ރައީސްގެ ވައުދަކީ 48 ގަޑީއިރު ތެރޭގައި ޑޮލަރުން ފައިސާ ދިނުން، ކަން ހިނގީ މުޅިން އެހެން ގޮތަކަށް
ވައުދުވީ މަސްވެރިން ބާނާ މަހަށް، މަސް ކިރާތާ 48 ގަޑީއިރު ތެރޭގައި ޑޮލަރުން ފައިސާ ދައްކަން
ރައީސް ޑރ. މުހައްމަދު މުއިއްޒު - ވައުދު ފުއްދެވިކަން އިއުލާން ކުރެއްވީ ކ. ގާފަރުގައި ހޯމަ ދުވަހު
ރައީސުލްޖުމްހޫރިއްޔާ ޑރ މުޙައްމަދު މުއިއްޒު ރިޔާސީ އިންތިޚާބުގެ ތެރޭގައި، މަސްވެރިންނަށް ވި އެންމެ ބޮޑު އެއް ވައުދު ކަމަށްވާ، މަސް ކިރާތާ 48 ގަޑީއިރު ތެރޭގައި ޑޮލަރުން ފައިސާ ދައްކާނެ ކަމަށް ވި ވައުދު، ބީއެމްއެލްގައި އެކައުންޓް ހުންނަށް އޮޑިވެރިންނަށް، އެތައް ދުވަހެއް ފަހުން ދިވެހި ރުފިޔާ އިން ފައިސާ ދައްކާ ފުއްދަވައިފި ކަމަށް މުއިއްޒު ވިދާޅުވެއްޖެއެވެ.
ރައީސް މުއިއްޒު އއ. އަތޮޅަށާއި ކ. އަތޮޅުގެ ބައެއް ރަށްތަކަށް ކުރައްވާ ދަތުރުފުޅުގެ ތެރެއިން، ހޯމަ ދުވަހު ކ. ގާފަރަށް ވަޑައިގެން ދެއްކެވި ވާހަކަފުޅުގައި، ވިދާޅުވީ، އެމަނިކުފާނު ވެރިކަމާ ހަވާލުވެވަޑައިގެންނެވި އިރު މަސްވެރިކަމުގެ ސިނާއަތް އޮތީ ވަރަށް ހާލުގައި ކަމަށެވެ. އެގޮތުން ދޭން ހުރި ފައިސާވެސް އެތައް ސަތޭކަ މިލިއަން ކަމަށާއި، 250 އެއްހާ މިލިއަން ރުފިޔާގެ ބެކްލޮގެއް އޮތް ކަމަށެވެ.
އެގޮތުން މިދިއަ 14 ދުވަހުގެ ތެރޭގައި ދައްކަން ހުރި 38 މިލިއަން ރުފިޔާ ދާދި ދެންމެއަކު އޮޑިވެރިންނަށް ޖަމާކޮށްދީފައިވާ ކަމަށެވެ. މިހާރު ބެކްލޮގެއް ނީންނާނެ ކަމަށް ރައީސް ވިދާޅުވިއެވެ.
"އެއީ ބީއެމްލްގައި އެކައުންޓް ހުރި 196 ބޭފުޅަކަށް 32.4 މިލިއަން ރުފިޔާ، އެމްއައިބީގައި އެކައުންޓް ހުރި 20 އޮޑިވެރިއަކަށް 5.6 މިލިއަން. އިއްޔެ ވާނީ ވަރަށް މުހިއްމު އެރޭންޖެމެންޓްތަކެއް ހަދާފައި. ފިނޭންސް މިނިސްޓްރީއާ މިފްކޯއާއި ބޭންކް އޮފް މޯލްޑިވްސްއާ ތިން ބައި މީހުންގެ އެގްރީމަންޓެއްގައި ސޮއި ކުރެވިފައި" ރައީސް ވިދާޅުވިއެވެ.
ރައީސް މުއިއްޒު ވިދަޅުވީ، އެ އިންތިޒާމްތަކުގެ ނަތީޖާއަކީ އަންގާރަ ދުވަހުން ފެށިގެން ބީއެމްއެލްގައި އެކައުންޓެއް އޮންނަ ކޮންމެ މަސްދޯންޏަކަށް، އެ ދޯންޏަކުން މަސްކިރާތާ 48 ގަޑީއިރުގެ ތެރޭގައި ފައިސާ ޖަމާކުރުމުގެ ކަންތައް ހަމަޖެހިގެން ދިއުން ކަމަށެވެ.
