ގާނޫނާ ހިލާފަށް ވަކިކުރި ފަރެސްމާތޮޑާ އެއާޕޯޓުގެ މުވައްޒަފަކަށް އަލުން ވަޒީފާއާއި ގެއްލުމުގެ ބަދަލު ދޭން އަމުރުކޮށްފި

ރީޖަނަލް އެއާޕޯޓްސް ކޮމްޕެނީ ލިމިޓެޑް (އާރްއޭސީއެލް) އިން ހިންގަމުން އަންނަ ގދ. ފަރެސްމާތޮޑާ އެއާޕޯޓުގެ މުވައްޒަފަކު ގާނޫނާ ހިލާފަށް ވަޒީފާއިން ވަކިކުރި މައްސަލައިގައި، އޭނާއަށް އަލުން ވަޒީފާ ދިނުމަށާއި ގެއްލުމުގެ ބަދަލުގެ ގޮތުގައި 47,666.67 ރުފިޔާ ދެއްކުމަށް ވަޒީފާއާބެހޭ ޓްރައިބިއުނަލުން އަމުރުކޮށްފި އެވެ.

މި މައްސަލައަކީ 14 މާރިޗު 2023 އިން ފެށިގެން ފަރެސްމާތޮޑާ އެއާޕޯޓުގެ އެޑްމިނިސްޓްރޭޓިވް އޮފިސަރުގެ މަގާމު އަދާކުރަމުންދިޔަ ގދ. ފިޔޯރީއަށް ނިސްބަތްވާ މުވައްޒަފަކު، ސެޕްޓެންބަރު 2025 ގައި ވަޒީފާއިން ވަކިކުރުމުން އޭނާގެ ފަރާތުން ޓްރައިބިއުނަލަށް ހުށަހެޅި މައްސަލައެކެވެ.

Advertisement

އާރްއޭސީއެލްގެ ފަރާތުން އޭނާ ވަޒީފާއިން ވަކިކުރި ސަބަބެއްގެ ގޮތުގައި ބުނެފައިވަނީ، ކުންފުނީގެ އެޓެންޑެންސް ޕޮލިސީއާ ހިލާފުވުމާއި، ޑިއުޓީ ގަޑީގައި އާންމުކޮށް ބޭރުގައި އުޅުމާއި، މުހިންމު ބައްދަލުވުންތަކަށް ހާޒިރުނުވުމުގެ އިތުރުން ފޯޖުކޮށްފައިވާ މެޑިކަލް ސެޓްފިކެޓެއް ހުށަހަޅާފައިވާތީ ކަމަށެވެ. އަދި އެކި ފަހަރު މަތިން އިސްލާހީ ފިޔަވަޅުތައް އެޅުމުން ވެސް އެކަށީގެންވާ ބަދަލެއް އައިސްފައި ނުވާކަމަށް އެ ކުންފުނިން ފާހަގަކޮށްފައިވެ އެވެ.

ނަމަވެސް، މި މައްސަލަ ބެއްލެވި ވަޒީފާއާބެހޭ ޓްރައިބިއުނަލުގެ މެންބަރު އިޝާރާ އަބްދުލްއަޒީޒް މިދިޔަ ހޯމަ ދުވަހު ނިންމެވި ނިންމެވުމުގައި ވަނީ، އެ މުވައްޒަފު ވަޒީފާއިން ވަކިކޮށްފައިވަނީ ވަޒީފާއާބެހޭ ގާނޫނާ ހިލާފަށް، މައުޟޫއީ އަދުލުވެރިކަމާއި އިޖުރާއީ އަދުލުވެރިކަން ގާއިމުކުރުމެއް ނެތި ކަމަށެވެ.

މައްސަލަ ނިންމި ގޮތުގެ ރިޕޯޓުގައި ބަޔާންކޮށްފައިވާ ގޮތުގައި، މެޑިކަލް ސެޓްފިކެޓްގެ މައްސަލައިގައާއި ހާޒިރީގެ މައްސަލައިގައި އެ މުވައްޒަފަށް މީގެ ކުރިން އިންޒާރުދީ ފިޔަވަޅު އަޅާފައިވެ އެވެ. ނަމަވެސް، އޭގެ ފަހުން ވަޒީފާއިން ވަކިކުރުމާ ހަމައަށް އެފަދަ ކަމެއް ތަކުރާރުވިކަން ކުންފުންޏަށް ސާބިތުކޮށްދެވިފައެއް ނުވެ އެވެ. އަދި އެއް ކަމަކަށް ފިޔަވަޅު އެޅުމަށްފަހު، އަލުން އެކަމަކަށް ބިނާކޮށް އިތުރު ފިޔަވަޅެއްގެ ގޮތުން ވަޒީފާއިން ވަކިކުރެވިދާނެ އެއްވެސް ގާނޫނީ އަސާސެއް ނެތް ކަމަށް ވެސް ރިޕޯޓުގައި ފާހަގަކޮށްފައިވެ އެވެ. މީގެ އިތުރުން، އޭނާ ވަޒީފާއިން ވަކިކުރުމުގެ ކުރިން ޖަވާބުދާރީވުމުގެ ފުރުސަތު ދީފައި ނުވުމާއި، ގާނޫނުގައި ބަޔާންކުރާ ނޯޓިސް ދިނުމެއް ނެތި ވަކިކޮށްފައިވާކަން ވެސް ވަނީ ފާހަގަކޮށްފަ އެވެ.

އެހެންކަމުން، ވަޒީފާއާބެހޭ ޓްރައިބިއުނަލުން އަމުރުކޮށްފައިވަނީ އެ މުވައްޒަފަކީ އެއްވެސް ހާލެއްގައި ވަޒީފާއިން ވަކިވެފައިވާ މީހެއް ކަމުގައި ނުބަލައި، އޭނާ ކުރިން އަދާކުރަމުންދިޔަ އެޑްމިނިސްޓްރޭޓިވް އޮފިސަރުގެ މަގާމު އަލުން އިއާދަކޮށްދިނުމަށެވެ.

ހަމައެއާއެކު، އޭނާ ވަޒީފާއިން ވަކިކުރި 03 ސެޕްޓެންބަރު 2025 އިން ފެށިގެން، އާރްޑީސީގެ ވަޒީފާއާ ގުޅުނު 26 ޖަނަވަރީ 2026 އާ ހަމައަށް ހިނގި 04 މަހާއި 23 ދުވަހުގެ މުސާރައަށްވާ 47,666.67 (ސާޅީސް ހަތްހާސް ހަސަތޭކަ ފަސްދޮޅަސް ހައެއް ރުފިޔާ ފަސްދޮޅަސް ހަތް ލާރި) ގެއްލުމުގެ ބަދަލުގެ ގޮތުގައި އެ މުވައްޒަފަށް ދިނުމަށް އާރްއޭސީއެލްގެ މައްޗަށް ވަނީ އަމުރުކޮށްފަ އެވެ.