އިޒްރޭލް ޕާސްޕޯޓް މަނާ ކުރުމުގެ ބިލު އަވަސް ކުރަން ހުށަހެޅި ގަރާރު ޕީއެންސީ މެންބަރުން ބޭރުކޮށްލައިފި

އިޒްރޭލު ޕާސްޕޯޓުގައި ރާއްޖެއަށް މީހުން އައުން މަނާ ކުރުމަށް މަޖިލިހަށް ހުށަހަޅާފައިވާ ބިލުގެ މައްސަލަ އަވަސް ކުރުމަށް ގޮވާލާ މަޖިލީހަށް ހުށަހެޅި ގަރާރު ބުދަ ދުވަހު ބޭރުކޮށްލައިފި އެވެ.

އެ ގަރާރު މަޖިލީހަށް ބަލައިގަންނަން ފެންނަ ކަމަށް ވޯޓު ދެއްވީ 15 މެންބަރުންނެވެ. ގަރާރު ބޭރުކޮށްލަން 63 މެންބަރުން ވޯޓު ދެއްވި އެވެ.

ގަރާރު ބޭރުކޮށްލުމާ ދެކޮޅަށް ވޯޓު ދެއްވީ އެމްޑީޕީގެ 12 މެންބަރުންނާއި އެމްޑީއޭއަށް ނިސްބަތްވާ ވެލިދޫ ދާއިރާގެ މެންބަރު މުހައްމަދު އައްބާސް އާއި އަމިއްލަ މެންބަރު އައްޑޫ މީދޫ ދާއިރާ ތަމްސީލު ކުރައްވާ އަބްދުއްރަހްމާން އަދި މަހިބަދޫ ދާއިރާގެ މެމްބަރު ޕީއެންސީ އަށް ނިސްބަތްވާ އަހްމަދު ތޯރިގު (ޓޮމް) އެވެ.

ގަރާރު ބޭރުކޮށްލުމަށް ވޯޓު ދިނީ ރައީސް މުއިއްޒުގެ ޕީއެންސީގެ މެންބަރުންގެ އިތުރުން އެމްއެންޕީގެ މެމްބަރެކެވެ.

ހުރާ ދާއިރާގެ ޕީއެންސީގެ މެންބަރު އަނާރާ ނައީމް ވަކި ގޮތަކަށް ވޯޓު ދޭން ނުފެންނަ ކަމަށް ވޯޓު ދެއްވިއިރު، އެވަގުތު ތަޅުމުގައި ތިއްބެވި ޕީއެންސީގެ އިތުރު ފަސް މެންބަރަކު ވޯޓުގައި ބައިވެރިއެއް ނުވެ އެވެ.

ގަރާރު މަޖިލީހަށް ހުށަހެޅުއްވީ އެމްޑީޕީ އަށް ނިސްބަތްވާ ގަލޮޅު އުތުރު ދާއިރާގެ މަޖިލިސް މެންބަރު މުހައްމަދު އިބްރާހިމް (ކުޑޫ) އެވެ.

ގަރާރުގައި ބުނެފައިވަނީ މި އިސްލާހު ކޮމިޓީ މަރުހަލާގައި އޮންނަތާ 4 މަހަށްވުރެ ގިނަ ދުވަސްވެފައިވާ ކަމަށާއި، މަޖިލީހުގެ ފުރިހަމަ އަޣުލަބިއްޔަތު އޮތީ ސަރުކާރު ހިންގާ ޕާޓީއަށް ކަމަށްވުމާއެކު، ސަރުކާރުން އެ ހިނދަކަށް ބޭނުންވާ ކަމެއް ބޭނުންވާ ގޮތަށް މަޖިލީހުގެ ތެރެއިން ނިންމަވަމުން ގެންދަވާ އިރު، މަޖިލީހުގެ ދައުރުން ބޭރުން ޖަލްސާތައް ބާއްވައިގެން ކަންކަން ނިންމަވައި ބައެއް ބިލުތައް ފާސްކޮށްފައިވާކަން ފާހަގަ ކުރެވޭތީ، ބިލު ވީހާވެސް އަވަހަށް މަޖިލީހުން ފާސްކުރުމަށް ބާރުއަޅައިދިނުމަށް ސަރުކާރަށް ގޮވާލާ ކަމަށެވެ.

