މި ސަރުކާރުން އިޒްރޭލް ޕާސްޕޯޓު މަނާ ކުރަން ބޭނުން ނުވާކަން މިހާރު ޔަގީން: މެންބަރު ނާޒިލް
ޕާސްޕޯޓު މަނާކުރުމުގެ މަސައްކަތްތަކަށް ސަރުކާރުން ދަނީ ހުރަސް އަޅަމުން
ފަލަސުރުހީ ޕްރޮގްރާމްގައި ރައްޔިތުންގެ މަޖިލީހުގެ ހިތަދޫ އުތުރު ދާއިރާގެ މެމްބަރު އިބްރާހިމް ނާޒިލް ވާހަކަދައްކަވަނީ
ރައީސުލްޖުމްހޫރިއްޔާ ޑރ.މުހައްމަދު މުއިއްޒުގެ ސަރުކާރުން އިޒްރޭލް ޕާސްޕޯޓު މަނާކުރަން ބޭނުންނުވާކަން މިހާރު ޔަގީން ކުރެވިފައިވާ ކަމަށް ރައްޔިތުންގެ މަޖިލީހުގެ ހިތަދޫ އުތުރު ދާއިރާގެ މެމްބަރު އިބްރާހިމް ނާޒިލް ވިދާޅުވެއްޖެއެވެ.
ބުދަ ދުވަހުގެ ރޭ ކުރިއަށް ގެންދިޔަ ރާއްޖެޓީވީގެ ފަލަސުރުހީ ޕްރޮގްރާމްގައި މެންބަރު އަދި އެމްޑީޕީ ޕާލިމެންޓަރީ ގްރޫޕްގެ ލީޑަރު ނާޒިލް ވިދާޅުވީ އިޒްރޭލް ޕާސްޕޯޓު މަނާ ކުރުމުގެ ބިލު އަވަސް ކުރުމަށް ރައްޔިތުން މަޖިލީހުގެ ތެރެއިން މަސައްކަތް ކުރަމުންދާ ކަމަށެވެ. ނަމަވެސް މަސައްކަތްތަކަށް ސަރުކާރުން ހުރަސްއަޅަމުންދާ ކަމަށާއި، މި މަސައްކަތަށް މަޖިލީހުގެ ރައީސް އަބްދުއްރަހީމް އަބްދުﷲ އަހައްމިއްޔަތުކަން ނުދެއްވާ ކަމަށެވެ. އަދި ވިދާޅުވީ ޕޯސްޕޯޓު މަނާކުރުމުގެ މަސައްކަތްތައް ހޯލްޑް ކުރެވިފައިވަނީ މަޖިލިސް މެންބަރުންގެ އިހުމާލު ކަމަށް ތުހުމަތު ކުރަމުންދާ ކަމަށެވެ.
އިޒްރޭލް ޕާސްޕޯޓް މަނާ ކުރުމުގެ ބިލު އަވަސް ކުރަން ހުށަހެޅި ގަރާރު ޕީއެންސީ މެންބަރުން ބޭރުކޮށްކޮށްލާފައިވާތީ އެކަމަށް އިޝާރާތް ކުރައްވައި މެންބަރު ނާޒިލް ވިދާޅުވީ ޕީއެންސީގެ ދެ މެންބަރުން ފިޔަވައި ހުރިހާ މެންބަރުން އެ ގަރާރު ބޭރުކޮށްލުމަށް ވޯޓު ދެއްވި ކަމަށެވެ. އެހެންކަމުން މިސަރުކާރުން އިޒްރޭލް ޕާސްޕޯޓް މަނާ ކުރުމުގެ ބިލު ފާސްކުރުމަށް ބޭނުންނުވާކަން ޔަގީންވާ ކަމަށް މެންބަރު ނާޒިލް ވިދާޅުވިއެވެ.
މެންބަރު ނާޒިލް ވިދާޅުވީ ޕަލަސްތީނަށް އިޒްރޭލުން ދޭ ހަމަލާތަކާ ގުޅިގެން އެކަމާ ދެކޮޅަށް ދިވެހި ރައްޔިތުން މަސައްކަތް ކުރަމުން ދާއިރު، އިޒްރޭލް ޕާސްޕޯޓް މަނާ ކުރުމަށް ގިނަ ރައްޔިތުން އެދޭ ކަމަށެވެ. އަދި އެކަމަށް ރައްޔިތުން އެދި ގޮވަމުންދާ ކަމަށް އަހަރަކަށް ވުރެ ގިނަ ދުވަސް ވެފައިވާ ކަމަށެވެ. ނަމަވެސް ރައްޔިތުންގެ ކަންބޮޑުވުންތަކަށް ޕީއެންސީގެ މަޖިލިސް މެންބަރުން ބެލުމެއްނެތް ކަމަށާއި، ސުޕަ މެޖޯރިޓީގެ ބާރު ސަރުކާރުން ބޭނުންވާ ގޮތަށް ހިފަމުންދާ ކަމަށް މެންބަރު ނާޒިލް ވިދާޅުވިއެވެ.
