އިޒްރޭލް ޕާސްޕޯޓް މަނާކުރުމުގެ މައްސަލައިގައި ފެންނަނީ ސަރުކާރުގެ ޔަހޫދީކަން ކަމަށް ވައިކަރަދޫ ދާއިރާގެ މެންބަރު ހުސެއިން ޒިޔާދު ވިދާޅުވެއްޖެއެވެ.

އޭނާއެފަދައިން ވިދާޅުވީ ރާއްޖެޓީވީގެ ފަލަސުރުހީ ޕްރޮގްރާމްގައި ވާހަކަދައްކަވަމުންނެވެ.

އިޒްރޭލު ޕާސްޕޯޓުގައި ރާއްޖެއަށް މީހުން އައުން މަނާ ކުރުމަށް މަޖިލީހަށް ހުށަހަޅާފައިވާ ބިލުގެ މައްސަލަ އަވަސް ކުރުމަށް ގޮވާލާ މަޖިލީހަށް ހުށަހެޅި ގަރާރު ބުދަ ދުވަހު ވަނީ ބޭރުކޮށްލާފައެެވެ. އެކަމަށް އިޝާރާތްކުރައްވާ އޭނާ ވިދާޅުވީ މި މަޖިލީހަކީ ރައީސް މުއިއްޒު ބޭނުންފުޅުވާހާ ގޮތަކަށް އަމަލުކުރާ މަޖިލީހެއް ކަމަށެވެ. އެހެންކަމުން އިޒްރޭލް ޕާސްޕޯޓް މަނާކުރުމުގެ މައްސަލައިގައި ސަރުކާރުގެ ރަނގަޅު ނިޔަތެއް ނެތްކަން ސާފުކޮށް އެނގެން އޮތް ކަމަށް އޭނާ ވަނީ ވިދާޅުވެފައެވެ. މަޖިލީހުގަ އެ ބިލް ހުށަހެޅި ދުވަހު ޕީއެންސީ މެމްބަރުން އެއަށް ވާހަކަ ނުދެއްވީ ވެސް ބިލް އަވަސްކުރުމަށް ކަމަށް އެ މެމްބަރުން ފާހަގަކުރެއްވި ކަަމަށް އޭނާ ވިދާޅުވިއެވެ. އެހެންކަމުން ބޭރުފުށުން މި މަސައްކަތް އަަވަސްކުރަން ބޭނުން ކަމަށް ދެއްކި ނަމަވެސް އެތެރެފުށުން ފެންނަނީ މުނާފިގުކަން ކަމަށް ޒިޔާދު ވިދާޅުވިއެވެ.

މީގެ އިތުރުން ޤާނޫނު އަސާސީ އަށް ބުދަ ދުވަހު ގެނައި އިސްލާހުތަކަށް އޭނާ ވަނީ ފާޑު ވިދާޅުވެފައެވެ. އެގޮތުން ޤާނޫނު އަސާސީގެ އެކި ހިސާބުތަކުން އެކި މާއްދާތަކަށް އެއް އިސްލާހަކުން ބަދަލު ގެނެވޭ ގޮތް ހެދުމަކީ ކަންބޮޑުވުމެއް ކަމަށް އޭނާ ވިދާޅުވިއެވެ. އަދި އެ އިސްލާހުތައް ގެނައުމުގައި މަޝްވަރާކުރުމުގެ އެއްވެސް ސިފައެއް ނުފެނުނު ކަމަށް އޭނާ ވަނީ ވިދާޅުވެފައެވެ.

