެގެން ދިޔައިރު ވެސް ރައްޔިތުންނާ ހަވާލުނުކުރެވިފައިވާތީ، އެ މަސައްކަތް ކުރެވޭނެ ދުވަހަކާ ގުޅޭގޮތުން މެންބަރު ނައުފަލް ސުވާލުކުރެއްވިއެވެ.
މިސުވާލުތަކަށް މިނިސްޓަރު މުއްތަލިބު ވިދާޅުވީ ކޮޅުފުށީގައި އިމާރާތް ކުރި، 100 ހައުސިންގ ޔުނިޓުގެ މަސައްކަތް އެއްކޮށް ނިންމައި، ހަވާލުކޮށްފައިވާ ކަމަށެވެ. އެ ހައުސިން ޔުނިޓްތައް ހަވާލުނުކުރެވެނީ ފެނާއި، ކަރަންޓު އަދި ނަރުދަމާ ނުގުޅޭތީ ކަމަށާއި، އެ މަސައްކަތް ފެނަކަ ކޯޕްރޭޝަންއާ ހަވާލު ކުރުމަށް އެންވަޔަރަމެންޓް މިނިސްޓްރީން މަސައްކަތް ކުރަމުންދާ ކަމަށެވެ.
މަޝްރޫއު އަޅުގަނޑުމެން ނިންމާފައި ކޮންޓްރެކްޓަރ އަޅުގަނޑުމެންނާ ހަވާލުކޮށްފައިވަނީ. އެގެތަކަށް މީހުންނަށް ނުވަދެވި ވަނީ ފެނާއި ނަރުދަމާގެ ޚިދުމަތްތައް ފޯރުކޮށް ނުދެވޭތީ. ކުރީގެ ހައުސިން މިނިސްޓްރީން އޭރުގެ އެންވަޔަރަމެންޓް މިނިސްޓްރީއާ ގުޅިގެން ކުރިއަށް ގެންދިއުމަށް ނިންމާފައި. ކުރިން ވެސް އަޅުގަނޑު ދެންނެވިން ކޮންސްޓްރަކްޝަން މިނިސްޓްރީން ކުރިއަށް ގެންދަނީ މުޅި ރަށުގައި ހިންގާ ބޮޑު މަޝްރޫއެއް ވެއްޖެއްޔާމުން. އަލަށް އާބާދުވާ ސަރަހައްދުތައް ނުވަތަ ނުގުޅާ ހުންނަ ސަރަހައްދުތަކަށްވެއްޖެއްޔާ އެ ކުރިއަށް ގެންދަނީ އެންވަޔަރަމެންޓް މިނިސްޓްރީގެ ތެރެއިން އޮޕަރޭޭޓަރާ ގުޅިގެން. އެންވަޔަރަމެންޓް މިނިސްޓްރީން މިހާރު އެ މަސައްކަތްތަކެއް އެބަކުރޭ ފެނަކައިން އެ މަސައްކަތް ހަވާލު ކުރުމަށްޓަކައި. މާލަސްތަކެއް ނުވެ ކުރިއަށް ގެންދާނެކޮންސްޓްރަކްޝަން އެންޑް ހައުސިންގ މިނިސްޓަރު ޑރ. އަބްދުﷲ މުއްތަލިބު
މިނިސްޓަރު މުއްތަލިބު ވިދާޅުވީ ހައުސިން ޔުނިޓްތަކުގެ އެއްބަސްވުން ހެދުމުގެ މަސައްކަތް ހައުސިންގ ޑިވަލޮޕްމަންޓް ފައިނޭންސް ކޯޕަރޭޝަން (އެޗްޑީއެފްސީ)އާއެކު ކުރިއަށް ގެންދާ ކަމަށެވެ.
ހަމައެއާއެކު ދަންނަވާލަން 100 ގޯތީގެ އެގްރިމެންޓް ހެދުމުގެ މަސައްކަތް މިހާރު އެޗްޑީއެފްސީއާއެކު އެބަ ކުރިއަށް ގެންދަން. ރައީސުލްޖުމްހޫރިއްޔާ ވަނީ މިހާރު ނިންމަވާފައި އެމްޑީޕީގެ ސަރުކާރުގައި އެގްރިމެންޓް ހަދާފައި ހުރި 5000 ރުފިޔާއަށް މަހަކު ދައްކަން ޖެހޭ ގޮތަކަށް އެގޭތަކުގެ ވެރިން. ރައީސުލްޖުމްހޫރިއްޔާ ނިންމަވާފައި ވަނީ އެހެންތަންތަނުގެ ސޯޝަލް ހައުސިން ނަންގަވާ އުސޫލުން 3333 ރުފިޔާއަށް މަހު ކުލި ކުޑަ ކުރުމަށް. އެއާއެކު މިހާރު ރައްޔިތުންނާއެކު އެގްރިމެންޓް ހެދުމުގެ މަސައްކަތް އެގެތަކުގެ ވެރިންނާއެކު އެގްރިމެންޓް ހެދުމުގެ މަސައްކަތް ކުރިއަށް ގެންދާނަން.ކޮންސްޓްރަކްޝަން އެންޑް ހައުސިންގ މިނިސްޓަރު ޑރ. އަބްދުﷲ މުއްތަލިބު
ކުރީގެ ރައީސް އިބްރާހިމް މުހައްމަދު ސާލިހުގެ ސަރުކާރުގައި ކުރިއަށް ގެންދިޔަ މި މަޝްރޫއުގެ ހައުސިންގ ޔުނިޓެއްގައި ހިމެނެނީ 3 ކޮޓަރި، 3 ފާޚާނާ، ސިޓިންގ ރޫމް، ބަދިގެ، ކާގެ، ލޯންޑަރީ އަދި ސްޓޯރ ރޫމެވެ.
މި މަޝްރޫއަށް ހަރަދުކޮށްފައިވަނީ ދިވެހި ސަރުކާރުން ޕީއެސްއައިޕީގެ ބަޖެޓުންނެވެ.