20 ނޮވެންބަރު 2024 ގައި މަޖިލީހުގައި ބޭއްވި ޖަލްސާއަށް އިޒްރޭލު ޕާސްޕޯޓުގައި ރާއްޖެއަށް މީހުން އައުން މަނާ ކުރުމަށް މަޖިލިހަށް ހުށަހަޅާފައިވާ ބިލުގެ މައްސަލަ އަވަސް ކުރުމަށް ގޮވާލާ މަޖިލީހަށް ހުށަހެޅި ގަރާރު ބަލައިގަންނަން ފެންނަ ކަމަށް ވޯޓު ދެއްވީ 15 މެންބަރުންނެވެ. ގަރާރު ބޭރުކޮށްލަން 63 މެންބަރުން ވޯޓު ދެއްވި އެވެ. ގަރާރު ބޭރުކޮށްލުމާ ދެކޮޅަށް ވޯޓު ދެއްވީ އެމްޑީޕީގެ 12 މެންބަރުންނާއި އެމްޑީއޭއަށް ނިސްބަތްވާ ވެލިދޫ ދާއިރާގެ މެންބަރު މުހައްމަދު އައްބާސް އާއި އަމިއްލަ މެންބަރު އައްޑޫ މީދޫ ދާއިރާ ތަމްސީލު ކުރައްވާ އަބްދުއްރަހްމާން އަދި މަހިބަދޫ ދާއިރާގެ މެމްބަރު ޕީއެންސީ އަށް ނިސްބަތްވާ އަހްމަދު ތޯރިގު (ޓޮމް) އެވެ.
ގަރާރު ބޭރުކޮށްލުމަށް ވޯޓު ދިނީ ރައީސް މުއިއްޒުގެ ޕީއެންސީގެ މެންބަރުންގެ އިތުރުން އެމްއެންޕީގެ މެމްބަރެކެވެ.
ހުރާ ދާއިރާގެ ޕީއެންސީގެ މެންބަރު އަނާރާ ނައީމް ވަކި ގޮތަކަށް ވޯޓު ދޭން ނުފެންނަ ކަމަށް ވޯޓު ދެއްވިއިރު، އެވަގުތު ތަޅުމުގައި ތިއްބެވި ޕީއެންސީގެ އިތުރު ފަސް މެންބަރަކު ވޯޓުގައި ބައިވެރިއެއް ނުވެ އެވެ.
ގަރާރު މަޖިލީހަށް ހުށަހެޅުއްވީ އެމްޑީޕީ އަށް ނިސްބަތްވާ ގަލޮޅު އުތުރު ދާއިރާގެ މަޖިލިސް މެންބަރު މުހައްމަދު އިބްރާހިމް (ކުޑޫ) އެވެ.
ގަރާރުގައި ބުނެފައިވަނީ މި އިސްލާހު ކޮމިޓީ މަރުހަލާގައި އޮންނަތާ 4 މަހަށްވުރެ ގިނަ ދުވަސްވެފައިވާ ކަމަށާއި، މަޖިލީހުގެ ފުރިހަމަ އަޣުލަބިއްޔަތު އޮތީ ސަރުކާރު ހިންގާ ޕާޓީއަށް ކަމަށްވުމާއެކު، ސަރުކާރުން އެ ހިނދަކަށް ބޭނުންވާ ކަމެއް ބޭނުންވާ ގޮތަށް މަޖިލީހުގެ ތެރެއިން ނިންމަވަމުން ގެންދަވާ އިރު، މަޖިލީހުގެ ދައުރުން ބޭރުން ޖަލްސާތައް ބާއްވައިގެން ކަންކަން ނިންމަވައި ބައެއް ބިލުތައް ފާސްކޮށްފައިވާކަން ފާހަގަ ކުރެވޭތީ، ބިލު ވީހާވެސް އަވަހަށް މަޖިލީހުން ފާސްކުރުމަށް ބާރުއަޅައިދިނުމަށް ސަރުކާރަށް ގޮވާލާ ކަމަށެވެ.
