އިޒްރޭލް ޕާސްޕޯޓް މަނާ ކުރުމާ ދެކޮޅުހައްދަވާ ސަރުކާރު މެންބަރު ސައުދު ވާހަކަ ދައްކަވައިފި
ސަރުކާރުގެ ފުރިހަމަ ކޮންޓްރޯލު އޮތް މަޖިލީހުގައި އިޒްރޭލު ޕާސްޕޯޓު މަނާކުރުމުގެ މައްސަލަ އޮންނަތާ 160ށް ވުރެ ގިނަ ދުވަސް ވަނީ ވެފައި
ސައުދުﷲ ހިލްމީ، ޕީއެންސީގެ ތިނަދޫ އުތުރު ދާއިރާގެ މެމްބަރު
އިޒްރޭލު ޕާސްޕޯޓު މަނާކުރުމާ ދެކޮޅު ހައްދަވާ ސަރުކާރު ތަމްސީލު ކުރާ މެމްބަރުންގެ ތެރޭގައި ހިމެނޭ، ޕީއެންސީގެ ތިނަދޫ އުތުރު ދާއިރާގެ މެމްބަރު ސަޢުދުالله ޙިލްމީ ރައްޔިތުންގެ މަޖިލީހުގައި ވާހަކަ ދައްކަވައިފިއެވެ.
ބުދަ ދުވަހުގެ ޖަލްސާގައި އިޒްރޭލު ޕާސްޕޯޓު މަނާ ކުރުމާ ބެހޭ ގޮތުން ވާހަކަ ދައްކަވަމުން ސައުދު ވިދާޅުވީ، އިޒްރޭލުގެ ޕާސްޕޯޓު މަނާކުރީމާ ރާއްޖެއަށް ވާނީ ގެއްލުންތޯ ނުވަތަ ފައިދާތޯ އެކަން ނިންމުމުގެ ކުރިން ވިސްނަން ޖެހޭނެ ކަމަށެވެ.
"އަޅުގަނޑުމެންގެ ގައުމުގެ ހާލަތު މިއަދު މި އޮތީކީ އެހެން އެއްވެސް ގައުމަކާ ޖެހިގަނެގެން، އަދި އެހެން އެއްވެސް ރައްޔިތަކާ ޖެހިގަނެގެން އުޅެވޭ ފަދަ ހާލަތެއްގައެއް ނޫން،" އިޒްރޭލާ ގުޅުން ގޯސްވުމަށް ނޭދޭކަން ހާމަ ކުރައްވަމުން އޭނާ ވިދާޅުވިއެވެ.
އަޅުގަނޑުމެންގެ ހާލަތަކީ ހުރިހާ ގޮތަކަށްވެސް ބަލައިގެން ފިޔަވަޅު އަޅަން ޖެހޭ ހާލަތެއް ކަމަށް ސައުދު ވިދާޅުވިއެވެ.
އިޒްރޭލުގެ ރައްޔިތުން ރާއްޖެ އައުމާ ދެކޮޅު ހަދާއިރު އިޒްރޭލުގައި ވެސް ރާއްޖެ އާ އެއް ދީނެއްގެ އަހުލުވެރިން އުޅޭ ކަން ފާހަގަ ކުރައްވަމުން ސައުދު ވިދާޅުވީ، އެ މީހުން އިޒްރޭލުގެ ބޮޑުވަޒީރު ނަތަންޔާހޫ ބޮޑު ވަޒީރުކަމަށް ގެންނަން ވޯޓު ނުދޭ ކަމަށެވެ.
"އަދި މަޖިލީހަށް ވޯޓު ދިނީވެސް އެފަދަ ޔަހޫދީން ތަކަކަށް ކަމަށް އަޅުގަނޑަށް ގަބޫލެއް ނުކުރެވޭ،" އިޒްރޭލު ޕާސްޕޯޓު މަނާ ކުރުމާ ދެކޮޅަށް ސަބަބު ދައްކަވަމުން އޭނާ ވިދާޅުވިއެވެ.
އިޒްރޭލު ޕާސްޕޯޓު މަނާ ކުރުމުގެ ބިލު ގޮތެއް ނުނިންމާ ސަރުކާރުގެ ފުރިހަމަ ކޮންޓްރޯލު އޮތް މަޖިލީހުގައި އޮންނަތާ 160ށް ވުރެ ގިނަ ދުވަސް ވެފައިވާއިރު، ގޮތެއް ނުނިންމާ މައްސަލަ ދިގު ދަންމާ ހަގީގީ ސަބަބު ސަރުކާރު ތަމްސީލު ކުރާ މެމްބަރުންގެ އަމިއްލަ ބަހުން މިހާރު އަންނަނީ ސާފުވަމުންނެވެ.
އިޒްރޭލަށް ތާއީދު ކުރައްވާ ސައުދު ވާހަކަ ދެއްކެވިއިރު، އިޒްރޭލުން ފަލަސްތީނުގެ ޣައްޒާ ރައްޔިތުންނާ ދެކޮޅަށް ހިންގަމުންދާ އަނިޔާވެރި ނަސްލު ނައްތާލުމުގެ ހަނގުރާމައިގައި ހުސްވިި އަހަރުގެ އޮކްޓޯބަރު މަހުގެ 7 ވަނަ ދުވަހުން ފެށިގެން މިހާތަނަށް 43،972 މީހުން ވަނީ ޝަހީދު ކޮށްލާފައެވެ. އޭގެ ތެރޭގައި ގިނައީ އަންހެނުންނާއި ކުޑަކުދިންނެވެ. އޭގެ އިތުރުން، އެ ހަމަލާތަކުގައި 104،008 ފަލަސްތީނު މީހުން ވަނީ ޒަޚަމްވެފައެވެ.
ފަލަސްތީނު ރައްޔިތުންނަށް ދޭ އަނިޔާގެ އިތުރުން، ލުބުނާނުގެ މުސްލިމުންނާއި، ސީރިޔާ އާއި ޔަމަނުގެ މުސްލިމުންނަށްވެސް އިޒްރޭލުން ދަނީ ހަމަލާދެމުންނެވެ.
އިޒްރޭލުގެ ހައްދުފަހަނަ އެޅި އަނިޔާވެރިކަމާ ދެކޮޅު ހެދުމުގެ ގޮތުން ދުނިޔޭގެ ބައެއް ގައުމުތަކުން އިޒްރޭލުގެ އުފެއްދުންތަކާއި އިޒްރޭލު ޕާސްޕޯޓު ވަނީ މަނާ ކޮށްފައެވެ.
