ތިން ލީޑަރުން ގުޅިގެން ގޮތެއް ނިންމައިފިނަމަ ޤައުމު އެ މަގަކަށް އެނބުރޭނެ: އަބްދުﷲ ރިޔާޒް
ކަންކަން ބަދަލުކުރުމުގެ ފުރުސަތު އެބައޮތް، ދޮރުތަކެއް ބަންދެއް ނުވޭ
ޖުމްހޫރި ޕާޓީގެ ނައިބް ލީޑަރު އަބްދުﷲ ރިޔާޒް: ކަންކަން ބަދަލުކުރެވޭނެ ކަމަށް ރިޔާޒް ވިދާޅުވި
ގައުމު އިސްލާހުގެ މަގަށް ގެންދިއުމަށް އިދިކޮޅު ސިޔާސީ ތިން ލީޑަރުން ގުޅިވަޑައިގެން ގޮތްތަކެއް ނިންމައިފިނަމަ، އެ މަގަކަށް ގައުމު އެނބުރިގެންދާނެ ކަމަށް ޖުމްހޫރި ޕާޓީގެ ނައިބް ލީޑަރު އަބްދުﷲ ރިޔާޒް ވިދާޅުވެއްޖެ އެވެ.
ރާއްޖެޓީވީގެ "ފަލަސުރުހީ" ޕްރޮގްރާމްގައި ވާހަކަދައްކަވަމުން ކިނބިދޫ ދާއިރާގެ މެމްބަރުކަންވެސް ކުރައްވާ އަބްދުﷲ ރިޔާޒް ވިދާޅުވީ ރާއްޖެގައި ތިއްބެވި އެންމެ މަގުބޫލު ލީޑަރުންނަކީ ކުރީގެ ރައީސުލްޖުމްހޫރިއްޔާ މުހައްމަދު ނަޝީދާއި، ކުރީގެ ރައީސުލްޖުމްހޫރިއްޔާ މައުމޫނު އަބްދުއްޤައްޔޫމާއި އަދި ޖުމްހޫރީ ޕާޓީގެ ލީޑަރު ޤާސިމް އިބްރާހިމް ކަމަށެވެ. ޤައުމުގައި ހުރި މައްސަލަތަކާއި ގުޅޭ ގޮތުން މި ތިންބޭފުޅުންގެ މެދުގައި ވާހަކަދެކެވެންޖެހޭ ކަމަށް ރިޔާޒް ވިދާޅުވި އެވެ.
ރިޔާޒް ވިދާޅުވީ، ތިން ބޭފުޅުންގެ މެދުގައި ހުރި ހިޔާލު ތަފާތުވުންތައް، ޤައުމަށްޓަކައި ދޫކޮށްލަވަންޖެހޭ ކަމަށެވެ. މި ތިން ބޭފުޅުން ޤައުމު ގެންދަވާނެ މިސްރާބެއް ނިންމަވައިފިކަމުގައިވާނަމަ އެގޮތަކަށް ޤައުމު އެނބުރިގެންދާނެ ކަމަށް، ޕޮލިސް ކޮމިޝަނަރުގެ މަގާމު ވެސް އަދާކުރައްވާފައިވާ ރިޔާޒު ވިދާޅުވި އެވެ.
"އަޅުގަނޑު އުއްމިދުކުރަން އެނގޭތޯ. އަޅުގަނޑު ހުރިހާ ދޮރެއް ބަންދެއް ނުކުރަން. އަޅުގަނޑަށް އެބަފެނޭ އުއްމީދުގެ އަލި... އަޅުގަނޑު ބެލުންތެރިންނަށްވެސް ދަންނަވާނީ އެއްވެސް ގޮތަކަށް އުއްމީދު ގެއްލުވާ ނުލާށޭ،" ރިޔާޒް ވިދާޅުވި އެވެ.
އިތުރަށް ވާހަކަފުޅުދައްކަވަމުން ރިޔާޒް ވިދާޅުވި، އެންމެ ބޮޑު ތަރައްޤީއަކީ އެ ޤައުމެއްގައި ދިރިއުޅޭ ބަޔަކަށް، އެ ޤައުމެއްގައި މިނިވަންކަމާއެކުގައި ދިރިއުޅެވުން ކަމަށެވެ. ނަމަވެސް އެ މަންޒަރު މިއަދު ރާއްޖެއިން ފެނިގެންނުދާކަމަށް ރިޔާޒް ވިދާޅުވި އެވެ. އޭނާ ވިދާޅުވީ މިއަދު ސަރުކާރު ނުރުހޭ ކޮންމެ އެއްޗެއް ބުނާ މީހަކަށް އޮތީ ޖަލު ގޮޅި ކަމަށެވެ.
ރިޔާޒް ވިދާޅުވީ ބޮޑެތި އިމާރާތްތައް އެޅުމަށްފަހު، އެއީ ތަރައްޤީކަމަށް ދެއްކި ނަމަވެސް ރައްޔިތުން ގަބޫލުނުކުރާނެ ކަމަށެވެ. ކާޑުގެ ބާވަތްތަކުގެ އަގު ބޮޑުކޮށް އާންމު ރައްޔިތުންގެ ދިރިއުޅުމުގެ ހާލަތު ވަރަށް ދަށަށް ގޮސްފައިވާ ކަމަށާއި، ރައީސް ޔާމީންގެ ސަރުކާރު މިހާރު ދައްކާ ތަރައްޤީއާއެކު ކުރިއަށް އޮތްތަނުގައި ރައީސް ޔާމީން، ރައްޔިތުންނަށް ވިއްކޭނެކަމަށް ގަބޫލުނުކުރައްވާކަމަށް ރިޔާޒް ވިދާޅުވި އެވެ.
"ދެން އިތުރަށް ރައީސް ޔާމީނެއް ނުވިއްކޭނެ. ރައްޔިތުންނަށް ވަރަށް ސާފުކޮށް އެނގޭ ވާގޮތް. ރައްޔިތުން ތިބީ ސަރުކާރުން ހިނގާ ކަންކަމާއި މެދު ހިތްހަމަނުޖެހިފައި،" ރިޔާޒް ވިދާޅުވި އެވެ.
