އިސްރާއީލް ޕާސްޕޯޓު މަނާ ކުރުން: ޚަލީލް ވިދާޅުވީ އެކަމުގެ ސަބަބުން ރާއްޖެ އަށް އުނދަގޫތަކެއްވި ކަމަށް
މަޖިލީހުގެ ކޮމެޓީ މަރުޙަލާގައި އިސްރާއީލް ޕާސްޕޯޓުގެ މައްސަލަ ޕާކު ކޮށްފައި އޮތްތާ 300 ދުވަސްވީ ފަހުން، އިސްރާއީލް ޕާސްޕޯޓު މަނާ ކުރުމުގެ ބިލު ފާސް ކުރީ މިއަހަރުގެ އޭޕްރީލް މަހު
ފޮރިން މިނިސްޓަރު ޚަލީލް، ވަޒީރު ވިދާޅުވީ އިސްރާއީލް ޕާސްޕޯޓު މަނާ ކުރުމުގެ ސަބަބުން ރާއްޖެ އަށް އުނދަގޫތަކެއް ކުރިމަތިވި ކަމަށް
އިސްރާއީލް ޕާސްޕޯޓު މަނާ ކުރުމުގެ ސަބަބުން ދިވެހި ރާއްޖެ އަށް، ބައިނަލްއަޤުވާމީ މުޖުތަމައުގައި އުނދަގޫ ތަކެއް ކުރިމަތިވި ކަމަށް ޚާރިޖީ ވަޒީރު ޑޮކްޓަރު ޢަބްދުﷲ ޚަލީލް ވިދާޅުވެއްޖެ އެވެ.
ރައްޔިތުންގެ މަޖިލީހުގެ ކޮމެޓީ މަރުޙަލާގައި އިސްރާއީލް ޕާސްޕޯޓުގެ މައްސަލަ ޕާކު ކޮށްފައި އޮތްތާ 300 ދުވަސްވީ ފަހުން، އިސްރާއީލް ޕާސްޕޯޓު މަނާ ކުރުމުގެ ބިލު ފާސް ކުރީ މިއަހަރުގެ އޭޕްރީލް މަހު އެވެ. އެ ބިލު ފާސްކޮށް، ރައީސުލްޖުމްހޫރިއްޔާ ޑޮކްޓަރު މުޙައްމަދު މުޢިއްޒު އެ ބިލު ތަސްދީޤު ކުރެއްވީ، ހަމަލާތައް ހުއްޓާލަން ދެން އިސްރާއީލްގެ ޕާސްޕޯޓު މަނާ ކުރުމަށެވެ.
ގަލޮޅު ދެކުނު ދާއިރާގެ މެމްބަރު މީކާއީލް އަޙުމަދު ނަސީމް ހުށަހެޅުއްވި އެ ބިލުގައި ހިމަނާފައި އޮތީ، އިސްރާއީލް ޕާސްޕޯޓު މަނާކޮށް، އިސްރާއީލް ޕާސްޕޯޓާ އެކު ޑުއަލް ޕާސްޕޯޓު ގެން ގުޅޭ މީހުންނަށް ވެސް ރާއްޖެ ނާދެވޭ ގޮތް ހެދުމަށެވެ.
ނަމަވެސް ޕީއެންސީގެ ސުޕަ މެޖޯރިޓީ އޮތް ރައްޔިތުންގެ މަޖިލީހުން އެ ބިލު ފާސް ކުރި އިރު، އިސްރާއީލް ޕާސްޕޯޓު އޮންނަ މީހަކަށް ވިޔަސް، އެހެން ޕާސްޕޯޓެއް ދައްކައިފި ނަމަ ރާއްޖޭ އެތެރެ ވެވޭނެ އެވެ. އަދި އިސްރާއީލުން ދެމުން އަންނަ ހަމަލާތައް ހުއްޓާލައިފި ނަމަ، އިސްރާއީލްގެ ކޮންމެ މީހަކަށް ވެސް ރާއްޖެ އާދެވޭނެ ކަމަށް ބިލުގައި ވަނީ ބުނެފަ އެވެ.
ދައުލަތުގެ މީޑިއާ އަށް ޚާރިޖީ ވަޒީރު ޚަލީލް ދެއްވި އިންޓަވިޔުއެއްގައި ވިދާޅުވެފައި ވަނީ، އިސްރާއީލް ޕާސްޕޯޓު މަނާ ކުރުމަކީ ރާއްޖެ ކަހަލަ ކުޑަ ޤައުމަކުން މީގެ ކުރިން ކޮށްފައިވާ ކަމެއް ނޫން ކަމަށެވެ. ޚަލީލް ވިދާޅުވީ ދުނިޔޭގެ ބޮޑެތި ޤައުމުތަކުން އެކަން ކޮށްފައި އޮތް ނަމަވެސް، ރާއްޖެ ކަހަލަ ކުޑަ ޤައުމަކުން އެކަން ކޮށްފައި ނެތް ކަމަށެވެ.
