ރައީސް ސާލިޙްގެ ސަރުކާރުން ފައްޓާފައިވާ ޕްރޮޖެކްޓްތައް ނުހުއްޓި ދެމެހެއްޓެނިވި ގޮތަކަށް ކުރިއަށްދެވޭނެ ގޮތެއް ފަހި ކޮށްދިނުމަށް ރައީސްގެ ކިބައިން މަސްވެރިންގެ ލޮބީން އެދިއްޖެ
ދ. ކުޑަހުވަދޫ މަސްވެރިންގެ މުޒާހަރާއެއްގެ ތެރެއިން (ފައިލް ފޮޓޯ)
އިބްރާހިމް މުޙައްމަދު ސާލީޙްގެ ސަރުކާރުން މަސްވެރިކަމުގެ ސިނާއަތް ކުރިއެރުވުމަށް ފައްޓާފައި ހުރި ޕްރޮޖެކްޓްތައް ނުހުއްޓި ކުރިއަށްދެވޭނެ ގޮތެއް ފަހި ކޮށްދެއްވުމަށް ރައީސުލްޖުމްހޫރިއްޔާ މުޙައްމަދު މުޢިއްޒުގެ ކިބައިން މަސްވެރިކަމަށް އަޑު އުފުލަމުންދާ މަސްވެރިންގެ ލޮބީގެ ފަރާތުން އެދިއްޖެއެވެ.
ބުދަ ދުވަހުގެ މެންދުުރު ރައީސުލްޖުމްހޫރިއްޔާގެ އޮފީހުގައި "މަސްވެރިންގެ ލޮބީ"ގެ މެމްބަރުންނާއެކު ބޭއްވި ބައްދަލުވުމަށްފަހު، ރާއްޖެޓީވީ އާއި ވާހަކަ ދައްކަމުން މަސްވެރިންގެ ލޮބީގެ ފަރާތުން ކެޔޮޅު މުޙައްމަދު ހަސަން ބުނީ މި ބައްދަލުވުމުގައި މަސްވެރިކަމުގެ ސިނާއަތު މިއަދު އޮތް ހާލަތާ ވެރިކަމަށް ރައީސް މުއިއްޒު ވަޑައިގެންނެވި އިރު މަސައްކަތް އޮތް ހާލަތުގެ އިތުރުން މަސްވެރި އާއިލާތަކަށް ދިމާވެފައިވާ ނިކަމެތި ހާލަތު ހިއްސާކޮށްފައި ވާނެ ކަމަށެވެ.
"ނިމިދިއަ ސަރުކާރުން، މަސް ސްޓޯރޭޖް އިތުރަށް ބޮޑުކުރުމުގެ މަސައްކަތަކުގެ ތެރޭގައި، އެމަސައްކަތް މިވަގުތު މަޑު ޖެހިފައި އޮތުމާ އެމަސައްކަތް ވީހާވެސް އަވަހަކަށް ފައްޓަވާ މި އިންޑަސްޓްރީއަށް އޭގެ ސަބަބުން ލިބޭ މައުނަވީ މަންފާ ލިބޭ އިންތިޒާމް ހަމަޖައްސަވާ ދެއްވުމަށް. އަދި އެއާއި އެކު ކޫއްޑޫގެ 750 ޓަނު ނިމިދިއަ ސަރުކާރުން ބްރެއިންޓޭންކެއް ވަނީ ގެންގޮސްފައި. އެތަނުގެ ބަނދަރުގެ މަސައްކަތް ހުރީ ފެއްޓިފައި. ފެލިވަރުގެ މަސައްކަތް ހުރީ ފެއްޓިފައި. ތިނަދޫގެ މަސައްކަތް ހުރީ ފެއްޓިފައި، އައްޑޫގެ މަސައްކަތް ހުރީ ފެއްޓިފައި" ކެޔޮޅު މުޙައްމަދު ހަސަން ބުންޏެވެ.
އޭނާ ބުނީ ފެށިފަ ހުރި ޕްރޮޖެކްޓްތައް ނުހުއްޓި ދެމެހެއްޓެނިވި ގޮތަކަށް ކުރިއަށްދެވޭނެ ގޮތެއް ފަހި ކޮށްދެއްވުމަށް ރައީސް ކިބައިން އެދިފައިވާނެ ކަމަށެވެ.
ރައީސުލްޖުމްހޫރިއްޔާގެ މި ދައުވަތަކީ، މަސްވެރިންގެ ހައްގުގައި އަޑު އުފުލުމަށް އުފައްދާފައިވާ "ކެޔޮޅާ" ނޫހާއި އަދި މަސްވެރިންގެ ލޮބީގެ މެމްބަރުންނަށް ދެއްވި ދައުވަތެކެވެ. މި ލޮބީގެ ކައުންސިލް މެމްބަރުންނަށް ތިބީ ގިނައިން ކެޔޮޅުން ކަމަށްވާއިރު، މި ބައްދަލުވުމަކީ މަސްވެރިންވެސް ހިމެނިގެން ކުރިއަށް ގެންދިއަ ބައްދަލުވުމެކެވެ.