ރައްޔިތުންގެ މަޖިލީހުގެ މެންބަރުން ވަކި ކުރުމުގެ ބާރު ރައްޔިތުންނަށް ދިނުމުގެ ބާރު ސިޔާސީ ޕާޓީތަކަށް ދިނުމުގެ ބަދަލުގައި، އެ ބާރު ސީދާ އެ ދާއިރާއެއްގެ ރައްޔިތުންނަށް ދިނުމަށް ހުށަހެޅި އިސްލާހު ބަލައިގަންނަން ސަރުކާރު ހިންގާ ޕީއެންސީގެ މެމްބަރުން ވަނީ ބުދަ ދުވަހު ދެކޮޅުހައްދަވާފައެވެ. އެގޮތުން ގަލޮޅު ދެކުނު ދާއިރާގެ މެންބަރު މީކާއިލް ނަސީމް ހުށަހެޅުއްވި އިސްލާހު ބަލައިގަތުމަށް ވޯޓު ދީފައި ވަނީ މަޖިލީހުގެ 13 މެންބަރުންނެވެ. އެއީ އެމްޑީޕީގެ 12 މެންބަރުންގެ އިތުރުން އައްޑޫ މީދޫ ދާއިރާ އަމިއްލަ މެންބަރެއްގެ ގޮތުގައި ތަމްސީލުކުރައްވާ އަބްދުއްރަހުމާން އެވެ. އިސްލާހު ބޭރުކޮށްލާފައި ވަނީ ޕީއެންސީގެ 77 މެންބަރުންގެ ވޯޓާއި އެކުގައެވެ. މީގެ އިތުރުން އިތުރު އިސްލާހެއް ގެނައުމަކާއި ނުލާ ސަރުކާރުގެ ފަރާތުން މަޖިލީހަށް ހުށަހެޅި ގާނޫނުއަސާސީގެ އިސްލާހު އެއް ދުވަސް ތެރޭގައި މަޖިލީހުން މިވަނީ ފާސްކޮށްފައެވެ. އެކަަމަށް އިޝާރާތްކުރައްވާ ޒިޔާދު ވަނީ މަޖިލިސް ހިނގާ ގޮތުން ރައްޔިތުން ތިބީ ކަންބޮޑުވެފައި ކަމަށެވެ. ހީ ނުކުރާ ކަހަލަ މެމްބަރުން ވެސް ވިސްނާލުމެއް ނެތި ޤާނޫނު އަސާސީ އަށް އިސްލާހު ގެންނަން ވޯޓު ދިނުމަކީ ހިތާމަކުރައްވާ ކަމެއް ކަމަށް ޒިޔާދު ވިދާޅުވިއެވެ. ޤާނޫނު އަސާސީ އަށް އިސްލާހު ގެނައުމުގައި އެއް އިސްލާހެއް މެދުވެރިކޮށް ތަފާތު 4 ކަމެއް ބަަދަލުކުރެވިދާނެ ކަަމަށް ވެސް ޤަބޫލު ނުކުރައްވާ ކަމަށް އޭނާ ވިދާޅުވިއެވެ.

ޤާނޫނު އަސާސީ އަށް އިސްލާހު ގެނެސްފައި މި ވަނީ ޖަލްސާއަށް ހާޒިރުވެވަޑައިގެން ތިއްބެވި 91 މެންބަރުންގެ ތެރެއިން 78 މެންބަރުންގެ ވޯޓުންނެވެ. ގާނުނުއަސާސީ އިސްލާހު ކުރުމަށް ބޭނުންވަނީ މަޖިލީހުގެ ޖުމްލަ މެންބަރުންގެ ތިންބައިކުޅަ އެއް ބައިން ކަމަށް ވާއިރު އެއީ 70 މެންބަރުންނެވެ.ސަރުކާރުގެ ފަރާތުން ގާނޫނުއަސާސީ އަށް ބަދަލު ގެންނަން ހުށަހަޅާވާފައިވާ ބިލު މުޅި މަޖިލީހުގެ ކޮމިޓީން ފާސްކުރީ ވެސް ބުދަ ދުވަހުއެވެ. ސަރުކާރުން އެ ބިލުގައި ގާނޫނު އަސާސީ އަށް ގެންނަން ހުށަހަޅާފައިވާ ބަދަލުތަކުގެ ތެރޭގައި، މެންބަރުން ޕާޓީ ބަދަލުކުރުމުން ނުވަތަ ޕާޓީން ވަކިކުރުމުން ނުވަތަ އެހެން ޕާޓީއަކަށް ގުޅުމުން މެމްބަރުކަން ގެއްލޭ ގޮތް ހެދުމާއި، ރާއްޖޭގެ ސަރަހައްދުން ބައެއް ދޫކޮށްލެވޭނީ ރައްޔިތުންގެ މަޖިލީހުން ފާސްކޮށްގެން ކަމަށް ކަނޑައެޅުމާއި، ރާއްޖޭގައި ބޭރު ގައުމެއްގެ އެއްވެސް އަސްކަރީ ބަޔަކަށް ތިބެވޭނީ މަޖިލީހުން ފާސްކޮށްގެން ކަމަށް ގާނޫނު އަސާސީގައި ކަނޑައެޅުން ހިމެނެއެވެ. ރައީސް ޑރ.މުއިއްޒު ވަނީ އެ ބިލު ބުރާސްފަތި ދުވަހު ތަސްދީގުކުރައްވާފައެވެ.