"މާދަމާއިން ފެށިން ވީ ވައުދު ފުއްދެމުންދާނެ. ބީއެމްއެލްގައި އެކައުންޓް އޮތް މަސްދޯންޏަކަށް ވިއްޔާ އެ ދޯންޏަކުން މަސްކިރާތާ 48 ގަޑީއިރު ތެރޭގައި އެ ދޯނީގެ އެކައުންޓަށް ފައިސާ ޖަމާވަމުންދާނެ. ދެން އެމްއައިބީ އެކައުންޓު ހުރި ފަރާތްތަކަށް އަދި އިތުރު ގޮތްތަކެއް ހޯދަންޖެހޭނެ" ރައީސް ކ. ގާފަރުގެ ރައްޔިތުންނާ ބައްދަލުކޮށް ދެއްކެވި ވާހަކަފުޅުގައި ވިދާޅުވިއެވެ.
ރައީސް މުއިއްޒު ވިދާޅުވީ، އެމަނިކުފާނުގެ ވައުދަކީ 48 ގަޑީއިރު ތެރޭ ގައި ފައިސާ ދިނުން ކަމަށާއި، އެހެންނަމަވެސް ސަރުކާރާ ހަވާލުވި އިރު އޮތް ހާލަތުން، ވެރިކަން ފެށިގެން 2 ވަނަ ދުވަހު އެކަން ކުރުމަކީ ކުރެވޭނެ ކަމެއް ނޫން ކަމަށެވެ.
"މިއަދާ ހަމައަށް އައި އިރު 1000 މިލިއަނަށް ވުރެ ގިނަ ރުފިޔާ އޮތް ތެލުގެ ސަބްސިޑީގެ އަގާ އެއްކޮށް ހިމަނައިގެން ލަހުންވިއަސް ދީފަ ވާނީ. އެކަމަކު އެއީ އެއް ނޫން އަޅުގަނޑު ވައުދުވި ގޮތަކީ" ރައީސް ވިދާޅުވިއެވެ.
ރައީސް މުއިއްޒު ވިދާޅުވީ، ފައިސާ ދެވުނު ނަމަވެސް 48 ގަޑީއިރު ތެރޭ ފައިސާ ދޭނެ ކަމަށް ވީ ވައުދުގެ އަމަލީ މަސައްކަތް ނުފެށި އޮތް ސަބަބަކީ އެއީ ކަމަށާއި، މި ސިނާއަތް ނަގާ ކޮޅަށް ޖަހާ ފުޅާ ކުރާނެ ޕްލޭންތައް ހުރީ ނިންމާފައި ކަމަށެވެ.
"ވަގުތުތަކެއް ނަގައޭ އެހިސާބަށް ދާން. މިފްކޯ މިއޮތް ހާލަތުން ފުރަތަމަ އެތަން ރީފޯމްކުރުމަށްޓަކައި ވެސް މަސައްކަތް ކުރަންޖެހުނު. ވަރަށް ގިނަ މަސައްކަތް ކުރަން އަދިވެސް ޖެހޭ. އިދާރީ ގޮތުންވެސް ތަނުގެ ތަރުތީބު އޮތީ ރަނގަޅަކަށް ނޫން. އެހެންވީމަ އެކަހަލަ ބައިވަރު ކަންކަން ހުރުމާއެކީގައި މި އިންޑަސްޓްރީ ކުރިއަރުވަން ވަރަށް ފަރުވާތެރިކަމާއެކު މިއަދާ ހަމައަށް މިއައީ" ރައީސް މުއިއްޒު ވިދާޅުވިއެވެ.
ޑރ. މުއިއްޒު ވެރިކަމަށް ވަޑައިގަތީ، މަސްވެރިން ބާނާ މަހަށް، މަސް ކިރާތާ 48 ގަޑީއިރު ތެރޭގައި ފައިސާ ދައްކާނެ ކަމަށް ވައުދު ވެވަޑައިގެންނެވެ. އަދި ކިރާ މަހަށް ޑޮލަރުން ފައިސާ ލިބޭނެ ގޮތް ހަދާނެ ކަމަށްވެސް ޑރ. މުއިއްޒު މަސްވެރިންނަށް ވެފައިވާ ވައުދުތަކުގެ ތެރޭގައި ހިމެނެއެވެ.
މަސްވެރިން ބުނާ ގޮތުގައި ރައީސުލްޖުމްހޫރިއްޔާ ޑރ.މުހައްމަދު މުއިއްޒުގެ ސަރުކާރަކީ މިހާތަނަށް މަސްވެރިންނަށް އެންމެ ބޮޑަށް އިހުމާލުވި ސަރުކާރެވެ.
