"ކެޔޮޅުންގެ ލޮބީ އާއި ރައީސް މުޢިއްޒު ބައްދަލު ކުރެއްވުމާ ހަމައަށް ކަންކަން އެނގިވަޑައި ނުގަންނަވާކަމަށް ވިދާޅުވުމަކީ ދެރަވަރުކަމެއް"
މަސްވެރިންގެ ކަންކަން ހަރުދަނާކުރަން ރަނގަޅު ޓައިމްލައިނެއް ނުވަތަ ކަންކަން ކުރެވޭނެ ކަމުގެ ޔަޤީންކަން އަދިވެސް ނުލިބޭ ކަމަށް އޭނާ ވިދާޅުވި
ކެޔޮޅުންގެ ލޮބީގެ މެމްބަރު، ކެޔޮޅު މުޙައްމަދު ހަސަން
މަސްވެރިކަމުގެ ސިނާއަތުގައި ހުރި ކަންބޮޑުވުންތަކާއެކު، "ކެޔޮޅުންގެ ލޮބީ" އާއި ރައީސުލްޖުމްހޫރިއްޔާ ޑޮކްޓަރު މުޙައްމަދު މުޢިއްޒު ބައްދަލު ކުރެއްވުމާ ހަމައަށް، އެމަނިކުފާނަށް އެއްވެސް ކަމެއް އެނގިވަޑައިނުގަންނަވާކަމަށް ވިދާޅުވެ ދެއްކެވި ވާހަކަތަކަކީ ބަލައިގަނެވޭ ވާހަކަތަކެއް ނޫން ކަަމަށް ކެޔޮޅުންގެ ލޮބީ އިން ބުނެފިއެވެ.
ނިމިދިޔަ ބުދަ ދުވަހުގެ މެންދުުރު ރައީސުލްޖުމްހޫރިއްޔާގެ އޮފީހުގައިކެޔޮޅުންގެ ލޮބީ އާއި ރައީސް ވަނީ ބައްދަލުކުރައްވާފައެވެ. ރާއްޖެޓީވީގެ ފަލަސުރުހީ ޕްރޮގްރާމްގައި ވާހަކަދައްކަވަމުން ކެޔޮޅުންގެ ލޮބީގެ ފަރާތުން ކެޔޮޅު މުޙައްމަދު ހަސަން ވަނީ އެ ބައްދަލު ކުރެއްވުމަށް ދައުވަތު ދެއްވީ ރައީސުލްޖުމްހޫރިއްޔާ ޑޮކްޓަރު މުޢިއްޒު ކަމަަށް ވީނަމަވެސް އެ ބައްދަލުވުމާއި ގުޅޭ ހަގީގަތް އޮޅޭ ގޮތަށް ސަރުކާރުން ވާހަކަދައްކާފައިވާ ކަަމަށް ފާހަގަކުރައްވާފައެވެ. ކެޔޮޅުންގެ ލޮބީގެ ފަރާތުން އައީ މަސްވެރިންނާއި ގުޅޭ ކަންބޮޑުވުންތައް މީޑިއާ އާއި އެކިއެކި ޕްލެޓްފޯމްތަކުގައި ހިއްސާކުރަމުންކަމަށް އޭނާ ވިދާޅުވިއެވެ. ލޮބީގެ ކަންކަމުގައި އިސްކޮށް ހުންނަވާ އެއްބޭފުޅަކީ ކެޔޮޅާގެ ދިޔަ ކަމަށާއި، ލޮބީ އާއި ބައްދަލުކުރުމަށް އެދި އެ މެސެޖް ހިއްސާކުރީ އޭނާ އާއި ކަމަށް ހަސަން ވިދާޅުވިއެވެ. އެއީ މަސްވެރިންގެ ކަންބޮޑުވުންތައް ހައްލުކޮށްދެއްވުމުގެ ގޮތުން ސަރުކާރުން އިސްނަގައިގެން މަސްވެރިންނާއި ބައްދަލުކުރުމުގެ ގޮތުން ކުރި ކަމެއް ކަމަށް ޤަބޫލު ނުކުރެވޭކަމަށް އޭނާ ވިދާޅުވިއެވެ. ރައީސް އޮފީހަށް ރައީސާއި ބައްދަލުކުރުމަށް އެދި ފޮނުވި ސިޓީ އަށް ވެސް ޖަވާބުދީފައި ނުވާ ކަމަށް އޭނާ ވަނީ ވިދާޅުވެފައެވެ.
