ފަހު ވަގުތު ނަޕޯލީ އިން އިންޓައާ އެއްވަރު ކޮށްފި

އިޓާލިއަން ލީގުގައި އިންޓަރ މިލާންއާ ދެކޮޅަށް ކުޅުނު މެޗުން، ފަހު ވަގުތު އެންމެ ފަހުގެ ޗެމްޕިއަން ނަޕޯލީ އެއްވަރު ވެއްޖެ އެވެ.

އިންޓަރ މިލާންގެ އަމިއްލަ ދަނޑުގައި ކުޅުނު މެޗު ނިމުނީ ދެ ޓީމު 2-2 އިން އެއްވަރު ވެގެންނެވެ. މެޗުގެ ފުރަތަމަ ހާފުގައި އިންޓަރ އިން ލަނޑު ޖަހައި ކުރި ހޯދާފައި ވަނިކޮށް، ނަޕޯލީ އިން އެއްވަރު ކުރި އެވެ. ދެ ވަނަ ހާފުގައި އިންޓަރ އިން ދެ ވަނަ ފަަހަރަށް ލީޑު ނެގި ނަމަވެސް، ފަހު ވަގުތު ނަޕޯލީ އިން ވަނީ އެއްވަރު ކޮށްފަ އެވެ.

މެޗު ފަށައިގެން ނުވަ ވަނަ މިނެޓުގައި އިންޓަރ އިން ވަނީ ލަނޑު ޖަހައި ލީޑު ނަގައިފަ އެވެ. އެ ޓީމަށް ލީޑު ނަގައިދިނީ ފެޑެރިކޯ ޑިމާކޯ އެވެ. އެއީ މާކަސް ތުރަމް ތަނަވަސްކޮށްދިން ފުރުސަތެއްގައި އޭނާ ޖެހި ލަނޑެކެވެ. އެހެން ނަމަވެސް، މެޗުގެ 26 ވަނަ މިނެޓުގައި ސްކޮޓް މެކްޓޮމިނޭ ވަނީ ލަނޑު ޖަހައި ނަޕޯލީ އަށް ނަތީޖާ ހަމަހަމަ ކޮށްދީފަ އެވެ.

މެޗުގެ ދެ ވަނަ ހާފުގައި ނަޕޯލީގެ ކޯޗު އެންޓޯނިއޯ ކޮންޓޭ އަށް ވަނީ ސީދާ ރަތް ކާޑު ދައްކައި ދަނޑުން ފޮނުވާލައިފަ އެވެ. އެއީ އިންޓަރ އަށް ޕެނަލްޓީ ދޭން ނިންމުމުން އެކަމާ ހިތްހަމަ ނުޖެހުން ފާޅު ކުރުމުންނެވެ. އިންޓަރ އަށް ލިބުނު ޕެނަލްޓީ ކާމިޔާބުކޮށް، ދެ ވަނަ ފަހަރަށް އެ ޓީމަށް ކުރި ހޯދައިދިނީ ހަކަން ޗަނޮގްލޫ އެވެ.

މެޗުގެ ފުރިހަމަ ވަގުތު ހަމަވާން ނުވަ މިނެޓަށް ވެފައި ވަނިކޮށް، ނަޕޯލީ އިން ވަނީ ދެ ވަނަ ލަނޑެއް ޖަހައިގެން އިންޓަރއާ އެއްވަރު ކޮށްފަ އެވެ. އެ ލަނޑު ވެސް ނަޕޯލީ އަށް ޖަހައިދިނީ މެކްޓޮމިނޭ އެވެ. އެއީ ނޯ ލަންގް ތަނަވަސްކޮށްދިން ފުރުސަތެއްގައި އޭނާ ޖެހި ލަނޑެކެވެ.

މެޗު އެއްވަރުވީ ނަމަވެސް، އިންޓަރ އޮތީ ލީގު ތާވަލްގެ އެއް ވަނަ މަގާމުގަ އެވެ. އެއީ މިހާތަނަށް ލީގުގައި ކުޅެފައިވާ 19 މެޗުން 43 ޕޮއިންޓާ އެކު އެވެ. އިންޓަރ އަތުން ހޯދި ޕޮއިންޓާ އެކު، ނަޕޯލީ ތިން ވަނައިގައި އޮތީ 19 މެޗުން 39 ޕޮއިންޓާ އެކު އެވެ. ހަމަ އެ އަދަދަށް މެޗު ކުޅެގެން ދެ ވަނައިގައި އޭސީ މިލާން އަށް ލިބެނީ 40 ޕޮއިންޓެވެ.