އެމްޑީޕީން މަގުމައްޗަށް ނުކުމެ، ރައްޔިތުންގެ ހައްޤުގައި މި ކުރަނީ ގައުމީ ޖިހާދެއް: މައުރޫފް
މަގުތަކަށް ނުކުމެ، އެމްޑީޕީން ހިންގާ މި ސުލްހަވެރި ހަރަކާތަކީ އިތުރު އެހެން އެއްވެސް ގޮތެއް ނެތުމުން ކުރިއަށް ގެންދާ ހަރަކާތެއް
އިދިކޮޅު އެމްޑީޕީން ކުރިއަށް ގެންދާ ސިލްސިލާ އިހުތިޖާޖުގެ ތެރެއިން، ބުދަ ދުވަހުގެ ރޭގެ އެއްވުމުގައި ރައްޔިތުންގެ މަޖިލީހުގެ ކެންދޫ ދާއިރާގެ މެމްބަރު މައުރޫފު ޒާކިރު ވާހަކަދައްކަވަނީ
އިދިކޮޅު މޯލްޑިވިއަން ޑިމޮކްރެޓްސް ޕާޓީ (އެމްޑީޕީ) ކޮންމެ ރެއަކު މަގުމައްޗަށް ނުކުމެ މި ކުރަމުން ގެންދަނީ ގައުމުގެ ރައްޔިތުންގެ ހައްޤުގައި ގައުމީ ޖިހާދެއް ކަމަށް ރައްޔިތުންގެ މަޖިލީހުގެ ކެންދޫ ދާއިރާގެ މެމްބަރު މައުރޫފު ޒާކިރު ވިދާޅުވެއްޖެއެވެ.
ބުދަ ދުވަހުގެ ރޭ އެމްޑީޕީން ބޭއްވި ކުއްލި އެއްވުގައި ވާހަކަދައްކަވަމުން މައުރޫފް ވިދާޅުވީ މަގުތަކަށް ނުކުމެ، އެމްޑީޕީން ހިންގާ މި ސުލްހަވެރި ހަރަކާތަކީ އިތުރު އެހެން އެއްވެސް ގޮތެއް ނެތުމުން ކުރިއަށް ގެންދާ ހަރަކާތެއް ކަމަށާއި އެގޮތުން ރައްޔިތުން މަގުމައްޗަށް ނުކުންނަން ޖެހުނީ އެ ރައްޔިތުންގެ ހައްޤުތަކާއި އަދުލުއިންސާފާއި އެމީހުން ރިޕްރެސެންޓު ކުރެވޭނެ މަގު ގެއްލިދިއުމުން އިންސާފު ހޯދަން ދާނޭ އިތުރު ތަނެއް ނެތުނީމަ ކަމަށެވެ.
ކޮންމެ ރެއަކުވެސް އެއްވެސް ވަރުބަލިކަމެއް ނެތި، އެމްޑީޕީގެ އެންމެހާ ބޭފުޅުން ކުރައްވަމުން އެ ގެންދަވަނީ ވަރަށް ތައުރީފް ހައްޤު ބުރަ ބޮޑު މަސައްކަތެއް ކަމަށާއި އެހެން ކަމުން އެކަމަށް ޝުކުރު ދަންނަވާ ކަމަށް މައުރޫފް ވިދާޅުވިއެވެ.
މައުރީފް ވިދާޅުވީ އެމްޑީޕީގެ ހިއްވަރުގަދަ ލަސްކަރުން އެއްވެސް ވަރުބަލިކަމެއް ނެތި ކޮންމެ ރެއަކުވެސް މަގުތަކަށް ނުކުމެ ރައްޔިތުންގެ ހައްޤުގައި ކުރަމުން މިގެންދަނީ ގައުމީ ޖިހާދެއް ކަމަށެވެ. އެގޮތުން ގަބޫލުކުރަން ޖެހޭ ހަޤީޤަތަކީ އެމްޑީޕީން މި ކުރައްވަމުން ގެންދަވާ ގައުމީ ޖިހާދުގެ އަސަރު ވަރަށް ބޮޑަށް ފެންނަމުން އެބަދާކަމަށެވެ. އެގޮތުން ފަހަކަށް އައިސް ކޮންމެ ދުވަހަކުވެސް ރައްޔިތުންގެ މަޖިލީހުން ފެންނަމުން ދަނީ އެ މަންޒަރު ކަމަށް މައުރޫފް ވިދާޅުވިއެވެ.
