ހަމަލާތައް ހުއްޓާލަން ދެން ޕާސްޕޯޓު މަނާ ކުރުމަށް ފަހު، ރައީސް ވިދާޅުވީ އެއީ ޚާރިޖީ ސިޔާސަތުގެ ފަޚުރުވެރި ނިންމެވުމެއް ކަމަށް
ރައްޔިތުންގެ މަޖިލީހުން އެ ބިލު ފާސް ކުރި އިރު، އިސްރާއީލް ޕާސްޕޯޓު އޮންނަ މީހަކަށް ވިޔަސް، އެހެން ޕާސްޕޯޓެއް ދައްކައިފި ނަމަ ރާއްޖޭ އެތެރެ ވެވޭނެ
އިޒްރޭލު ޕާސްޕޯޓު މަނާ ކުރުމުގެ މައްސަލައިގައި ސަރުކާރަށް އައީ ޕްރެޝަރު ބޮޑުވަމުން
އިސްރާއީލުން ފަލަސްޠީނަށް ދެމުން އަންނަ ހަމަލާތައް ހުއްޓާލަން ދެން، އިސްރާއީލް ޕާސްޕޯޓު މަނާ ކުރަން ނިންމުމަށްފަހު، އެއީ ޚާރިޖީ ސިޔާސަތުގެ ފަޚުރުވެރި ނިންމުމެއް ކަމަށް، ރައީސުލްޖުމްހޫރިއްޔާ ޑޮކްޓަރު މުޙައްމަދު މުޢިއްޒު ވިދާޅުވެއްޖެ އެވެ.
ރައްޔިތުންގެ މަޖިލީހުގެ ކޮމެޓީ މަރުޙަލާގައި އިސްރާއީލް ޕާސްޕޯޓުގެ މައްސަލަ ޕާކު ކޮށްފައި އޮތްތާ 300 ދުވަސްވީ ފަހުން، އިސްރާއީލް ޕާސްޕޯޓު މަނާ ކުރުމުގެ ބިލު ފާސް ކުރީ ހުސްވި އޭޕްރީލް މަހު އެވެ. އެ ބިލު ފާސްކޮށް، ރައީސް މުޢިއްޒު އެ ބިލު ތަސްދީޤު ކުރެއްވީ، ހަމަލާތައް ހުއްޓާލަން ދެން އިސްރާއީލްގެ ޕާސްޕޯޓު މަނާ ކުރުމަށެވެ.
ގަލޮޅު ދެކުނު ދާއިރާގެ މެމްބަރު މީކާއީލް އަޙުމަދު ނަސީމް ހުށަހެޅުއްވި އެ ބިލުގައި ހިމަނާފައި ވަނީ، އިސްރާއީލް ޕާސްޕޯޓު މަނާކޮށް، އިސްރާއީލް ޕާސްޕޯޓާ އެކު ޑުއަލް ޕާސްޕޯޓު ގެން ގުޅޭ މީހުންނަށް ވެސް ރާއްޖެ ނާދެވޭ ގޮތް ހެދުމަށެވެ.
ރައްޔިތުންގެ މަޖިލީހުން އެ ބިލު ފާސް ކުރި އިރު، އިސްރާއީލް ޕާސްޕޯޓު އޮންނަ މީހަކަށް ވިޔަސް، އެހެން ޕާސްޕޯޓެއް ދައްކައިފި ނަމަ ރާއްޖޭ އެތެރެ ވެވޭނެ އެވެ. އަދި އިސްރާއީލުން ދެމުން އަންނަ ހަމަލާތައް ހުއްޓާލައިފި ނަމަ. އިސްރާއީލްގެ ކޮންމެ މީހަކަށް ވެސް ރާއްޖެ އާދެވޭނެ ކަމަށް ބިލުގައި ވަނީ ބުނެފަ އެވެ.
ރައީސް މުޢިއްޒު ވިދާޅުވީ، އިސްރާއީލް ޕާސްޕޯޓު މަނާ ކުރުމަކީ ރާއްޖޭގެ ޚާރިޖީ ސިޔާސަތުގެ ފަޚުރުވެރި ނިންމުމެއް ކަމަށެވެ. އަދި އެއީ ފަޚުރުވެރި ކަމާ އެކު ނިންމި ނިންމުމެއް ކަމަށް ވެސް އެމަނިކުފާނު ވިދާޅުވި އެވެ.
އަދި އެއީ އިސްރާއީލުން ހިންގަމުން އަންނަ އަމަލުތަކާ ދެކޮޅަށް އަދި ފަލަސްޠީނު ރައްޔިތުންގެ ޙައްގުގައި، ދިވެހި ރައްޔިތުންގެ ފަރާތުން ދިވެހި ސަރުކާރުން ނިންމި މުހިންމު ނިންމުމެއް ކަމަށް ވެސް ރައީސް ވިދާޅުވި އެވެ.
އިތުރަށް ރައީސް ވިދާޅުވީ، ރާއްޖެ އަކީ ކިތަންމެ ކުޑަ ޤައުމަކަށް ވީ ނަމަވެސް، ރާއްޖެ އިން އިސްރާއީލްގެ އަމަލުތަކާ ދެކޮޅުކަން ހާމަކޮށްދީފައިވާނެ ކަމަށް ވެސް ރައީސް ވިދާޅުވެފައިވެ އެވެ.
ރައީސް މުޢިއްޒު އެހެން ވިދާޅުވި ނަމަވެސް، އިސްރާއީލްގެ ޕާސްޕޯޓު މަނާ ކުރުމަށް ވަޒީރުންގެ މަޖިލީހުން ނިންމިކަން ސަރުކާރުން އިއުލާން ކުރުމަށްފަހު، ޤާނޫނަށް ގެންނަން ޖެހޭ ބަދަލުތައް ގެނައުމުގައި ގިނަ ދުވަސްތަކެއް ހޭދަ ކުރި އެވެ.
އެގޮތުން އިސްރާއީލް ޕާސްޕޯޓުގެ މައްސަލަ މަޖިލީހަށް ހުށަހަޅާފައި އޮއްވައި، އެހެން ބިލުތަކެއް މަޖިލީހަށް ހުށަހަޅައިގެން ސަރުކާރުގެ ފަރާތުން އެ ބިލުތައް ފާސްކޮށްފައިވެ އެވެ. އަދި އިސްރާއީލް ޕާސްޕޯޓުގެ މައްސަލަ ލަސްވާތީ، ގިނަ ބަޔަކު ވަނީ އެކަމާ ގުޅިގެން ސަރުކާރަށް ފާޑު ވެސް ކިޔައިފަ އެވެ.
އިސްރާއީލް ޕާސްޕޯޓު މަނާ ކުރުމުގެ ބިިލު ރައްޔިތުންގެ މަޖިލީހުން ފާސްކޮށް، ރައީސް މުޢިއްޒު އެ ބިލު ތަސްދީޤު ކުރެއްވީ ގިނަ ބައެއްގެ ފާޑު ކިޔުމާއި، ނުރުހުން ސަރުކާރަށް އަމާޒުވެފައި ވަނިކޮށެވެ.
