އިޒްރޭލު ޕާސްޕޯޓު މައްސަލައިގައި އެމްޑީޕީން ހުށަހެޅި ކުއްލި މައްސަލަ ރިޔާސަތުން ބަލައެއް ނުގަތް
އިމިގްރޭޝަން ގާނޫނަށް އިސްލާހު ގެންނަ ބިލެއް މަޖިލީހަށް 30 މެއި 2024 ގަައި ވަނީ ހުށަހަޅާފަ
އިސްރާއީލް ޕާސްޕޯޓު
އިޒްރޭލު ޕާސްޕޯޓު މަނާކުރުމުގެ މައްސަލަ ލަސްވާތީ މަޖިލީހަށް ހުށަހެޅި ކުއްލި މައްސަލަ ބަލައި ނުގަންނަން މަޖިލީހުގެ ރައީސް އަބްދުއްރަހީމް އަބްދުﷲ ނިންމަވައިފިއެވެ.
އިޒްރޭލްގެ ޕާސްޕޯޓުގައި ރާއްޖެ އެތެރެވުން މަނާކުރުމަށް އިމިގްރޭޝަން ގާނޫނަށް އިސްލާހު ގެންނަ ބިލެއް މަޖިލީހަށް 30 މެއި 2024 ގަައި ވަނީ ހުށަހަޅާފައެވެ. އެ ބިލު މަޖިލީހަށް ހުށަހަޅާފައިވަނީ އެމްޑީޕީގެ ގަލޮޅު ދެކުނު ދާއިރާގެ މަޖިލިސް މެންބަރު މީކާއީލް އަހުމަދު ނަސީމެވެ.
މި ބިލުގެ މަސައްކަތް އަވަސްކުރުމަށް ގޮވާލާ ކުއްލި މައްސަލަ އެއް ހުށަހަޅުއްވާފައި ވަނީ ގަލޮޅު އުތުރު ދާއިރާގެ އެމްޑީޕީ މެމްބަރު މުހައްމަދު އިބްރާހިމް (ކުޑޫ)އެވެ. އިޒްރޭލު ޕާސްޕޯޓު މަނާކުރުމުގެ މައްސަލަ އަވަސް ކުރުމަށް ގޮވާލާ ކުއްލި މައްސަލަ އެއް ހުށަހަޅާފައި މި ވަނީ އެ ބިލުގެ މަސައްކަތް އަވަސް ކުރުމަށް ޕީއެންސީން ވެސް ގޮވާލާފައިވާ ދަނޑިވަޅެއްގައެވެ. އިޒްރޭލް ރައްޔިތުން ރައްޖެއަށް އެތެރެވުން މަނާ ކުރުމަށް އިމިގްރޭޝަން ގާނޫނަށް ގެންނަ އިސްލާހުގެ މައްސަލަ ލަސްވަނީ މަޖިލީހުގެ މައްސަލައަކުން ކަމަށް ދާދިފަހުން އެޓަރނީ ޖެނެރަލް އަހުމަދު އުޝާމް ވަނީ ސިފަކުރައްވާފައެވެ.
މަޖިލީހުގެ ރައީސް އަބްދުއްރަހީމް އަބްދުﷲ ވިދާޅުވި ގޮތުގައި މި ކުއްލި މައްސަލަ ބަލައިގަނެފައި ނުވަނީ، ކުއްލި މައްސަލައެއްގައި ހުންނަން ޖެހޭ ޝަރުތުތައް އެ މައްސަލައިގައި ހަމަ ނުވާތީއެވެ. އެހެން ނަމަވެސް މައްސަލަ ބަލައިގަނެފައި ނުވަނީ އޭގައި ކޮން ކަމެއް އުނިވުމުންކަން ހާމަކުރައްވާފައެއް ނުވެއެވެ.
އިޒްރޭލްގެ ޕާސްޕޯޓުގައި ރާއްޖެ އެތެރެވުން މަނާކުރުމަށް ހުށަހަޅާފައިވާ ބިލު ބަލައިގަނެ، އެ ބިލު ދިރާސާ ކުރުމަށް ސަލާމަތީ ޚިދުމަތްތަކާއި ބެހޭ ކޮމިޓީ ނުވަތަ 241 ކޮމިޓީއަށް ފޮނުވާފައި ވަނީ ޖޫން މަހުގެ ތެރޭގައެވެ. އޭގެ ފަހުން އެ ބިލު ބަލައިގަނެ ކޮމިޓީ މަރުހަލާގައި ކުރިއަށް ނުގޮސް އޮތުމުން އިދިކޮޅު އެމްޑީޕީން ވަނީ ކަންބޮޑުވުން ފާޅުކޮށްފައެވެ.
