އިޒްރޭލު ޕާސްޕޯޓް މަނާނުކޮށްގެން ސަރުކާރަށް ޕްރެޝަރ ބޮޑުވެފައި ވަނިކޮށް، އެ މަސައްކަތް އަވަސްކުރަން 241 ކޮމިޓީ އިން ނިންމައިފި
އެ މަސްކަތް އަވަސްކުރަން ނިންމާފައި ވަނީ މަޖިލީހުގެ ސަލާމަތީ ޚިދުމަތްތަކާ ބެހޭ ކޮމިޓީގެ އާދިއްތަ ދުވަހުގެ ބައްދަލުވުމުގައި
އިޒްރޭލު ޕާސްޕޯޓު
އިޒްރޭލު ޕާސްޕޯޓުގައި ރާއްޖެއަށް މީހުން އައުން މަނާ ކުރުމަށް މަޖިލިހަށް ހުށަހަޅާފައިވާ ބިލުގެ މައްސަލަ ލަސްވާތީ ސަރުކާރަށް ޕްރެޝަރ ބޮޑުވެފައި ވަނިކޮށް، އެ މަސައްކަތް އަވަސްކުރަން މަޖިލީހުގެ ސަލާމަތީ ޚިދުމަތްތަކާއި ބެހޭ ކޮމިޓީ (241 ކޮމިޓީ) އިން ނިންމައިފިއެވެ.
އެގޮތަށް ނިންމާފައި ވަނީ މަޖިލީހުގެ ސަލާމަތީ ޚިދުމަތްތަކާއި ބެހޭ ކޮމިޓީގެ އާދިއްތަ ދުވަހުގެ ބައްދަލުވުމުގައެވެ. މީގެ ކުރިން އެ ކޮމެޓީން ނިންމާފައި ވަނީ އަންނަ ޑިސެމްބަރުގެ ނިޔަލަށް ކަމާ ބެހޭ އިދާރާތަކަށް މި ބިލާ ގުޅޭ ގޮތުން ސިޓީ ފޮނުވުމަށް ފަހު، އެ ތަންތަނުން ލިބޭ ޖަވާބު ބެލުމަށެވެ. އަދި އިދާރާތަކުން ފޮނުވާ ޖަވާބަށް ބެލުމަށްފަހު އެ ފަރާތްތައް ކޮމިޓީއަށް ހާޒިރުކުރުމަށް ވެސް އޭރު ކޮމިޓީން ވަނީ ނިންމާފައެވެ. އެހެންނަމަވެސް އެ ނިންމުން ބަދަލުކުރަން އާދިއްތަ ދުވަހު ކޮމިޓީން ނިންމާފައި ވަނީ މި މަސައްކަތް އަވަސްކުރުމުގެ ގޮތުން ކަމަށް މުގައްރިރު، އޭދަފުށީ ދާއިރާގެ މެންބަރު އަހުމަދު ސަލީމް ވަނީ ވިދާޅުވެފައެވެ.
އާދިއްތަ ދުވަހު 241 ކޮމިޓީން ނިންމާފައި ވަނީ ހޯމަ ދުވަހުން ފެށިގެން ކަމާބެހޭ ފަރާތްތައް ކޮމިޓީ އަށް ހާޒިރުކޮށް ސުވާލުކުރުމަށެވެ. އެ ހުށަހެޅުން ހުށަހަޅުއްވާފައި ވަނީ ހުޅުދޫ ދާއިރާގެ މެންބަރު މުހައްމަދު ޝާހިދެވެ. ކޮމިޓީގެ މުގައްރިރު ވަނީ ބިލުގެ މަސައްކަތް އަވަސްކުރުމަށް މި ބަދަލަކީ މުހިންމު ބަދަލެއް ކަމަށް ފާހަގަކުރައްވާފައެވެ. އިޒްރޭލު ޕާސްޕޯޓުގައި ރާއްޖެއަށް މީހުން އައުން މަނާ ކުރުމަށް ހުށަހަޅާފައިވާ ބިލުގެ ކޮމިޓީ މަސައްކަތް ނިންމާލުމަށް ފާސްކޮށްފައިވާ ފަހު ތާރީހަކީ އަންނަ އަހަރުގެ ފެބްރުއަރީއެވެ.
