ކަލިއަރީ ބަލިކޮށް، އޭސީ މިލާން އެއް ވަނަ އަށް
މޮޅާއެކު އޭސީ މިލާން އެއް ވަނައިގައި އޮތީ މިހާތަނަށް ކުޅެފައިވާ 17 މެޗުން 38 ޕޮއިންޓާ އެކު. އޭސީ މިލާނަށް ވުރެ އެއް މެޗު މަދުން ކުޅެގެން ދެ ވަނައިގައި އިންޓަރ މިލާން އަށް ލިބެނީ 36 ޕޮއިންޓު. ނަމަވެސް، މެޗުގެ އަދަދު ހަމަކޮށް އެއް ވަނަ އަށް ޖެހިލުމުގެ ފުރުސަތު އިންޓަރ މިލާން އަށް އޮންނާނެ.
މެޗުގައި ލަނޑު ޖެހުމަށް ފަހު އޭސީ މިލާންގެ ކުޅުންތެރިން އުފާ ފާޅު ކުރަނީ
އިޓާލިއަން ލީގުގައި ކަލިއަރީއާ ދެކޮޅަށް ކުޅުނު މެޗުން މޮޅުވެ، އޭސީ މިލާން އިން ލީގު ތާވަލްގެ އެއް ވަނަ މަގާމަށް ޖެހިލައިފި އެވެ.
ކަލިއަރީގެ އަމިއްލަ ދަނޑުގައި ހުކުރު ދުވަހުގެ ރޭ ކުޅުނު މެޗު އޭސީ މިލާން އިން ކާމިޔާބު ކުރީ 1-0 އިންނެވެ. މެޗުގައި އޭސީ މިލާން އިން ލަނޑު ޖެހީ ވެސް، މެޗުގެ ދެ ވަނަ ހާފުގަ އެވެ.
މެޗުގެ ފުރަތަމަ ހާފުގައި ދެ ޓީމުގެ ފަރާތުން ވެސް ހަމަހަމަ ކުޅުމެއް ފެނުނުއިރު، ކަލިއަރީ އަށް ވަނީ ލަނޑު ޖަހަން ފުރުސަތު ލިބިފަ އެވެ. އެ ޓީމުން ފޮނުވާލި ދެ ހަމަލާއެއް އޭސީ މިލާންގެ ގޯލު ކީޕަރު ވަނީ މަތަކޮށްފަ އެވެ. އަނެއް ހަމަލާ ދިޔައީ ގޯލާ އަމާޒު ނުވެ އެވެ.
މެޗުގެ ދެ ވަނަ ހާފު ފަށައިގެން ފަސް ވަނަ މިނެޓުގައި އޭސީ މިލާން އިން ވަނީ ލަނޑު ޖަހައި ލީޑު ނަގައިފަ އެވެ. އެ ލަނޑު އެ ޓީމަށް ޖަހައިދިނީ ރަފައެލް ލިއާއޯ އެވެ. އެ ލަނޑު އޭނާ ޖެހީ އެޑްރިއަން ރަބިއޯ ތަނަވަސްކޮށްދިން ފުރުސަތެއްގަ އެވެ.
މޮޅާއެކު އޭސީ މިލާން އެއް ވަނައިގައި އޮތީ މިހާތަނަށް ކުޅެފައިވާ 17 މެޗުން 38 ޕޮއިންޓާ އެކު އެވެ. އޭސީ މިލާނަށް ވުރެ އެއް މެޗު މަދުން ކުޅެގެން ދެ ވަނައިގައި އިންޓަރ މިލާން އަށް ލިބެނީ 36 ޕޮއިންޓެވެ. ނަމަވެސް، މެޗުގެ އަދަދު ހަމަކޮށް އެއް ވަނަ އަށް ޖެހިލުމުގެ ފުރުސަތު އިންޓަރ މިލާން އަށް އޮންނާނެ އެވެ.
މެޗަށް ފަހު ވާހަކަ ދައްކަމުން އޭސީ މިލާންގެ ކޯޗު މާސިމިލިއާނޯ އަލެގްރީ ބުނެފައި ވަނީ، އޭސީ މިލާން އިން މެޗުގެ ފުރަތަމަ ހާފު ފެށީ ރަނގަޅަށް ނޫން ކަމަށެވެ. އެގޮތުން މެޗުގެ ފުރަތަމަ ހާފުގައި ވެސް އޭސީ މިލާންގެ ކޮޅަށް ލަނޑު ޖަހަން ކަލިއަރީ އިން ފުރުސަތު ތަކެއް ހޯދި ކަމަށް އޭނާ ފާހަގަ ކުރި އެވެ. އެގޮތުން ރޭވުންތެރިކަމާ އެކު، ކަލިއަރީ އިން ވަރަށް ރަނގަޅަށް ފުރަތަމަ ހާފުގައި ކުޅުނު ކަމަށް އޭނާ ބުންޏެވެ.
އޭނާ ބުނީ މެޗުގެ ދެ ވަނަ ހާފުގައި އޭސީ މިލާން އިން ކުޅުން ރަނގަޅު ކުރި ކަމަށާއި، ކަލިއަރީ އިން އޭސީ މިލާން އަށް ވަރަށް އުނދަގޫތައް ކުރި ކަމަށެވެ. އެ ޓީމަކީ ވަރަށް ރަނގަޅު ޓީމެއްކަން ފާހަގަކޮށް އަލެގްރީ ބުނީ، އެ ޓީމާ ދެކޮޅަށް ކުޅެން ޖެހޭނީ ސަމާލުވެ ތިބެ، ވިސްނުންތެރިކަމާ އެކު ކަމަށެވެ.
