މަސްވެރިންނާ ބައްދަލު ކުރުމާ ހަމައަށް، ރައީސަށް އެއްވެސް ކަމެއް އެނގިވަޑައި ނުގަންނަވާ

މަސްވެރިކަމުގެ ސިނާއަތުގައި ހުރި ކަންބޮޑުވުންތަކާއެކު، "މަސްވެރިންގެ ލޮބީ"އާ ރައީސުލްޖުމްހޫރިއްޔާ ޑޮކްޓަރު މުޙައްމަދު މުޢިއްޒު ބައްދަލު ކުރެއްވުމާ ހަމައަށް، އެމަނިކުފާނަށް އެއްވެސް ކަމެއް އެނގިވަޑައިނުގަންނަވާ ކަމަށް އެ ލޮބީގެ ފަރާތުން ބުނެފި އެވެ.

ބުދަ ދުވަހުގެ މެންދުުރު ރައީސުލްޖުމްހޫރިއްޔާގެ އޮފީހުގައި އޮތް ބައްދަލުވުމަށްފަހު، ވާހަކަ ދައްކަމުން މަސްވެރިންގެ ލޮބީގެ ފަރާތުން ބުނީ އެ ލޮބީއާ ބައްދަލު ކުރެއްވުމަށް ދައުވަތު ދެއްވީ ރައީސުލްޖުމްހޫރިއްޔާ ޑޮކްޓަރު މުޢިއްޒު ކަމަަށެވެ. އެގޮތުން މިއަދުގެ ބައްދަލުވުމުގައި މަސްވެރިކަމުގެ ސިނާއަތު އޮތް ޙާލަތު ރައީސުލްޖުމްހޫރިއްޔާ އަށް ހިއްސާކޮށްފައިވާނެ ކަމަށާއި، ރައީސް މުޢިއްޒު ސަރުކާރާ ހަވާލުވީއިރު ޙާލަތު އޮތް ގޮތް ވެސް ހިއްސާކޮށްފައިވާނެ ކަމަށް އެ ލޮބީގެ ފަރާތުން ބުންޏެވެ. މީގެ އިތުރުން މިއަދު މަސްވެރި އާއިލާތައް ތިބި ނިކަމެތި ޙާލަތާއި، އެ ޙާލަތުން އަރައި ގަތުމަށް ސަރުކާރާ ގުޅިގެން ކުރެވޭނެ ކަންތައްތަކާ ގުޅޭ ގޮތުން މަޝްވަރާ ކޮށްފައިވާ ކަމަށް ވެސް ބުންޏެވެ.

މީގެ އިތުރުން ވެރިކަމަށް ވަޑައިގެންނެވުމަށް ރައީސް މުޢިއްޒު މަސްވެރިންނަށް ވެފައިވާ ވައުދުތައް ފުއްދުނު މިންވަރާ ގުޅޭ ގޮތުން އަދި ނުފުއްދި ހުރި ވައުދުތަކާ ގުޅޭ ގޮތުން ވެސް އެ ބައްދަލުވުމުގައި ވަނީ މަޝްވަާރާ ކޮށްފަ އެވެ. ޚާއްސަކޮށް އެ ވައުދުތައް ފުއްދުމަށް އަވަސް ފިޔަވަޅު އެޅުމާއި، ސިނާއަތަށް ގެންނަން ޖެހޭ ބަދަލެއްވާ ނަމަ، އެ ބަދަލެއް ގެނައުމަ ގުޅޭ ގޮތުން ވެސް މަޝްވަރާ ކޮށްފައިވާ ކަމަށް ލޮބީގެ ފަރާތުން ވަނީ ބުނެފަ އެވެ. ޚާއްސަކޮށް ޒަމާނީ ވަސީލަތާ އެކީގައި، ޒަމާނީ ފެންވަރުގައި މަސްވެރި ސިނާއަތް އަންނަން ގޮތް ޖީލަށް ފޯރުކޮށްދިނުމާ ގުޅޭ ގޮތުން ވެސް މަޝްވަރާ ކޮށްފައިވެ އެވެ.

