އިޒްރޭލް ޕާސްޕޯޓް ރައީސްއަށް މަނާކުރެވެން އޮއްވާ މަޖިލީހަށް ފޮނުވީ އެކަން ކުރަން ބޭނުން ނުވާތީ - ރައީސް ޔާމީން

އިޒްރޭލް ޕާސްޕޯޓް ރައީސްއަށް މަނާކުރެވެން އޮއްވާ މަޖިލީހަށް ފޮނުވީ އެކަން ކުރަން ބޭނުން ނުވާތީ ކަމަށާއި، މިމައްސަލައިގައި ސަރުކާރުގެ ހެޔޮ ނިޔަތެއް ނެތްކަމަށް ކުރީގެ ރައީސް އަބްދުﷲ ޔާމީން ވިދާޅުވެއްޖެއެވެ.

ޕީއެންއެފް އޮފީހުގައި ބޭއްވި ނޫސްވެރިންގެ ބައްދަލުވުމުގައި ކުރީގެ ރައީސް ޔާމީން ވިދާޅުވީ މި މައްސަލައިގައި ދިވެހިރާއްޖެއިން ފަހަތަށް ފިޔަވަޅު އަޅާކަށް ނުޖެހޭނެ ކަމަށެވެ. ރައީސް ޔާމީން ވިދާޅުވީ އޯއައިސީގައި އިސްލާމިކް މިނިސްޓަރު ވަޑައިގެން ތަގުރީރު ކުރެއްވި އިރު ގޮވާލެއްވީ ރާއްޖޭގެ ނަމުގައި އިޒްރޭލުން ކުރާ ހަނގުރާމައިގައި ފަލަސްތީނަށް އެހީތެރިވުމަށް ކަމަށާއި، އެކަމަށް ނިމުމެއް ގެނައުމަށް ކަމަށެވެ.

ނަމަވެސް ރާއްޖެއަށް އިޒްރޭލުގެ ޕާސްޕޯޓު ހިފައިގެން އަންނަ މީހަކު ވެއްދުން މަނާކުރަން އުނދަގޫވެގެން އުޅޭ ކަމަށާއި، މިއީ މައްސަލައެއް ކަމަށެވެ. އަދި ކުރީ ސަރުކާރުތަކުން މި ކަންކަމަކީ ރައީސުލްޖުމްހޫރިއްޔާގެ ހިސާބުން ނިންމާލެވޭ ކަންކަން ކަމަށާއި، މަޖިލީހަށް މި މައްސަލަ ފޮނުވާކަށް ގާނޫނެއްގައި ވެސް އަދި ގާނޫނު އަސާސީގައި ވެސް ނޯންނާނެ ކަމަށެވެ.

ރައީސް ޔާމީން ވިދާޅުވީ މި ސަރުކާރުން މި މައްސަލައިގައި ދިގުމަގު ހިޔާރުކުރަން ބޭނުންވީ މިކަން ކުރަން ބޭނުން ނުވާތީ ކަމަށެވެ. ރައްޔިތުންގެ މަޖިލީހަށް މި މައްސަލަ ގޮސް ކޮމިޓީގައި އޮންނަތާ 45 ދުވަސް ވެއްޖެ ކަމަށާއި، އެހެންކަމުން މިކަމުގައި ސަރުކާރުގެ ހެޔޮ ނިޔަތެއް ނެތް ކަމަށް ރައީސް ޔާމީން ވިދާޅުވިއެވެ.

ފަލަސްތީނުގެ ކުށެއް ނެތް އެތައްހާސް ރައްޔިތުން ރަހުމެއް ނެތި ގަތުލުކޮށްލާ ކުޑަކުދިންނާއި އަންހެނުން މަރާ ހުސްކުރަމުންދާ ނިރުބަވެރި ދައުލަތް އިސްރާއިލުގެ އެންމެން ރާއްޖެ އައުން މަނާކުުރުމުގެ ވިސްނުމެއް ސަރުކާރުގެ ނެތްކަމަށް ދައުލަތުގެ ބަންޑާރަ ނައިބު އަހުމަދު އުޝާމް ވަނީ ވިދާޅުވެފައެވެ.

ދައުލަތުގެ ބަންޑާރަ ނައިބު އަހުމަދު އުޝާމް ވިދާޅުވީ އިޒްރޭލުގެ ޕާސްޕޯޓް މަނާކުރުމަށް ހުށަހަޅާފައިވާ ބިލް އޮތްގޮތަށް ފާސްކޮށްފިނަމަ ދަތިތައް ދިމާވެދާނެކަމަށާއި، އެހެންކަމުން ސަރުކާރުން އެ ބިލަށް އިސްލާހު ހުށަހަޅާނެ ކަމަށެވެ.