ދިވެހި ޒުވާނުންނަކީ ހުނަރުވެރި މަސައްކަތްތެރި ބަޔަކަށް ހެދުމަށްޓަކައި ސްކޫލްތަކުގެ ދަރިވަރުންނަށް އަމާޒުކޮށްގެން ކުރިއަށް ގެންދާ ދަސްވާރު ޕްރޮގްރާމްގެ ދަށުން މިދިޔަ އަހަރު އެކަނި ވެސް 1،000 އަށްވުރެ ގިނަ ކުދިން ވަޒީފާގެ ބާޒާރަށް ނިކުމެފައިވާ ކަމަށް ޑރ. ޢައިޝަތު ޝިހާމް ވިދާޅުވެއްޖެއެވެ.

ޑރ. ޢާއިޝަތު ޝިހާމް މިމޭރުމުން ވިދާޅުވީ މާލޭ ސަރަހައްދުގެ ސްކޫލްތަކުގައި މިދިޔަ އަހަރު ކުރިއަށް ގެންދިޔަ ދަސްވާރު ޕްރޮގްރާމްގެ ދަރިވަރުންނަށް ސަނަދު ދިނުމަށް ރޭ ޣިޔާސުއްދީން ސްކޫލްގައި ބޭއްވި ރަސްމިއްޔާތު ޝަރަފްވެރިކޮށްދެއްވާ ވާހަކަ ދައްކަވަމުންނެވެ.

ޑރ. ޢާއިޝަތު ޝިހާމް ވިދާޅިވީ ދަސްވާރު ޕްރޮގްރާމް ހިންގަން މިހާރު 231 ކުންފުންޏެއްގެ އެހީތެރިކަން ލިބޭ ކަމަށެވެ. އަދި މިދިޔަ އަހަރަށް ބެލި ނަމަވެސް ރާއްޖެތެރޭގެ ސްކޫލްތަކުން 800 އަށްވުރެ ގިނަ ދަރިވަރުން މިޕްރޮގްރާމް ފުރިހަަމަކުރި ކަމަށާއި މާލޭ ސަރަހައްދުގެ ސްކޫލްތަކާ އެކު 1،000 އަށްވުރެ ގިނަ ދަރިވަރުން ދަސްވާރު ޕްރޮގްރާމް ފުރިހަަމަކުރި ކަމަށެވެ.

މިނިސްޓަރު ވިދާޅުވީ މިޕްރޮގްރާމް މިހާތަނަށް ފުރިހަަމަކުރި ދަރިވަރުންގެ ތެރެއިން 80 އިންސައްތަ ދަރިވަރުން މިހާރު މަތީ ތައުލީމު ހާޞިލުކުރަމުން ގެންދާ ކަމަށެވެ. އަދި މިޕްރޮގްރާމް މިހާ ކާމިޔާބުކަމާ އެކު ކުރިއަށް ގެންދެވެނީ ބެލިނިވެރިން ދެމުން ގެންދާ ތަރުޙީބު ބޮޑުކަމުން ކަމަށް މިނިސްޓަރު ވިދާޅުވިއެވެ.

ދަސްވަރު ޕްރޮގުރާމް ނިންމާ ވަޒީފާގެ މާހައުލުގައި އުޅެމުންދާ ކުދިންނާ ބެހޭ ގޮތުން މިނިސްޓަރު ވިދާޅުވީ ދިވެހި ޒުވާނުންނަކީ ހުނަރުވެރި މަސައްކަތްތެރި ބައަކަށް ހެދުމަށްޓަކައި ސްކޫލްތަކުގެ ދަރިވަރުންނަށް އަމާޒުކޮށްގެން ކުރިއަށް ގެންދާ ދަސްވާރު ޕްރޮގްރާމް ފުރިހަަމަކޮށް މިހާރު ވެސް މަހަކު މުސާރައަށް 16،000ރ. ހޯދަމުން ގެންދާ ޒުވާނުން އެބަތިބި ކަމަށެވެ.

ޑރ. ޢާއިޝަތު ޝިހާމް ވިދާޅުވީ ކޮންމެ ކުއްޖަކީ ފޮތުން ކިޔަވަން މޮޅުވާނެ ކުއްޖެއް ނޫން ކަމަށާއި ފޮތުން ކިޔަވަން ނުވަތަ ސްކޫލުގައި ދެވޭ ޢާންމު ތައުލީމަށް މޮޅުވަން ހުރަސްއެޅޭ ގިނަ އަދަދެއްގެ ދަރިވަރުން ސްކޫލްތަކުގައި ތިބޭ ކަމަށެވެ. އަދި މިހާތަނަށް އެފަދަ ކުދިންނާ މެދު އަމަލުކުރަމުން އައި ގޮތުން އެފަދަ ދަރިވަރުން އައީ ބާކީވަމުން ކަމަށް މިނިސްޓަރު ވިދާޅުވިއެވެ.