މީގެ އިތުރުން އެ ލޮބީން ބުނީ މަސްވެރިންގެ ކަންބޮޑުވުންތައް ރައީސާ ހިއްސާ ކުރުމުން، ރައީސަށް ވަރަށް ގިނަ ކަންކަން އޮޅުން ފިލައިގެން ދިޔަ ކަމަށް ރައީސް މުޢިއްޒު ވިދާޅުވި ކަމަށެވެ. އަދި އެއީ މީގެ ކުރިން ރައީސާ ހަމައަށް ތިލަވެފައި ނެތް މައުލޫމާތުތައް ކަމަށް ރައީސް މުޢިއްޒު ވިދާޅުވެފައިވާ ކަމަށް ވެސް ލޮބީގެ ފަރާތުން ވަނީ ބުނެފަ އެވެ. މީގެ އިތުރުން ރައީސްގެ ވަޒީރުންގެ މަޖިލީހުގައި ތިއްބަވާ މެމްބަރުންނާއި، ކުންފުނިތަކުގެ މެނޭޖިން ޑިރެކްޓަރު އެ ބޭފުޅުންގެ މަގާމުގެ ދަހިވެތިކަމުގައި ނުވަތަ ދިފާއުގައި ވާހަކަ ދައްކާނެ ކަމަށް ވެސް ރައީސަށް ދަންނަވާފައިވާނެ ކަމަށް ލޮބީގެ ފަރާތުން ބުނެފައިވެ އެވެ.

މީގެ އިތުރުން އެ ލޮބީގެ ފަރާތުން ވަނީ މަސްވެރިންނަށް ފައިސާ ނުލިބުމުގެ ސަބަބުން އެ އާއިލާތަކަށް ލިބޭ ފޫ ނުބެއްދޭވަރުގެ ގެއްލުން ރައީސަށް ހިއްސާ ކޮށްފަ އެވެ. އެކަމުގެ ސަބަބުން އެ އާއިލާތަކުން ކުރަމުން އަންނަ ހިތާމަ އާއި ކެކުޅުމާއި އަދި ވޭން ރައީސަށް ހިއްސާކޮށްފައިވާނެ ކަމަށް ވެސް މަސްވެރިންގެ ލޮބީގެ ފަރާތުން ބުނެފައިވެ އެވެެ. ސަރުކާރުގެ އެހެނިގެން މުވައްޒަފުންނަށް ވެސް ބިލުތައް އަންނަ ފަދައިން، މަސްވެރި ކޮންމެ ގޭބިސީއަކަށް ވެސް ބިލުތައް އަންނަ ކަމަށާއި، ސަރުކާރުގައި މަސްވެރިންގެ ފައިސާ ހިފެހެއްޓިފައި ހުންނާތީ މަސްވެރިންގެ ގެތަކުން ކަރަންޓު ކެނޑޭ ކަމަށާއި، ފެން ކެނޑޭ ކަމަށާއި، އަދި ދަރިންގެ ޟަރޫރީ ބޭނުންތައް ވެސް ނުފިދިފައިވާ ކަމަށް ވެސް އެ ލޮބީގެ ފަރާތުން ވަނީ ބުނެފަ އެވެ. އެ ހުރިހާ ކަމެއްގެ ކަންބޮޑުވުން ރައީސަށް ހިއްސާކޮށްފައިވާނެ ކަމަށް ވެސް އެ ފަރާތްތަކުން ވަނީ ބުނެފަ އެވެ.

މަސްވެރިންގެ ލޮބީގެ ފަރާތުން ބުނީ މަޝްވަރާ ކުރި ކަންކަމުގެ އަމަލީ ސިފައެއް ފެންނާނީ އެކަމުގައި ސަރުކާރުން އަދި ކަމާ ގުޅުން ހުރި ފަރާތްތަކުން އަމަލީ ގޮތުން މަސައްކަތް ކޮށްގެން ކަމަށެވެ.