ގަރާރާ ބެހޭ ގޮތުން ވާހަކަ ދެއްކެވި ސަރުކާރު ތަމްސީލު ކުރާ ގިނަ މެންބަރުން ވަނީ ގަރާރު ބަލައިގަތުމާ ދެކޮޅަށް ވާހަކަ ދައްކަވާފައެވެ.

ބުދަ ދުވަހުގެ ޖަލްސާގައި އިޒްރޭލު ޕާސްޕޯޓު މަނާ ކުރުމާ ބެހޭ ގޮތުން ވާހަކަ ދައްކަވަމުން ޕީއެންސީގެ ތިނަދޫ އުތުރު ދާއިރާ ތަމްސީލު ކުރައްވާ މެންބަރު ސަޢުދުالله ޙިލްމީ ވިދާޅުވީ، އިޒްރޭލުގެ ޕާސްޕޯޓު މަނާކުރީމާ ރާއްޖެއަށް ވާނީ ގެއްލުންތޯ ނުވަތަ ފައިދާތޯ އެކަން ނިންމުމުގެ ކުރިން ވިސްނަން ޖެހޭނެ ކަމަށެވެ.

"އަޅުގަނޑުމެންގެ ގައުމުގެ ހާލަތު މިއަދު މި އޮތީކީ އެހެން އެއްވެސް ގައުމަކާ ޖެހިގަނެގެން، އަދި އެހެން އެއްވެސް ރައްޔިތަކާ ޖެހިގަނެގެން އުޅެވޭ ފަދަ ހާލަތެއްގައެއް ނޫން،" އިޒްރޭލާ ގުޅުން ގޯސްވުމަށް ނޭދޭކަން ހާމަ ކުރައްވަމުން އޭނާ ވިދާޅުވިއެވެ.

ބުދަ ދުވަހުގެ ޖަލްސާގައި ބާރަށު ދާއިރާ ތަމްސީލު ކުރައްވާ ސަރުކާރު މެންބަރު އިބްރާހިމް ސުޖާއު ވެސް ވަނީ އިޒްރޭލު ޕާސްޕޯޓު މަނާ ކުރުމާ ދެކޮޅަށް ވާހަކަ ދައްކަވާފައެވެ. އޭނާ ވިދާޅުވީ ރާއްޖެ ފަތުރުވެރިކަމަށް ބަރޯސާވެފައި އޮތުމާއެކު އިޒްރޭލާ މެދު ފިޔަވަޅު އަޅައިފި ނަމަ އެ ގައުމާ ގުޅުންހުރި އެހެން ގައުމުތަކުން ރާއްޖެއާ މެދު ފިޔަވަޅު އަޅާފާނެ ކަމަށެވެ.

241 ކޮމިޓީ ގައި އޮތް އިޒްރޭލު ޕާސްޕޯޓު މަނާކުރުމުގެ ބިލުގެ މައްސަލަ މި މަހުގެ 12 ވަނަ ދުވަހު އޮތް ކޮމިޓީގެ ބައްދަލުވުމުގައި ނިންމީ އަންނަ އަހަރުގެ ފެބްރުއަރީ މަހާ ހަމައަށް އެ މަސައްކަތް ދަންމާލާށެވެ.

ބިލު މަޖިލީހުން ބަލައިގަނެ ސަލާމަތީ ޚިދުމަތްތަކާ ބެހޭ ކޮމިޓީ (241 ކޮމިޓީ) އަށް ފޮނުވީ ޖޫން 10 ގައެވެ.