ޔޫއޭއީގެ މަތިންދާބޯޓެއް ހައިޖެކުކޮށްފައިވާ ކަމަށް ދައްކައިގެން އީރާން ހަނގުރާމަ ފުޅާކުރަން ނަތަންޔާހޫ ރޭވި: ރިޕޯޓު
2 އޮކްޓޯބަރު 2026 | ހުކުރު 05:14ދުބާއީން ތެލް އަވީވަށް ދަތުރުކުރި ފްލައިދުބާއީގެ ބޯޓެއްގައި ހިނގި ހާދިސާއަކީ އީރާނުގެ ބޮލުގައި އިލްޒާމް އެޅުވުމަށް އިސްރާއީލުން ރޭވި ކަމެއް ކަމަށް ތުހުމަތުކޮށްފި. މި ރޭވުމުގެ ބޭނުމަކީ އީރާނާ ދެކޮޅަށް އެމެރިކާއިން ކުރާ ހަނގުރާމަ ފުޅާކުރުން ކަމަށް ބުނާއިރު، މި ހާދިސާއާ ގުޅިގެން ފްލައިދުބާއީން ވަނީ އިސްރާއީލަށް ކުރާ ދަތުރުތައް ވަގުތީ ގޮތުން މެދުކަނޑާލާފައި
ފްލައިދުބާއީގެ ބޯޓެއް އިސްރާއީލުގެ ތެލް އަވީވްގެ ބެން ގޫރިއަން އެއާޕޯޓަށް ޖައްސާފައި | ގެޓީ އިމޭޖަސް
އީރާނާ ދެކޮޅަށް އެމެރިކާއިން ކުރަމުންދާ ހަނގުރާމަ ފުޅާކުރަން މަޖުބޫރުކުރުވުމުގެ ގޮތުން، ޔުނައިޓެޑް އެރެބް އެމިރޭޓްސްގެ (ޔޫއޭއީ) މަތިންދާބޯޓެއް ހައިޖެކުކޮށްފައިވާ ކަމަށް އޮޅުވާލައިގެން ދެއްކުމަށް 'ފޯލްސް ފްލެގް' އޮޕަރޭޝަނެއް ހިންގަން އިސްރާއީލުގެ ބޮޑުވަޒީރު ބެންޖަމިން ނަތަންޔާހޫ ރޭވި ކަމަށް އީރާނުގެ ޕްރެސް ޓީވީން ރިޕޯޓުކޮށްފި އެވެ.
ޕްރެސް ޓީވީން ރިޕޯޓުކޮށްފައިވާ ގޮތުގައި، މި ކަމުގެ މައުލޫމާތު އެ ޓީވީއާ ހިއްސާކޮށްފައި ވަނީ ނަތަންޔާހޫގެ ސިއްރު ރޭވުންތަކުގެ މައުލޫމާތު އިނގޭ "ސަރަހައްދީ ގައުމެއްގެ މަސްދަރެއް" ކަމަށެވެ. ބުދަ ދުވަހު، ދުބާއީން ފުރައިގެން ތެލް އަވީވަށް ދަތުރުކުރި މަތިންދާބޯޓެއްގެ ފްލައިޓް ޑެކުގައި "ހާދިސާއެއް" ހިނގައި، އެ ބޯޓު ސައުދީ އަަރަބިއްޔާއަށް ޑައިވާޓުކުރި ހާދިސާއަކީ، މި ރޭވުންތަކުގެ ދަށުން ހިންގާފައިވާ ހާދިސާއެއް ކަމަށް، ނަން ހާމަކޮށްފައި ނުވާ އެ މަސްދަރާ ހަވާލާދީ ޕްރެސް ޓީވީން ރިޕޯޓުކުރި އެވެ. އަދި، އެ ހާދިސާ ހިނގުމުގެ ތިން ދުވަސް ކުރިން ނަތަންޔާހޫ ސިއްރުން ޔޫއޭއީއަށް ދަތުރުކޮށް، މި އޮޕަރޭޝަން ހިންގުމާ ގުޅޭ ގޮތުން ޔޫއޭއީގެ އޮފިޝަލުންނާ މަޝްވަރާކޮށް، ގޮތް ނިންމާފައިވާ ކަމަށް ވެސް "މައުލޫމާތު އިނގޭ" މަސްދަރާ ހަވާލާދީ ޕްރެސް ޓީވީން ތުހުމަތުކުރި އެވެ.
ޔޫއޭއީއަށް ނަތަންޔާހޫ ކުރި ދަތުރުގައި އޭނާއާއެކު އިސްރާއީލުގެ ޖާސޫސީ އިދާރާގެ އޮފިޝަލުން ބައިވެރިވި ކަމަށާއި، އެ ބައްދަލުވުންތަކުގައި ބައެއް އަރަބި ގައުމުތަކުގެ އޮފިޝަލުން ބައިވެރިވި ކަމަށް ވެސް އެ މަސްދަރުން ބުނެފައިވެ އެވެ. އަދި، މި މަޝްވަރާތަކުގެ މަގުސަދަކީ، މަތިންދާބޯޓެއް ހައިޖެކުކުރުމަށް 'ފޯލްސް ފްލެގް' ނުވަތަ އޮޅުވާލުމުގެ އޮޕަރޭޝަނެއް ހިންގައި، އޭގެ އިލްޒާމް އީރާނުގެ ބޮލުގައި އެޅުމުން ކަމަށް ވެސް އެ މަސްދަރުން ތުހުމަތުކުރެ އެވެ.
