ޓްރަމްޕް އީރާނާއެކު ނިއުކްލިއަރ ޑީލްއަކަށް މަޝްވަރާ ކުރުމަށް އެދިވަޑައިގެން ސިޓީއެއް ފޮނުއްވައިފި
ޓްރަމްޕް ވިދާޅުވީ އިސްކަންދެއްވަނީ ޑީލަކަށް ކަމަށާއި އީރާނަށް ގެއްލުމެއް ދޭން ބޭނުން ނުވާ ކަމަށް.
ވައިޓް ހައުސްގެ އޯވަލް އޮފީހުގައި އެގްޒެކެޓިވް އަމުރުތަކުގައި ސޮއިކުރެއްވުމަށްފަހު އެމެރިކާގެ ރައީސް ޑޮނަލްޑް ޓްރަމްޕް ވާހަކަފުޅު ދައްކަވަނީ މާޗް 6، 2025
އެމެރިކާގެ ރައީސް ޑޮނަލްޑް ޓްރަމްޕް އީރާނާއެކު ނިއުކްލިއަރ ޑީލްއަކަށް މަޝްވަރާ ކުރުމަށް އެދިވަޑައިގެން، އީރާނުގެ އިސްވެރިންނަށް ސިޓީއެއް ފޮނުއްވައިފިއެވެ.
ފޮކްސް ބިޒްނަސް ނެޓްވަރކަށް ހުކުރު ދުވަހު ދެއްވި އިންޓަވިއުއެއްގައި ޓްރަމްޕް ވިދާޅުވީ، އީރާނުން މަޝްވަރާތަކަށް އެއްބަސްވުމަކީ އެގައުމަށް މާރަނގަޅު ގޮތެއް ކަމަށެވެ.
"އަޅުގަނޑުމެން އެހެން ގޮތެއް ހޯދަން ޖެހޭނެ، އެއީ އިތުރު ނިއުކްލިއަރ ހަތިޔާރެއް އުފެއްދުމުގެ ފުރުސަތު ދެވޭކަށް ނެތް" ކަމަށް ޓްރަމްޕް ވިދާޅުވިއެވެ.
ސުޕްރީމް ލީޑަރ އަލީ ޚާމަނާއީ އަށް އެޑްރެސްކޮށް ފޮނުއްވި ކަމަށް ބެލެވޭ މި ސިޓީއާ ގުޅޭ ގޮތުން އީރާނުގެ ފޮރިން މިނިސްޓްރީން އަދި އެއްވެސް ބަހެއް ނުބުނެއެވެ.
"އީރާނާމެދު ޢަމަލު ކުރެވިދާނެ ދެ ގޮތެއް އެބައޮތް: އަސްކަރީ ގޮތުން، ނުވަތަ ޑީލްއެއް ހެދުން،" ޓްރަމްޕް ވިދާޅުވިއެވެ.
"އަޅުގަނޑު އިސްކަންދެނީ ޑީލަކަށް، އެއީ އަޅުގަނޑު އީރާނަށް ގެއްލުމެއް ދޭން ބޭނުމެއް ނޫން. އެއީ ވަރަށް ވަރުގަދަ ބައެއް."
ޓްރަމްޕް އީރާނަށް ސިޓީފުޅެއް ފޮނުއްވި އިރު، 2018 ގައި އީރާނާ އެކު ހެދި ނިއުކްލިއަރ އެއްބަސްވުމުން އޭނާގެ ފުރަތަމަ ވެރިކަމުގައި ވަނީ ވަކިވެފައެވެ.
ރަޝިޔާ އިން ވަނީ މިކަމުގައި މެދުވެރިއެއްގެ ދައުރު އަދާކުރުމަށް ހުށަހަޅާފައެވެ.
ރަޝިޔާގެ ޑެޕިއުޓީ ފޮރިން މިނިސްޓަރ ސަރގެއި ރިޔަބްކޮވް އީރާނުގެ އެމްބެސެޑަރ ކަޒެމް ޖަލާލީ އާއެކު ބައްދަލު ކުރައްވައި، އީރާނުގެ ނިއުކްލިއަރ ޕްރޮގްރާމާ ގުޅޭ ބައިނަލްއަޤްވާމީ މަސައްކަތްތަކާ ބެހޭގޮތުން މަޝްވަރާކުރައްވާފައިވެއެވެ.
