"ޖާގަ ދެއްކުމަށް ފަހު ނޫނީ ސްޓިކަރ ނުޖަހާނެ" ކަމަށް ވިދާޅުވި ރައީސްގެ ވައުދު ބަދަލުވެ، ޖޫރިމަނާ ފީތަކުގެ ވެސް އަގު ބޮޑުކޮށްފި!

މާލެ ސަރަހައްދުގެ ޕާކު ކުރުމުގެ ދަތިކަމަކީ ޒަމާންތަކެއް ވަންދެން ދިވެހި ރައްޔިތުން، ޚާއްސަކޮށް ވެހިކަލް ދުއްވާ ފަރާތްތައް ތަހައްމަލުކުރަމުންދާ އަދި ދުވަހަކަށްވުރެ ދުވަހެއް ބޮޑުވަމުންދާ، ހައްލު ނުވެ އޮތް ބޮޑު މައްސަލައެކެވެ. މާލެ ސަރަހައްދުގައި ހިނގާބިނގާވެ އުޅޭ މީހުންނަށް އޮތް ޖާގައާއި މަގުތަކުގެ ޖުމްލަ ޖާގަތަކާ ނުބައްދަލު މިންވަރަކަށް އުޅަނދުފަހަރު އިތުރުވެފައިވާއިރު، ރަނގަޅު ނިޒާމެއްގެ ތެރެއިން ޕާކުކުރާނެ ޖާގައެއް ނެތުމަކީ ރައްޔިތުންގެ ދިރިއުޅުމަށް ނުހަނު ގިނަ ދަތިތަކެއް ކުރިމަތިވެފައިވާ ކަމެކެވެ. މަގުތައް ތުރާލަކަށްވެ، ހިނގާބިނގާވެ އުޅުމަށް ދަތިވެފައިވާ މި ދަނޑިވަޅުގައި، މިކަމަށް ދާއިމީ ހައްލެއް ހޯދައިދިނުމަކީ ކޮންމެ ސަރުކާރަކުން ވެސް އެންމެ އިސްކަންދޭންޖެހޭ ކަމެކެވެ.

މި މައްސަލައަށް ހައްލެއް ހޯދައިދޭނެ ކަމަށް ވައުދުވެވަޑައިގެން ރާއްޖޭގެ ވެރިކަމަށް މިހާރުގެ ރައީސް، ޑރ. މުހައްމަދު މުއިއްޒު ވަޑައިގަތްއިރު ރައްޔިތުންނަށް ދެއްވި އެންމެ ބޮޑު އެއް ޔަގީންކަމަކީ ޕާކު ކުރާނެ ޖާގަ ނުދައްކާ، ޕާކިންގ ފީތަކާ ޖޫރިމަނާތައް ނުނަންގަވާނެ ކަމުގެ ޔަގީންކަމެވެ. އެގޮތުން، ރައްޔިތުންނަށް އެކަށީގެންވާ ޕާކުކުރާނެ ޖާގަތަކާއި އިމާރާތްތައް ގާއިމުކޮށްދިނުމުގެ ކުރިން، މަގުތަކުގައި ޕާކުކުރާ އުޅަނދުތައް ޖޫރިމަނާކޮށް ސްޓިކަރ ނުޖަހާނެ ކަމަށް އެމަނިކުފާނު ވިދާޅުވީ އެއް ފަހަރަކު ދެ ފަހަރަކު ނޫނެވެ. އެތައް ފަހަރެއްގެ މަތިން އެ ވައުދު، މާލެ ސަރަހައްދުގައި ދިރިއުޅޭ ރައްޔިތުންނަށް ވެވަޑައިގަތެވެ. އޭގެ އިތުރުން، ކުރިން ނުޙައްގުން ޖޫރިމަނާކޮށްފައިވާ ފައިސާ މާފުކޮށްދެއްވާނެ ކަމަށް ވެސް ރައްޔިތުންނަށް ވައުދުވެވަޑައިގެންނެވި އެވެ.

މި ވައުދުތައް ފުއްދަވާނެ ކަމުގެ އިންތިޒާރުގައި ރައްޔިތުން ތިއްބާ މި ސަރުކާރުން ރައްޔިތުންގެ މޫނުމަތީގައި ވީއްލާލީ ބޮޑު އެތިފަހަރެކެވެ. ނުކުރާޏެ ކަމަށް ވިދާޅުވި ޖޫރިމަނާ ކުރަން ފެއްޓިއެވެ. ނުޖަހާނެ ކަމަށް ބުނި ސްޓިކާތަކުން ވެހިކަލްތައް ފުރަމުން ދިޔަ އެވެ. އެންމެފަހުން މިހާރު ނުނަގާނެ ކަމަށް ރައީސް ވިދާޅުވި ފީތައް ބޮޑުވެސް ކޮށްފި އެވެ. އެކަމަކު އެޅި ޕާކިންގ ބިލްޑިންގ އެއް ލޮލުން ދުށް މީހަކު ނެތެވެ. ޕާކު ކުރުމަށް ޚާއްސަކޮށް ކަނޑައެޅި ތަނެއް، ސަރަހައްދެއް ފެންނާކަށް ނެތެވެ. ރަނގަޅެވެ. ބޮޑުތަކުރުފާނު މަގުގައި ޕާކު ކުރަން ތަންކޮޅެއް ހަމަޖައްސައިދީފި އެވެ. އެކަމަކު އެއީ 500 ސައިކަލުގެ ޖާގައިގެ ޕާކިން ޒޯނެކެވެ. އެ ޒޯނަކީ ޕާކިންގ މައްސަލައިގެ ހުރިހާ ހައްލެއް ލިބޭ ތަނަކަށް ވީނަމަ ދެން އޯކޭ އެވެ. އެކަމަކު އެއީ ރައީސް އެ ވިދާޅުވި ޓޯޓަލް ސޮލިއުޝަން ނޫންކަން ހަމަބުއްދިން ވިސްނާ ކޮންމެ މީހަކަށް ވެސް އެނގޭނެ އެވެ.