ޚަލީލް ވިދާޅުވީ ރާއްޖެ އިން އިސްރާއީލްގެ ޕާސްޕޯޓު މަނާ ކުރުމުގެ ސަބަބުން، ބައިނަލްއަޤުވާމީ ގޮތުން ރާއްޖެ އަށް އުނދަގޫތަކެއް ކުރިމަތިވި ކަމަށެވެ. ނަމަވެސް އެއީ ކޮން ކަހަލަ އުނދަގޫތަކެއް ކަމެއް ޚަލީލް ވިދާޅު ނުވެ އެވެ.
މީގެ އިތުރުން ޚަލީލް ވިދާޅުވީ އެ އުނދަގޫތައް ކުރިމަތިވި ނަމަވެސް، ރާއްޖެއާ މަޝްވަރާ ކުރެވުނު ހުރިހާ ޤައުމަކުން ވެސް ރާއްޖޭގެ ސްޓޭންޑު ޤަބޫލު ކުރުމަކީ، ރާއްޖޭގެ ޚާރިޖީ ސިޔާސަތުގެ ތެރެއިން ރާއްޖެ އާއި، ރާއްޖޭގެ ރައްޔިތުންގެ މަސްލަޙަތަށް ބަލައިގެން ކުރެވުނު މަސައްކަތުގެ ނަތީޖާ ކަމަށް ވެސް ޚަލީލް ވަނީ ވިދާޅުވެފަ އެވެ.
އިސްރާއީލް ޕާސްޕޯޓު މަނާ ކުރުމާ ގުޅޭ ގޮތުން އިތުރަށް އެ އިންޓަވިއުގައި ވަޒީރު ޚަލީލް ވިދާޅުވީ، އެ ނިންމުމުގެ ސަބަބުން ރާއްޖޭގެ ފަތުރުވެރިކަަމަށް އަސަރު ކުރާނެ ކަމަށް ބައެއް ފަރާތްތަކުން ބުނަމުން ދިޔަ ކަމަށެވެ. އެހެން ނަމަވެސް، އެ ނިންމުމުގެ ސަބަބުން ރާއްޖޭގެ ފަތުރުވެރިކަމަށް އެއްވެސް އަސަރެއް ނުކުރާ ކަމަށް ވެސް ޚަލީލް ފާހަގަ ކުރެއްވި އެވެ. އަދި އެކަމުގެ ސަބަބުން ފަތުރުވެރިކަން މާބޮޑަށް ކުރިއަރަމުން އަންނަ ކަމަށް ވެސް ވިދާޅުވެފައިވެ އެވެ.
އެތައް ދުވަހެއް ފަހުން އިސްރާއީލްގެ ޕާސްޕޯޓު މަނާ ކޮށްފައިވާއިރު، ސަރުކާރުން އެކަން ކޮށްފައި ވަނީ އާންމު ގިނަ ރައްޔިތުންގެ ނުރުހުން އަމާޒުވެފައި ވަނިކޮށެވެ. އެގޮތުން އިސްރާއީލް ޕާސްޕޯޓު މަނާ ކުރަން ނިންމާފައިވާކަން އިއުލާން ކުރުމަށް ފަހު، އެ ނިންމުން ތަންފީޒު ކުރުމުގައި ގިނަ ދުވަސް ތަކެއް ހޭދަވުމުން، އާންމުންގެ ނުރުހުން އަމާޒުވި އެވެ. އަދި އެކަމާ ދެކޮޅަށް އާންމުން ވަނީ އިހުތިޖާޖު ވެސް ކޮށްފަ އެވެ.
ކޮމެޓީގައި ބިލު އޮންނަތާ 300 ދުވަސްވީ ފަހުން އެ ބިލު ފާސްކޮށް، ރައީސް މުޢިއްޒު ވަނީ އެ ބިލު ތަސްދީގު ކުރައްވާފައި އެވެ. އަދި އޭގެ ފަހުން މިދިޔަ މެއި މަހު ރައީސް މުޢިއްޒު ވިދާޅުވީ، އެއީ ރާއްޖޭގެ ޚާރިޖީ ސިޔާސަތުގެ ކާމިޔާބު ކަމެއް ކަމަށެވެ.
