ލޯކަލް ކައުންސިލްގެ އިންތިޚާބުގައި ވާދަ ނުކުރުމަށް އަދާލަތު ޕާޓީން ނިންމައިފި
އިންތިޚާބުގައި ވާދަ ނުކުރަން ނިންމާފައިވަނީ އަދާލަތު ޕާޓީގެ މަޝްވަރާ މަޖިލީހުން
އަދާލަތު ޕާޓީގެ ބައްދަލުވުން
ކުރިއަށް އޮތް ލޯކަލް ކައުންސިލްގެ އިންތިޚާބުގައި ވާދަ ނުކުރުމަށް އަދާލަތު ޕާޓީން ނިންމައިފިއެވެ.
އިންތިޚާބުގައި ވާދަ ނުކުރަން ނިންމާފައިވަނީ އަދާލަތު ޕާޓީގެ މަޝްވަރާ މަޖިލީހުންނެވެ.
ހޯމަ ދުވަހުގެ ރޭ އަދާލަތު ޕާޓީން އާންމު ކުރި ބަޔާނުގައި ވަނީ ދިވެހިރާއްޖޭގެ ގިނަ ޕާޓީ އެކުލެވޭ ސިޔާސީ ނިޒާމް ޚަރާބުކޮށް، ސަރުކާރު ހިންގާ ފަރާތަށް ލާބަހުރި ގޮތަކަށް މެނުވީ އިލެކްޝަނސް ކޮމިޝަނުން އެއްވެސް ފިޔަވަޅެއް އަޅަމުން ނުގެންދާ ކަމަށެވެ. އަދި 2017 ވަނަ އަހަރުގެ ލޯކަލް ކައުންސިލް އިންތިޚާބު އެޕްރީލް މަހުގެ 8 ވަނަ ދުވަހު ބޭއްވުމަށް އިއުލާންކޮށްފައިވަނީ ގާނޫނު އަސާސީގެ ދަށުން ލާޒިމް ކުރާ އިންތިޚާބް ބޭއްވުމުގެ ބަދަލުގައި ވަކި މީހަކު އަންގާ ބަޔަކަށް ކައުންސިލްތަކުގެ މަގާމު ހަވާލު ކުރުމަށް ދައްކާ ހުއްޖަތެއްގެ ގޮތުގައި ކަމަށް އަދާލަތު ޕާޓީގެ މަޝްވަރާ މަޖިލީހުގެ ނިންމުމުގައި ބުނެފައިވެއެވެ.
އަދާލަތު ޕާޓީން އިތުރަށް ބުނެފައިވަނީ ގާނޫނު އަސާސީ އާއި ގާނޫނުތަކުގައި ބަޔާންކޮށްފައިވާ ގޮތުގެމަތިން ކަނޑައެޅިފައިވާ ތާރީޚްގެ ކުރިން 2017 ވަނަ އަހަރުގެ ލޯކަލް ކައުންސިލްތަކުގެ އިންތިޚާބް ދިވެހި ރައްޔިތުންނަށް ފޯރުކޮށްދިނުމަށް އިލެކްޝަންސް ކޮމިޝަނުން ގަސްތުގައި އިހުމާލުވެފައިވާކަމަށެވެ. އަދި ގާނޫނީ ހަމަތަކުގެ މަތިން ބާޢްވަން ލާޒިމް ކުރާ ލޯކަލް ކައުންސިލް ތަކުގެ އިންތިޚާބް ދިވެހި ރައްޔިތުންގެ ކިބައިން ނިގުޅާއިގެންފައިވާތީ، އެޕްރީލް މަހު ބޭއްވުމަށް އިއުލާންކޮށްފައިވާ ލޯކަލް ކައުންސިލްތަކުގެ އިންތިޚާބުގައި ބައިވެރިވުމަކީ ނުހައްގުން ފޭރިގެންފައިވާ އިންތިޚާބެއްގައި ސައްޚާކަމުގެ ސިއްކަ ޖަހައިދިނުން ކަމުގައި އެ ޕާޓީއަށް ގަބޫލުކުރެވޭ ކަމަށެވެ.
އަދާލަތު ޕާޓީގެ މަޝްވަރާ މަޖިލީހުގެ ނިންމުމުގައި ބުނެފައިވަނީ، ދިވެހިރައްޔިތުންގެ ކިބައިން ނުހައްގުން އިންތިޚާބެއް ނިގުޅައިގަތުމަކީ ދިވެހި ރައްޔިތުންނާއި، ދިވެހި ދައިލަތާއި، ދިވެހިރަޢްޖޭގެ ގާނޫނު އަސާސީއާއި، ދެކޮޅަށް ހިންގޭ އިމެއްނެތް ބޭއިންސާފު ޖަރީމާއަކަށް ވާތީ މިއެންމެހައި، އަނިޔާވެރި، ގާނޫނާއި ޚިލާފު، ބޭއިންސާފު ޖަޜީމާތަކަށް، އިންކާރުކޮށް އިހުތިޖާޖުކުރުމުގެ ގޮތުން އިންތިހާބުގައި ވާދަނުކުރުމަށް ނިންމީކަމަށެވެ.