މީގެއިތުރުން، އެ ބައްދަލުވުމުގައި މަސްވެރިކަމުގެ ސިނާއަތު އޮތް ޙާލަތު ރައީސުލްޖުމްހޫރިއްޔާ އާއި ހިއްސާކުރި ނަމަވެސް ކަންކަން ހައްލުކޮށްދޭނެ ގޮތުގެ ތަފްސީލެއް އެމަނިކުފާނަށް ހިއްސާ ނުކުރެއްވޭ ކަަމަށް އޭނާ ވިދާޅުވިއެވެ. ރައީސް މުޢިއްޒު ސަރުކާރާ ހަވާލުވީއިރު ޙާލަތު އޮތް ގޮތް ވެސް ހިއްސާކޮށްފައިވާނެ ކަމަށް އެ ލޮބީގެ ފަރާތުން ބުންޏެވެ. މީގެ އިތުރުން މިއަދު މަސްވެރި އާއިލާތައް ތިބި ނިކަމެތި ޙާލަތާއި، އެ ޙާލަތުން އަރައި ގަތުމަށް ސަރުކާރާ ގުޅިގެން ކުރެވޭނެ ކަންތައްތަކާ ގުޅޭ ގޮތުން މަޝްވަރާ ކޮށްފައިވާ ކަމަށް ވެސް ކެޔޮޅު ހަސަން ވިދާޅުވިއެވެ. ރައީސަށް މަސްވެރިންގެ ދަތިތައް އެނގިވަޑައިނުގަންނަވާކަމަށް ވިދާޅުވި ވިދާޅުވުން ޤަބޫލު ނުކުރެވޭ ސަބަބަކީ މިފްކޯގައި އެމްޑީއަކު ނެތުމުން ބޭރު ޤައުމަކުން މިފްކޯ ހިންގުމަށް ބޭފުޅަކު ހޯއްދަވާނެ ކަމާއި މިފްކޯއަށް ރަގަޅު ގޮތްތަކެއް ވަރަށް އަވަހަށް ހަމަޖެހިގެން ދާނެކަމަށް ކުރިން އެމަނިކުފާނު ވިދާލުވެފައިވަނީ ، ވީމާ ރައިސް އަށް އެގިވަޑައި ނުގަންނަވާ ކަމަށް ވިދާޅުވުން އެއީ ވަރަށް ދެރަވަރުކަމެއް ކަމަށް އޭނާ ވިދާޅުވިއެވެ.
ކެޔޮޅު މުޙައްމަދު ހަސަން ވިދާޅުވީ، މަސްވެރިންގެ އުއްމީދަކީ މި ސިނާއަތަށް ދިމާވެފައިވާ ނިކަމެތި ކަމުން އަރައިގަނެ އަންނަން އޮތް ޖީލުތަކަށް މި ސިނާއަތް ދެމެހެއްޓެނިވި ގޮތަކަށް ކުރިއަށް ގެންދިއުމުގެ އިންތިޒާމް ހަމަޖެހިގެން ދިއުން ކަމަށެވެ. އަދި ރައީސުލްޖުމްހޫރިއްޔާގެ އެ ވާހަކަފުޅުތަކުން އުއްމީދެއް ލިބިގެން ދިޔަ ކަމަށެވެ. އެހެންނަމަވެސް ހަރުދަނާ ޓައިމްލައިނެއް ނުވަތަ ކަންކަން ކުރެވޭނެ ކަމުގެ ޔަޤީންކަން އަދިވެސް ނުލިބޭ ކަމަށް އޭނާ ވިދާޅުވިއެވެ.
