މަސްވެރިންނަށްވި ވައުދުތައް ނުފުއްދާތީ މަސްވެރިން އިހުތިޖާޖުކޮށްފި
10 ޑިސެމްބަރު 2024 | އަންގާރަ 13:09މަސްވެރިންގެ ކަންބޮޑުވުންތައް ހައްލުކޮށްދިނުމަށް ސަރުކާރަށް ވަނީ ގޮވާލާފައި
މަސްވެރިން ކުރި އިހުތިޖާޖުގެ ތެރެއިން
މަސްވެރިންނަށްވި ވައުދުތައް ނުފުއްދާތީ މަސްވެރިން އިހުތިޖާޖުކޮށްފިއެވެ.
ހުޅުމާލޭ ކަންނެލި ޖެޓީ ސަރަހައްދުގައި މަސްވެރިން ބޭއްވި އިހުތިޖާޖުގައި ވަނީ ސަރުކާރުން މަސްވެރިންނަށް ވެފައިވާ ވައުދުތައް ފުއްދުމަށާއި، މަސްވެރިންނަށް ދިމާވެފައިވާ ދަތިތައް ހައްލުކޮށްދިނުމަށް ގޮވާލާފައެވެ. މަސްވެރިންނަށް މި ސަރުކާރުން ވެފައިވާ ވައުދުތައް ލިޔެފައިވާ ބެނާތައް ހިފައިގެން އެ ވައުދުތައް ފުއްދުމަށް ގޮވާލާ ބޭއްވި އިހުތިޖާޖުގައި ގިނަ އަދަދެއްގެ މަސްދޯނިތަކާއި، މަސްވެރިން ބައިވެރިވެފައިވެއެވެ.
މަސްވެރިންގެ ޑިމާންޑްތަކުގެ ތެރޭގައި ސަރުކާރުން ވައުދުވި ގޮތަށް ކަނޑުމަސް ކިލޯއެއްގެ އަގު 20 ރުފިޔާއަށް ހެދުމަށާއި، 48 ގަޑީއިރު ތެރޭގައި ކިރާ މަހަށް ފައިސާ ލިބޭނެ ގޮތް ހެދުމަށް ގޮވާލާފައިވެއެވެ.
މަސްވެރިން ބުނެފައިވަނީ މަސްވެރިންގެ ކަންބޮޑުވުންތައް ސަރުކާރާއި ހިއްސާ ކުރިނަމަވެސް، މިހާތަނަށް ވެސް އެއިން އެއްވެސްކަމެއް ކޮށްދީފައި ނުވާ ކަމަށެވެ. އެގޮތުން ތަކެތީގެ އަގު 3 ގުނަ ބޮޑުވެގެން ދިޔައިރުވެސް މަސްވެރިން ބާނާ މަހުގެ އަގަށް ބަދަލެއް ނުގެންނަ ކަމަށާއި، 160 ރުފިޔާއަށް ބޮޑު ކަންނެލި ކިލޯއެއް ހުރިނަމަވެސް މިއަދު އެ އަގު ހުރީ 40 ރުފިޔާއަށް ވެއްޓިފައި ކަމަށެވެ.
އަދި ރަނގަޅު އަގެއް ލިބިގެން ނޫނީ ސިނާއަތް ކުރިއަށް ނުދާނެ ކަމަށާއި، މަސްވެރިންނާއި އޮޑިވެރިންނަށް އެކަނި ކަންކަން ހައްލު ނުކުރެވޭނެ ކަމަށާއި، މި މަސައްކަތުގައި ކުންފުނިތަކާއި ސަރުކާރުން ގުޅިގެން މަސައްކަތްކޮށްގެން ނޫނީ ސިނާއަތް ދިރި ނޯންނާނެކަމަށާއި، އެކަމަށްޓަކައި ކެނޑި ނޭޅި މަސައްކަތް ކޮށްދެއްވުމަށް މަސްވެރިން ވަނީ ގޮވާލާފައެވެ.