އާންމުކޮށްފައިވާ އައު ޕާކިންގ ޖޫރިމަނާގެ އޮނިގަނޑަށް ބަލާއިރު، ޤަވާއިދާ ޚިލާފަށް ނުވަތަ ނުބައި ތަންތަނުގައި ޕާކުކުރުމަށް 500 ރުފިޔާގެ ޖޫރިމަނާއެއް ކަނޑައަޅާފައިވެ އެވެ. މީގެއިތުރުން، ސްކޫލްތައް ކައިރީގައި، އަދި ބަސް ހުއްޓިއެއް ގެ ކައިރީގައި ނުވަތަ ޒިބްރާ ކްރޮސް އެއް ކައިރީގައި ޕާކުކުރުން ފަދަ ކަންކަމަށް 1,500 ރުފިޔާގެ ބޮޑު ޖޫރިމަނާ އެއް ކަނޑައަޅާފައިވެ އެވެ. އަދި ހިނގާ މީހުން އުޅޭ ދުވާރުމަތީގައި ނުވަތަ ޕޭމްވަމަންޓުގައި ޕާކުކުރުމަށް ނުވަތަ ދުއްވުމަށް 750 ރުފިޔާގެ ޖޫރިމަނާއެއް ނަގާއިރު، ހައިވޭތަކުގައި އެކަށީގެންވާ ސަބަބެއް ނެތި އުޅަނދު މަޑުކުރުމާއި ޕާކުކުރުމުގެ ކުށުގައި ތަކުރާރުވާ މިންވަރަށް ބަލައިގެން 1,000 ރުފިޔާއިން ފެށިގެން 4,000 ރުފިޔާއާ ދެމެދުގެ އަދަދުތަކުން ޖޫރިމަނާ ކުރުމަށް މި ސަރުކާރުން މި ވަނީ ނިންމާފަ އެވެ. 

މާލޭގައި ޕާކިންގ އިމާރާތްތަކެއް އެޅުމަށް ސަރުކާރުން އަލުން ތާރީޚުތައް ކަނޑައަޅައި، މި އަހަރުތެރޭގައި މަސައްކަތް ފަށާނެ ކަމަށް ބުނެފައިވީ ނަމަވެސް، ރައްޔިތުންނަށް ފެންނަމުންދަނީ އަމަލީ މަސައްކަތްތައް ލަސްވެ، އުންމީދުކުރި ދުވެލީގައި ކަންކަން ނުދާ މަންޒަރެވެ. މިފަދައިން ޖޫރިމަނާ ބޮޑުކޮށްފައިވާއިރު، ދިވެހި ފުލުހުންގެ ޚިދުމަތުން އާންމުކޮށްފައިވާ ތަފާސްހިސާބުތަކުން ދައްކާ ގޮތުގައި މަގުތަކުގެ ސަލާމަތާއި ރައްކާތެރިކަމަށްޓަކައި ކަމަށް ބުނެ ހިންގާ އޮޕްޝަންތަކުގައި ބޮޑެތި އަދަދުތަކުން ރައްޔިތުން ދަނީ ޖޫރިމަނާ ކުރަމުންނެވެ. ފަހުގެ ތަފާސްހިސާބުތަކުން ދައްކާގޮތުން، ފުލުހުން މާލޭގެ މަގުތަކުގައި ކުރިއަށްގެންދިޔަ ވެހިކަލް އިންސްޕެކްޝަންތަކުގައި ގިނަ އަދަދެއްގެ އުޅަނދުތައް ބަލައިފާސްކޮށްފައިވާއިރު، އޭގެ ތެރެއިން ދެބައިކުޅަ އެއްބަޔަށްވުރެ ގިނަ އުޅަނދުތައް ވަނީ ޖޫރިމަނާ ކޮށްފަ އެވެ.

މި ސަރުކާރުގެ އެންމެ ބޮޑު އެއް ލެގަސީ އަކީ ނުކުރާނެ ކަންކަން ކުރުމާއި، ކުރާނެ ކަމަށް ބުނާ ކަންކަން ނުކުރުމުގެ ސިޔާސަތެއް ގެންގުޅުމެވެ. ރައްޔިތުންނަށް ނިކަމެތިކަމާ އުނދަގޫ ޖެއްސުމެވެ. ރައްޔިތުންގެ ފައިސާ އިސްރާފު ކުރުމުވެ. ހިތުހުރި ގޮތަކަށް، ރައްޔިތުންގެ ޖީބުތަކަށް އަތް ބޭނުމެވެ. މިއީ ވާ ސަރުކާރެކެވެ. ރައްޔިތުންނަށް މިހާ ވަރަށް ނުތަނަވަސްކަމާ، މާޔޫސީކަން ގެނުވި ސަރުކާރެއް މި ނޫނިއްޔާ ނެތެވެ. އެކަމުން އެއް ވަނަ ދޭނަމަ އެ ވަނަ ލިބިދާނެ އެވެ. ރައްޔިތުންގެ ހެވާ ލާބަ އަށް ކަމެއް ކޮށްގެން ޕޮއިންޓެއް ދެންޏާ ހަމަ ޒީރޯ އެވެ.