"މަސްވެރިންނަށް ދިމާވެފައިވާ ޑީސެލްގެ މައްސަލަ ރައީސް ވިދާޅުވީ އެއް އަހަރުގެ ތެރޭގައި ހައްލުކޮށްދެއްވާނެ ކަމަށް"
އެސްޓިއޯއިން ރާއްޖޭގެ ކޮންމެ އަތޮޅަކަށް އަސާސީ ޚިދުމަތެއްގެ ގޮތުގައި ތެޔޮ ފޯރުކޮށްދޭނެ ނިޒާމުގެ މަސައްކަތް ވަނީ ފެއްޓިފައި
މަސްވެރިންގެ ލޮބީގެ މެމްބަރު މުޙައްމަދު ހުސެއިން ރާއްޖެޓީވީ އާއި ވާހާކަ ދައްކަނީ
ރާއްޖޭގެ މަސްވެރިންނަށް ދިމާވެފައިވާ އެންމެ ބޮޑު ގޮންޖެހުމަކީ ޑީސަލްގެ މައްސަލަ ކަމަށާއި، އެކަން ހައްލުކުރައްވާނެ ކަމަށް ރައީސުލްޖުމްހޫރިއްޔާ ޑރ މުޙައްމަދު މުއިއްޒު ވިދާޅުވި ކަމަށް މަސްވެރިންގެ ލޮބީން ބުނެފިއެވެ.
ބުދަ ދުވަހުގެ މެންދުުރު ރައީސުލްޖުމްހޫރިއްޔާގެ އޮފީހުގައި "މަސްވެރިންގެ ލޮބީ"ގެ މެމްބަރުންނާއެކު ބޭއްވި ބައްދަލުވުމަށްފަހު، ރާއްޖެޓީވީ އާއި ވާހަކަ ދައްކަމުން މަސްވެރިންގެ ލޮބީގެ ފަރާތުން ކެޔޮޅު މުޙައްމަދު ހަސަން ބުނީ އެސްޓިއޯއިން ރާއްޖޭގެ ކޮންމެ އަތޮޅަކަށް އަސާސީ ޚިދުމަތެއްގެ ގޮތުގައި ތެޔޮ ފޯރުކޮށްދޭނެ ނިޒާމުގެ މަސައްކަތް ފެއްޓިފައިވާ ވާހަކަ ރައީސް ވިދާޅުވި ކަމަށެވެ. އަދި އޭގެ އިތުރުން އެއް އަހަރު ދުވަހުގެ ތެރޭގައި މުޅި ރާއްޖޭގައި އެ ޚިދުމަތް ދެވިގެންދާނެ ކަމަށް ރައީސް ވިދާޅުވި ކަމަށެވެ.
ކެޔޮޅު މުޙައްމަދު ހަސަން ބުނީ، މަސްވެރިންގެ އުއްމީދަކީ މި ސިނާއަތަށް ދިމާވެފައިވާ ނިކަމެތި ކަމުން އަރައިގަނެ އަންނަން އޮތް ޖީލުތަކަށް މި ސިނާއަތް ދެމެހެއްޓެނިވި ގޮތަކަށް ކުރިއަށް ގެންދިއުމުގެ އިންތިޒާމް ހަމަޖެހިގެން ދިއުން ކަމަށެވެ. އަދި ރައީސުލްޖުމްހޫރިއްޔާގެ އެ ވާހަކަފުޅުތަކުން އުއްމީދެއް ލިބިގެން ދިޔަ ކަމަށެވެ.
އެއްގަމު ޝެޑްތަކުން ޑީސަލް ގަންނަން ލިބޭ އަގަށް ކަންނެލި މަސްވެރިންނަށް ޑީސަލް ގަންނަން ލިބޭނެ އިންތިޒާމުތައް ހަމަޖައްސައިދިނުމަށް ގޮވާލާ ޖޫން މަހުގެ ތެރޭގައި މަސްވެރިން މުޒާހަރާވެސް ކޮށްފައިވެއެވެ. ފަހުން އެ މުޒާހަރާ ހުއްޓާލީ ފިޝަރީޒް މިނިސްޓްރީން ހުޅުމާލެއިން މަސްވެރިންނަށް ވިއްކާ ޑީސަލްގެ އަގު ޝެޑުތަކުން ހެޔޮކޮށްފައިވާކަމަށް ބުނުމާއި ގުޅިގެންނެވެ.
މީގެ އިތުރުން ރައީސް އަށް ހުށަހެޅި ކަންބޮޑުވުންތަކުގެ ތެރޭގައި، ފާއިތުވެ ދިޔަ 7 މަސް ދުވަހުގެ ތެރޭގައި މިފްކޯގެ އެމްޑީއެއް ނެތުމާ އަދި ފިޝަރީޒް މިނިސްޓްރީގެ ތެރެއިން ވައުދުފުޅާ އެއްގޮތަށް އެކަންކަން ބައްޓަން ކުރުމަށް ކުރެވޭ މަސައްކަތްތައް ހީނަރުވެފައިވާ ކަން ފާހަގަކޮށްފައިވެއެވެ. އަދި ވީހާވެސް އަވަހަކަށް އެކަންކަން ބަދަލުކޮށް ރަނގަޅު ޚިދުމަތެއް ދެވޭނެ ގޮތެއް ގާއިމު ކޮށްދިނުމަށް އެދިފައިވާނެ ކަމަށެވެ.
