ލާޒިއޯ އަތުން ބަލިވެ، ނަޕޯލީން ފުރުސަތު ނަގާލައިފި

އިޓާލިއަން ލީގުގައި ލާޒިއޯއާ ދެކޮޅަށް ކުޅުނު މެޗުން ބަލިވެ، އެއް ވަނަ އަށް ޖެހިލަށް ލިބުނު ފުރުސަތު ނަޕޯލީން ނަގާލައިފި އެވެ.

ލީގުގައި އާދީއްތަ ދުވަހުގެ ރޭ ނަޕޯލީގެ އަމިއްލަ ދަނޑުގައި ކުޅުނު މެޗު ލާޒިއޯ އިން ކާމިޔާބު ކުރީ 1-0 އިންނެވެ. އެ މެޗާ ކުރިމަތިލީއިރު ވެސް ނަޕޯލީ އޮތީ ލީގު ތާވަލްގެ ދެ ވަނައިގަ އެވެ. އެ މެޗުން މޮޅުވެ އެއް ވަނައިގައި އެއް ޕޮއިންޓުގެ ލީޑު ނެގުމުގެ ފުރުސަތު ނަޕޯލީ އަށް އޮތެވެ.

މެޗުގެ ފުރަތަމަ ހާފުގައި ދެ ޓީމަށް ވެސް ވަނީ ލަނޑު ޖަހާނެ ފުރުސަތު ލިބިފަ އެވެ. ޚާއްސަކޮށް ނަޕޯލީ އަށް ލަނޑު ޖަހާނެ ފުރުސަތު ލިބުނުއިރު، އެ ޓީމަށް އެ ފުރުސަތުގެ ބޭނުން ކުރެވޭ ގޮތެެއް ނުވި އެވެ. މެޗުގައި ލާޒިއޯ އިން ލަނޑު ޖެހީ ދެ ވަނަ ހާފުގަ އެވެ. މެޗުގެ 79 ވަނަ މިނެޓުގައި ލާޒިއޯ އަށް ލީޑު ނަގައިދިނީ ގުސްޓާވް އިސާކްސެން އެވެ. އޭނާ އެ ލަނޑު ޖެހީ ތިޖާނީ ނޮސްލިން ތަނަވަސްކޮށްދިން ފުރުސަތެއްގަ އެވެ.

ބައްޔާއެކު ނަޕޯލީ އަށް އެއް ވަަނަ އަށް ޖެހިލުމުގެ ފުރުސަތު ގެއްލުނުއިރު، އެ ޓީމު އޮތީ ދެ ވަނައިގަ އެވެ. އެއީ މިހާތަނަށް ކުޅެފައިވާ 15 މެޗުން 32 ޕޮއިންޓު ހޯދައިގެންނެވެ. ހަމަ އެ އަދަދަށް މެޗު ކުޅެގެން އެއް ވަަނައިގައި އެޓަލަންޓާ އަށް ލިބެނީ 34 ޕޮއިންޓެވެ. ނަޕޯލީ އަތުން މޮޅުވި ލާޒިއޯ އޮތީ 31 ޕޮއިންޓާ އެކު ފަސް ވަނައިގަ އެވެ.