ވައުދުތައް ފުއްދުމަށް ގޮވާލާ މަސްވެރިން އަޑު އުފުލަނީ
ބޮޑު ކަންނެލީގެ މަސްވެރިންގެ ޔޫނިއަން އިން އިސް ނަގައިގެން އިންތިޒާމު ކުރާ އެ ޙަރަކާތް އޮތީ އަންގާރަ ދުވަހުގެ މެންދުރު ފަހު ހުޅުމާލޭ މަސްވެރިންގެ ބަނދަރުގައި
މަސްވެރިންގެ އަޑު އުފުލުމަށް ބާއްވާ ޙަރަކާތުގެ ތެރެއިން
ރައީސުލްޖުމްހޫރިއްޔާ ޑޮކްޓަރު މުޙައްމަދު މުޢިއްޒުގެ ސަރުކާރުން މަސްވެރިންނަށް ވެފައިވާ ވައުދުތައް ފުއްދުމަށް ގޮވާލާ، މަސްވެރިންގެ އަޑު އުފުލަން ތައްޔާރުވެއްޖެ އެވެ.
ރާއްޖޭގައި ޤައުމީ ފެންވަރުގައި ފާހަގަ ކުރަމުން އަންނަ މަސްވެރިންގެ ދުވަހާ ދިމާކޮށް، ބޮޑު ކަންނެލީގެ މަސްވެރިންގެ ޔޫނިއަން އިން އިސް ނަގައިގެން އިންތިޒާމު ކުރާ އެ ޙަރަކާތް އޮތީ އަންގާރަ ދުވަހުގެ މެންދުރު ފަހު ހުޅުމާލޭ މަސްވެރިންގެ ބަނދަރުގަ އެވެ. އެ ޙަރަކާތުގައި ގިނަ މަސްދޯނިތަކަކާއި، އެ ދޯނި ފަހަރުތަކުގެ އޮޑިވެރިންނާއި، ފަޅުވެރިން ބައިވެރިވުމަށް ވަނީ ހަމަޖެހިފަ އެވެ.
އެ ޙަރަކާތް އިންތިޒާމު ކުރާ ފަރާތްތަކުން މިހާރު އަންނަނީ އެ ހަރަކާތައް ވާން ޖެހޭ އެންމެ ފަހުގެ ތައްޔާރީތައް ވަމުންނެވެ. އެގޮތުން މެންދުރު ފަހު އޮންނަ ޙަރަކާތުގައި މަސްވެރިންގެ ކަންބޮޑުވުންތައް ފާޅު ކުރުމާއި، ސަރުކާރުން މަސްވެރިންނަށް ވެފައިވާ ވައުދުތައް ފުއްދުމަށް ގޮވާލާ ސަރުކާރަށް އަޑު އިއްވުން ކުރިއަށް ދާނެ ކަމަށް އެ ފަރާތްތަކުން ބުނެ އެވެ. އެ ޙަރަކާތުގައި ބައިވެރިވާ ދޯނި ފަހަރުތަކުގައި ވަނީ ސަރުކާރުން މަސްވެރިންނަށް ވެފައިވާ ވައުދުތައް ބެނާ ތަކުގައި ލިޔެ، ދޯނި ފަހަރުތަކުގައި ދަމައިފަ އެވެ.
ވެރިކަމަށް ވަޑައިގެންނެވުމަށް ރައީސް މުޢިއްޒު މަސްވެރިންނަށް ވެފައިވާ ވައުދުތައް ނުފުއްދާތީ، މަސްވެރިންގެ ކަންބޮޑުވުން އަބަދު ވެސް އަންނަނީ ފާޅު ކުރަމުންނެވެ. އެގޮތުން މަހުގެ އަގު ދައް ކުރުމާއި، މަސްވެރިން ކިރާ މަހަށް ފައިސާ ނުލިބުމާއި، ތެޔޮ ލިބުމުގެ ދަތިކަން ބޮޑުވެފައިވާ ކަމަށް ބުނެ މަސްވެރިންގެ ޝަކުވާ ވަނީ ބޮޑުވެފަ އެވެ. މަސްވެރިން ކިރާ މަހަށް ފައިސާ ނުލިބި ލަސްވުމުގެ ސަބަބުން، އެކި ފަހަރު މަތިން މަސްވެރިން މުޒާހަރާ ވެސް ކޮށްފައިވެ އެވެ.