މި ރޭވުންތަކުގެ ހަގީގީ މަގުސަދަކީ، އީރާނާ ދެކޮޅަށް އެމެރިކާގެ ރަައީސް ޑޮނަލްޑް ޓްރަމްޕް ފަށްޓަވާފައިވާ ހަނގުރާމަ އިތުރަށް ފުޅާކުރުން ކަމަށް ވެސް އެ މަސްދަރުން ބުނެފައިވެ އެވެ. މިއީ، އިސްރާއީލުގެ ގާނޫނުހަދާ މަޖިލީހުގެ އިންތިޚާބާ ގުޅުވައި، ސިޔާސީ ގޮތުން ތާއީދު އިތުރުކުރުމަށް ނަތަންޔާހޫ ރާވާފައިވާ ރޭވުމެއް ކަމަށް ވެސް އެ މަސްދަރުން ބުނެފައިވެ އެވެ. އިންތިޚާބުގައި ވެރިކަންކުރާ އިއްތިހާދަށް ނާކާމިޔާބީއާ ކުރިމަތިލާންޖެހިދާނެ ކަމުގެ ކަންބޮޑުވުން ނަތަންޔާހޫއަށް އޮތް ކަމަށް މަސްރަހު ދިރާސާކުރާ ފަރާތްތަކުން ބުނެފައިވާ ކަން ފާހަގަކުރަން ޖެހެ އެވެ.
މަތިންދާބޯޓެއް ހައިޖެކުކޮށްފައިވާ ކަމަށް ދައްކައި، އެ ކަމުގެ އިލްޒާމު އީރާންގެ ބޮލުގައި އެޅުވުމަށް ނަތަންޔާހޫ ރޭވި ރޭވުމުގެ މައުލޫމާތު ޕްރެސް ޓީވީއާ ހިއްސާކުރި މަސްދަރުގެ ނަން އެ ޓީވީން ހާމަކޮށްފައެއް ނުވެ އެވެ. އަދި، އެ މަސްދަރާ ހަވާލާދީ ޕްރެސް ޓީވީން ކޮށްފައިވާ ތުހުމަތުތަކަށް ޔޫއޭއީއާއި އިސްރާއީލުގެ އިތުރުން އެމެރިކާއިން ވެސް ރައްދު ދީފައެއް ނުވެ އެވެ.
މި ތުހުމަތުތައް ފެންމަތިވެފައި ވަނީ، ދުބާއީއިން ފުރައިގެން 174 ފަސިންޖަރުންނާއެކު ތެލް އަވީވަށް ދަތުރުކުރި ފްލައިދުބާއީގެ ފްލައިޓް އެފްޒެޑް1073، ސައުދީ އަރަބިއްޔާގެ ތަބޫކްގައި އޮންނަ އަމީރު ސުލްޠާން ބިން ޢަބްދުލްޢަޒީޒް އިންޓަނޭޝަނަލް އެއާޕޯޓަށް އިމަޖެންސީގައި ޖެއްސިތާ އެއް ދުވަސް ފަހުންނެވެ. ފްލައިދުބާއީއިން ބުދަ ދުވަހު ބުނީ، "ފްލައިޓް ޑެކްގައި ހަމަނުޖެހުމެއް ހިނގި" ކަމަށާއި، ބޯޓު ސަލާމަތްތެރިކަމާއެކު ސައުދީ އަރަބިއްޔާއަށް ޑައިވާޓު ކުރުމުގެ ކުރިން ފަޅުވެރިން ބޯޓު ކޮންޓްރޯލްކޮށް ރައްކާތެރިކުރި ކަމަށެވެ.
ސައުދީގެ އެއާޕޯޓް އޮތޯރިޓީތަކުން ބުނީ ކެޕްޓަނާއި ފަސްޓް އޮފިސަރަށް އަނިޔާވެގެން ހަސްފަތާލަށް ގެންދެވުނު ކަމަށެވެ. ނަމަވެސް، ހުރިހާ ފަސިންޖަރުންނާއި ފަޅުވެރިން ސަލާމަތުން ތިބިކަމަށް ރިޕޯޓުކޮށްފައިވެ އެވެ. މިއާއެކު، ސައުދީ އަރަބިއްޔާގެ ނޭޝަނަލް ޓްރާންސްޕޯޓް ސޭފްޓީ ސެންޓަރުން ވަނީ މި ހާދިސާގެ ތަހުގީގެއް ފަށާފަ އެވެ.
ފަހުން ފްލައިދުބާއީއިން ވަނީ، ތަހުގީގު ކުރިއަށްދާ މުއްދަތުގައި އިސްރާއީލަށް ކުރާ ދަތުރުތައް ވަގުތީ ގޮތުން މެދުކަނޑާލާނެކަން އިއުލާންކޮށްފަ އެވެ. ކަމާބެހޭ ފަރާތްތަކަށް "މި ހާދިސާއާ ގުޅޭ ހުރިހާ ހަގީގަތްތަކެއް ކަށަވަރުކުރުމަށް" މި ފިޔަވަޅުގެ ސަބަބުން ފުރުސަތު ލިބިގެންދާނެ ކަމަށް އެ ކުންފުނިން ބުނެ އެވެ. އެ މަތިންދާބޯޓުގައި ތިބި ފަސިންޖަރުންނަކީ އިސްރާއީލުގެ ރައްޔިތުންނެވެ.
މަސްދަރު: އަނަދޮލު އޭޖެންސީ