މައުރޫފް ވިދާޅުވީ މިހާރު ކޮންމެ ދުވަހަކު މަޖިލީހަށް ދާއިރުގައި ވެރިކަން ކުރާ ޕާޓީ ޕީއެންސީގެ މަޖިލިސް މެމްބަރުން ރުޅިއައިސްފައި ތިބޭ ކުކުޅުތަކެއް ހެން ތިބޭތަން ފެންނަ ކަމަށާއި އަދި ކޮންމެ ރެއަކު ބިމަށް ތުން ހަރާލައިގެން ތިބެ ގޮސް މަޖިލީހަށް ވަންނައިރަށް މުޒާހަރާގެ ވާހަކަތައް ދައްކަން ފަށާކަމަށެވެ.
އަޅުގަނޑުމެން މިޖީލަށް ދާއިރު، ޕީއެންސީގެ މެމްބަރުން އެ ތިބެނީ ރުޅި އައިސްފައި ތިބޭ ކުކުޅުތަކެއް ތިބޭހެން. ކޮންމެ ރެއަކު ބިމަށް ތުން ހަރާލައިގެން އަޅުގަނޑުމެންގެ މި މުޒާހަރާތަކުގެ ވާހަކަ، ހަމަ ގޮސް ވަންނައިރަށް، އޭ ރޭގެ މުޒާހަރާގައި ހާދަ މީޙުން މަދޭ، އޭ މިވެނި ރެއެއްގެ މުޒާހަރާގައި ހާދަ މީޙުން ގިނައޭ، އޭ ކަލޭމެން ރަމަޟާންމަހުގެ ފަހު ދިހައެއް ގައިވެސް މުޒާހަރާ ކުރަނީހެއްޔޭ، ހުއްޓާލާކަށް ނުވޭހެއްޔޭ، ހަމަ މިވާހަކަތައް ދައްކާލަ ދައްކާލަ ޕީއެންސީ މެމްބަރުންތައް އެތިބެނީކެންދޫ ދާއިރާގެ މެމްބަރު މައުރޫފު ޒާކިރު
މައުރޫފް ވިދާޅުވީ ފެންނަ ކޮންމެ ތާކުން ޕީއެންސީ މެމްބަރުން އެފަދަ ވާހަތައް ދެއްކުމުން އެނގިގެން ދަނީ ޕީއެންސީ އަށާއި މި ސަރުކާރަށް އެމްޑީޕީގެ މި މުޒާހަރާތަކުން ވަރަށް ބޮޑަށް އަސަރު ކޮށްފައިވާ ކަންކަމަށެވެ.
މައުރޫފް ވިދާޅުވީ ޕީއެންސީ އާއި މި ސަރުކާރުގެ އަޑެއް ނީވުނު ނަމަވެސް ހަޤީތަކަކީ މި ފަރާތްތަކުން ދަނީ އެމްޑީޕީގެ މުޒާހަރާތަކުގައި ދައްކާ ހުރިހާ ވާހަކައެއް އަޑުއަހާ އެ މަންޒަރުތައް ބަލަމުން ކަމަށެވެ.
އަދި މި މުޒާހަރާތަކުގެ ސަބަބުން ސަރުކާރު މިހާރުވަނީ ބިރުވެރިކަމެއްގެ ތެރެއަށް ވެއްޓިފައި ކަމަށާއި ނަތީޖާއެއްގެ ގޮތުން މުޒާހަރާގެ ބައިވެރިންނަށް ފޯކަސް ކޮށްގެން ބޮޑެތި ހުތުމަތުތަކެއް ކޮށް ދައުވާތައް ކުރުމަށް ހިތުއަޅައިގެން އެ ގެންދަނީ މި ހަރަކާތް ހުއްޓުވާލެވޭނެ ކަމަށް ހީކޮށް ކަމަށް މައުރޫފް ވިދާޅުވިއެވެ.
އެހެން ނަމަވެސް މި ސަރުކާރަކަށް އެމްޑީޕީން ކުރިއަށް ގެންދާ މި ހަރަކާތްތައް ހުއްޓުވާ ނުލެވޭނޭ ކަމަށް މައުރޫފް ވިދާޅުވިއެވެ.