އިޒްރޭލު ޕާސްޕޯޓުގައި ރާއްޖެއަށް މީހުން އައުން މަނާ ކުރުމަށް މަޖިލިހަށް ހުށަހަޅާފައިވާ ބިލުގެ މައްސަލަ އަވަސް ކުރުމަށް ގޮވާލާ މަޖިލީހަށް ހުށަހެޅި ގަރާރު ބުދަ ދުވަހު ވަނީ ބޭރުކޮށްލާފައެވެ. އެގޮތުން އެ ގަރާރު މަޖިލީހަށް ބަލައިގަންނަން ފެންނަ ކަމަށް ވޯޓު ދެއްވީ 15 މެންބަރުންނެވެ. ގަރާރު ބޭރުކޮށްލަން 63 މެންބަރުން ވޯޓު ދެއްވި އެވެ. ގަރާރު ބޭރުކޮށްލުމާ ދެކޮޅަށް ވޯޓު ދެއްވީ އެމްޑީޕީގެ 12 މެންބަރުންނާއި އެމްޑީއޭއަށް ނިސްބަތްވާ ވެލިދޫ ދާއިރާގެ މެންބަރު މުހައްމަދު އައްބާސް އާއި އަމިއްލަ މެންބަރު އައްޑޫ މީދޫ ދާއިރާ ތަމްސީލު ކުރައްވާ އަބްދުއްރަހްމާން އަދި މަހިބަދޫ ދާއިރާގެ މެމްބަރު ޕީއެންސީ އަށް ނިސްބަތްވާ އަހްމަދު ތޯރިގު (ޓޮމް) އެވެ. ގަރާރު ބޭރުކޮށްލުމަށް ވޯޓު ދިނީ ރައީސް މުއިއްޒުގެ ޕީއެންސީގެ މެންބަރުންގެ އިތުރުން އެމްއެންޕީގެ މެމްބަރެކެވެ. ހުރާ ދާއިރާގެ ޕީއެންސީގެ މެންބަރު އަނާރާ ނައީމް ވަކި ގޮތަކަށް ވޯޓު ދޭން ނުފެންނަ ކަމަށް ވޯޓު ދެއްވިއިރު، އެވަގުތު ތަޅުމުގައި ތިއްބެވި ޕީއެންސީގެ އިތުރު ފަސް މެންބަރަކު ވޯޓުގައި ބައިވެރިއެއް ނުވެ އެވެ. ގަރާރު މަޖިލީހަށް ހުށަހެޅުއްވީ އެމްޑީޕީ އަށް ނިސްބަތްވާ ގަލޮޅު އުތުރު ދާއިރާގެ މަޖިލިސް މެންބަރު މުހައްމަދު އިބްރާހިމް (ކުޑޫ) އެވެ.
ގަރާރުގައި ބުނެފައިވަނީ މި އިސްލާހު ކޮމިޓީ މަރުހަލާގައި އޮންނަތާ 4 މަހަށްވުރެ ގިނަ ދުވަސްވެފައިވާ ކަމަށާއި، މަޖިލީހުގެ ފުރިހަމަ އަޣުލަބިއްޔަތު އޮތީ ސަރުކާރު ހިންގާ ޕާޓީއަށް ކަމަށްވުމާއެކު، ސަރުކާރުން އެ ހިނދަކަށް ބޭނުންވާ ކަމެއް ބޭނުންވާ ގޮތަށް މަޖިލީހުގެ ތެރެއިން ނިންމަވަމުން ގެންދަވާ އިރު، މަޖިލީހުގެ ދައުރުން ބޭރުން ޖަލްސާތައް ބާއްވައިގެން ކަންކަން ނިންމަވައި ބައެއް ބިލުތައް ފާސްކޮށްފައިވާކަން ފާހަގަ ކުރެވޭތީ، ބިލު ވީހާވެސް އަވަހަށް މަޖިލީހުން ފާސްކުރުމަށް ބާރުއަޅައިދިނުމަށް ސަރުކާރަށް ގޮވާލާ ކަމަށެވެ. ގަރާރާ ބެހޭ ގޮތުން ވާހަކަ ދެއްކެވި ސަރުކާރު ތަމްސީލު ކުރާ ގިނަ މެންބަރުން ވަނީ ގަރާރު ބަލައިގަތުމާ ދެކޮޅަށް ވާހަކަ ދައްކަވާފައެވެ. އެއާއެކު އާއްމުންގެ ނުރުހުމާއި ފާޑުކިޔުން ރައީސް ޑރ.މުއިއްޒު އަށާއި ސަރުކާރަށް ވަނީ ވަރަށް ބޮޑަށް އަމާޒުވެފައެވެ.
މި ބިލު މަޖިލީހުން ބަލައިގަނެ ސަލާމަތީ ޚިދުމަތްތަކާ ބެހޭ ކޮމިޓީ (241 ކޮމިޓީ) އަށް ފޮނުވީ ޖޫން 10 ގައެވެ.
