ޖެނޯ ބަލިކޮށް، ރޯމާ ހަތަރު ވަަނައިގައި

އިޓާލިއަން ލީގުގައި ޖެނޯއާ ދެކޮޅަށް ކުޅުނު މެޗުން މޮޅުވެ، ރޯމާ އިން ލީގު ތާވަލްގެ ހަތަރު ވަނަ މަގާމަށް ޖެހިލައިފި އެވެ.

ހޯމަ ދުވަހުގެ ރޭ ރޯމާގެ އަމިއްލަ ދަނޑުގައި ކުޅުނު މެޗު އެ ޓީމުން ކާމިޔާބު ކުރީ 3-1 އިންނެވެ. މެޗުގެ ފުރަތަމަ ހާފުގައި ރޯމާ އިން ތިން ލަނޑު ޖެހިއިރު، ޖެނޯގެ ހަމައެކަނި ލަނޑު އެ ޓީމުން ޖެހީ ދެ ވަނަ ހާފުގަ އެވެ.

މެޗު ފަށައިގެން 14 ވަނަ މިނެޓުގައި ރޯމާ އަށް ލަނޑު ޖަހައި ލީޑު ނަގައިދިނީ މަތިއަސް ސޯލް އެވެ. އޭގެ ފަސް މިނެޓު ފަހުން މަނޫ ކޯން ވަނީ ރޯމާގެ ދެ ވަނަ ލަނޑު ޖަހައި ލީޑު ފުޅާ ކޮށްފަ އެވެ. އެއީ އީވާން ފާގަސަން ތަނަވަސްކޮށްދިން ފުރުސަތެއްގައި އޭނާ ޖެހި ލަނޑެކެވެ. 

މެޗުގެ ފުރަތަމަ ހާފު ނިމުމުގެ ކުރިން ރޯމާގެ ތިން ވަނަ ލަނޑެއް ޖަަހައި އިތުރަށް ލީޑު ފުޅާ ކޮށްދިނީ ފާގަސަން އެވެ. މެޗުގެ ދެ ވަނަ ހާފުގައި ވެސް ރޯމާ އިން ވަނީ އިތުރު ލަނޑު ޖަހަން ފުރުސަތު ތަކެއް ތަނަވަސްކޮށްފަ އެވެ. މެޗުގައި ޖެނޯގެ ހަމައެކަނި ލަނޑު، 87 ވަނަ މިނެޓުގައި ޖެހީ ޖެފް އިކާޓޯ އެވެ.

މޮޅާ އެކު ރޯމާ އިން ވަނީ ލީގު ތާވަލްގެ ހަތަރު ވަނަ މަގާމަށް ޖެހިލައިފަ އެވެ. އެއީ މިހާތަނަށް ކުޅެފައިވާ 17 މެޗުން 33 ޕޮއިންޓާ އެކު އެވެ. ރޯމާ އަށް ވުރެ އެއް މެޗު މަދުން ކުޅެގެން ތިން ވަނައިގައި އޮތް ނަޕޯލީ އަށް ލިބެނީ 34 ޕޮއިންޓެވެ. ނަމަވެސް، މެޗުގެ އަދަދު ހަމަކޮށް، ލީޑު ފުޅާ ކުރުމުގެ ފުރުސަތު ނަޕޯލީ އަށް އޮންނާނެ އެވެ.

މެޗަށް ފަހު ވާހަކަ ދައްކަމުން ރޯމާގެ ކޯޗު ޖިއާން ޕިއޭރޯ ގަސްޕެރީނީ ބުނެފައި ވަނީ، މެޗުގައި ރޯމާގެ ކުޅުންތެރިން ދެއްކި ކުޅުމާ މެދު  ވަރަށް ބޮޑަށް ހިތްހަމަ ޖެހޭ ކަމަށެވެ. ޚާއްސަކޮށް މެޗުގެ ފުރަތަމަ ހާފުގައި ރޯމާ އިން ތިން ލަނޑު ޖަހާފައިވާއިރު، އެކަމަށް އިޝާރާތްކޮށް އޭނާ ބުނީ މެޗު ފެށިގެން ވެސް ކުޅުންތެރިން ކުޅެމުން ދިޔައީ ރަނގަޅު ރޫހެއްގައި ކަމަށެވެ.

މީގެ އިތުރުން އޭނާ ބުނީ މެޗުގެ ދެ ވަނަ ހާފުގައި އިތުރު ލަނޑު ޖަހަން ވެސް ރޯމާ އަށް ފުރުސަތު ލިބުނު ކަމަށާއި، ނަމަވެސް ބޭނުން ނުކުރެެވުނީ ކަމަށެވެ. މެޗަށް ނިކުތީ ތިން ޕޮއިންޓުގެ ހޯދުމުގެ އަޒުމުގައި ކަމަށްވާއިރު، އެކަން ހާސިލުވުމުން ދެން އޮތީ ކުރިއަށް އޮތް މެޗަށް ފޯކަސް ކުރުން ކަމަށް ވެސް އޭނާ ބުންޏެވެ. ނަތީޖާ ރަނގަޅު ކުރުމަށް ކުރާ މަސައްކަތުގައި، ކުރިއެރުން ތަކެއް ލިބެމުން އަންނަ ކަމަށް ވެސް އޭނާ ބުންޏެވެ.