ޣައްޒާގެ އުތުރުގައި 'ޝައްކެއްނެތް' މިންވަރަށް ނަސްލު ނައްތާލުން ގެންދަނީ ހިންގަމުން: ޑޮކްޓާރސް ވިތައުޓް ބޯޑާރސް
އޮކްޓޯބަރު 7، 2023 އިން ފެށިގެން ޣައްޒާ ގައި އިސްރާއީލުން ކުރަމުންދާ ހަނގުރާމައިގައި މަދުވެގެން 45،129 ފަލަސްތީނު މީހުން ޝަހީދުވެ، 107،338 މީހުން ޒަޚަމްވެފައިވެއެވެ.
ޑިސެމްބަރު 19 ވީ ބުރާސްފަތި ދުވަހު އިސްރާއީލުގެ ހަމަލާ އެއްގައި ޒަޚަމްވީ ބަޔަކު ހޮސްޕިޓަލަށް ގެންދިޔުމުގެ މަސައްކަތް ކުރަނީ
ޣައްޒާގެ އުތުރު ސަރަހައްދުގައި އިސްރާއީލުން ނަސްލު ނައްތާލަމުން ގެންދާ ކަން ޝައްކެއް ނެތް މިންވަރަށް ހާމަވާ ކަމުގައި ޑޮކްޓަރސް ވިތައުޓް ބޯޑަރސް އިން ބުނެފިއެވެ.
އެ ޖަމާއަތުން "ގާޒާ ޑެތް ޓްރެޕް" ނަމުގައި ނެރުނު އައު ރިޕޯޓެއްގައި ބުނެފައިވަނީ ފަލަސްތީނުގެ ސަރަޙައްދުގައި އިސްރާއީލުގެ ބާރުތަކުން "ނަސްލު ނައްތާލުމުގެ ހެކިތައް" ފެންނަން އެބަހުރި ކަމަށެވެ.
މި ކަމާ ބެހޭ ގޮތުން ޤަތަރު ޔުނިވަރސިޓީގެ އެސޯސިއޭޓް ޕްރޮފެސަރ ލުޗިއާނޯ ޒައްކާރާ އަލްޖަޒީރާ އާ ވާހަކަ ދައްކަވަމުން ވިދާޅުވީ، އިސްރާއީލުން ޣައްޒާގެ އުތުރުގައި ދިރިއުޅޭ އެންމެން އެ ސަރަޙައްދުން ބޭރުކުރުމުގެ މަސައްކަތްކުރަމުންދާ ކަމަށެވެ.
މި ސަރަޙައްދަކީ މިހާރުވެސް އިސްރާއީލުން ހިޞާރު ކޮށްފައިވާ ސަރަޙައްދެކެވެ.
އަލްޖަޒީރާގެ ދޯހާ ހެޑްކުއާޓަރުގައި ވާހަކަ ދައްކަވަމުން އޭނާ ވިދާޅުވީ އިސްރާއީލުން އެ ސަރަޙައްދަށް "އެހެން ރޭވުމެއް ރާވަމުންދާ" ކަމަށެވެ – މިސާލަކަށް އޭނާ ވިދާޅުވީ ޔަހޫދީ އާބާދީތައް އެ ތަނުގައި ޤާއިމުކުރުން ފަދަ ކަމެއް ކުރުން އެކަށީގެންވާ ކަމަށެވެ.
އިސްރާއީލުން މި އަމަލު ހިންގަމުންދާތާ އެތައް ދުވަހެއް ފާއިތުވެގެން ދާއިރު ވެސް އެއްވެސް މީހަކަށް އެއްވެސް ކަމެއް ނުކުރެވޭ ކަން ވެސް އޭނާ ފާހަގަ ކުރެއްވިއެވެ.
ޒައްކާރާ އިތުރަށް ފާހަގަ ކުރެއްވި ގޮތުގައި، ބައިނަލްއަޤްވާމީ ޖަމްޢިއްޔާތަކުން ފެށިގެން ޞިއްޙީ އަދި އެހީދޭ ޖަމާޢަތްތައް ހިމެނޭ ގޮތުން އުތުރު ޣައްޒާގެ ހާލަތަކީ "ޤަބޫލުކުރެވޭނެ" ހާލަތެއް ނޫން ކަމަށާއި އަދި އާންމު ރައްޔިތުންނާމެދު އަމަލު ކުރެވެމުން ދަނީ "މުޅިން އިންސާނިއްޔަތާ ޚިލާފު" އަށް ކަމަށް ބުނެފައިވާ ކަމަށެވެ.
"މިކަން ހުއްޓުވުމަށް އެކަށީގެންވާ މިންވަރަށް މަސައްކަތްކުރާ އެއްވެސް މީހަކު ނެތް، އަހަރުމެންނަށް މިކަން ވަރަށް ސާފުކޮށް ފެންނަމުންދިޔަ ނަމަވެސް." އޭނާ ވިދާޅުވިއެވެ.
ޣައްޒާ އަށް އިސްރާއީލުން ހުއްޓުމެއް ނެތި ދެމުންދާ ހަމަލާ ތަކުގައި ޣައްޒާ ސިޓީގައި ހުރި ވަގުތީ ހިޔަލުގެ ގޮތުގައި ބޭނުން ކުރާ ދެ ސްކޫލަކަށް އިސްރާއީލުން ދިން ހަމަލާތަކުގައި މަދުވެގެން 15 ފަލަސްތީނު މީހުން ޝަހީދުވެފައިވެއެވެ.
މި މީހުންނަކީ ހަނގުރާމައިގެ ސަބަބުން މަޖުބޫރުން ގެދޮރު ދޫކޮށް ވަގުތީ ހިޔަލުގައި އުޅެން މަޖުބޫރުވެފައި ތިބި މީހުންނެވެ. ޣައްޒާ ގައި ހުރި އަލް ޖަޒީރާގެ ނޫސްވެރިޔާ ބުނާ ގޮތުގައި އިސްރާއީލުން ގެންދަނީ ޣައްޒާ ގެ ފެނުގެ ވަސީލަތްތައް ގަސްދުގައި ހަލާކު ކޮށް، "ހަނގުރާމައިގެ ހަތިޔާރެއްގެ" ގޮތުގައި ފެން ބޭނުން ކުރަމުންނެވެ.
އޮކްޓޯބަރު 7، 2023 އިން ފެށިގެން ޣައްޒާ ގައި އިސްރާއީލުން ކުރަމުންދާ ހަނގުރާމައިގައި މަދުވެގެން 45،129 ފަލަސްތީނު މީހުން ޝަހީދުވެ، 107،338 މީހުން ޒަޚަމްވެފައިވެއެވެ.
