މަރެސްކާ ބުނީ ޗެލްސީން ކުޅުނީ ބޭނުންވި ގޮތަށް ކަމަށް!

އިނގިރޭސި ޕްރިމިއާ ލީގުގައި އާސެނަލާ ދެކޮޅަށް ކުޅުނު މެޗުގައި ޗެލްސީން ބޭނުންވި ކުޅުން ދެއްކުނު ކަމަށް، އެ ޓީމުގެ ކޯޗު އެންޒޯ މަރެސްކާ ބުނެފި އެވެ.

އޭނާ މިހެން ބުނީ ޗެލްސީގެ އަމިއްލަ ދަނޑުގައި އާސެނަލާ ދެކޮޅަށް ކުޅުނު މެޗަށްފަހު ނޫސްވެރިންނާ ވާހަކަ ދައްކަމުންނެވެ. އެ މެޗު 1-1 އިން އެއްވަރުވީއިރު، އާސެނަލް އިން ލަނޑު ޖަހައި ކުރި ހޯދާފައި ވަނިކޮށް، ޗެލްސީން ނަތީޖާ ހަމަހަމަ ކުރީ ފަހަތުން އަރައި ލަނޑު ޖަހައިގެންނެވެ. މެޗުގައި ޗެލްސީން ވަނީ އިތުރު ލަނޑު ޖެހުމަށް ވެސް ފުރުސަތުތަކެއް ތަނަވަސްކޮށްފަ އެވެ.

މެޗާ ގުޅޭ ގޮތުން ވާހަކަ ދައްކަމުން މަރެސްކާ ބުނީ، މެޗުގައި ޗެލްސީން ދެއްކީ ރަނގަޅު ކުޅުމެއް ކަމަށް ޤަބޫލު ކުރެވޭ ކަމަށެވެ. އަދި އެ މެޗުގައި ޗެލްސީގެ ކުޅުންތެރިން ދެއްކި ކުޅުމަކީ، އެ މެޗުގައި ޗެލްސީން ދައްކަން ބޭނުންވި ފެންވަރުގެ ކުޅުމެއް ކަމަށް ވެސް މަރެސްކާ ބުންޏެވެ. އޭނާ ބުނީ މެޗުގެ ނަތީޖާ ދެކޮޅަށް ވެސް އެނބުރި ދާނެ ކަހަލަ ވަގުތުތަކެއް ދިޔަ ކަމަށާއި، ނަމަވެސް ޗެލްސީގެ ކުޅުންތެރިންގެ ފަރާތުން ފެނުނީ މެޗަށް ލޯ ހުޅުވިގެން ތިބި މަންޒަރު ކަމަށެވެ.

މަރެސްކާ ބުނީ ޗެލްސީން ކުރަމުން އަންނަނީ ރަނގަޅު މަސައްކަތްތަކެއް ކަމަށާއި، ބޭނުން ވަނީ ނަތީޖާ ނެރުން ކަަމަށެވެ. ލީގުގައި މިދިޔަ އޮކްޓޫބަރު މަހު ޗެލްސީން ލިވަޕޫލާ ދެކޮޅަށް ކުޅުނު މެޗަށް އިޝާރާތް ކުރަމުން މަރެސްކާ ބުނީ، އެ މެޗުން ބަލިވުމަކީ ޗެލްސީ އަށް ޙައްޤު ނަތީޖާ ނޫން ކަމަށެވެ. އެ މެޗުގައި ޗެލްސީން ރަނގަޅު ކުޅުމެއް ދެއްކި ނަމަވެސް، ފުޓުބޯޅައިގައި ކޮންމެ ގޮތެއް ވެސް ވެދާނެކަމް ފާހަގަ ކުރަމުން މަރެސްކާ ބުނީ، އަވަސް މުސްތަޤުބަލެއްގައި ޗެލްސީ އަށް މިކަހަލަ ބޮޑެތި މެޗުތަކުން މޮޅުވެވޭ ފެންވަރު ގެނެވޭނެ ކަމަށެވެ.

މީގެ އިތުރުން އޭނާ ބުނީ ޗެލްސީގެ ކުޅުންތެރިން ކުރަމުން އަންނަ މަސައްކަތާ މެދު ޖައްސާނެ މައްސަލައެއް ނެތް ކަމަށެވެ. ސަބަބަކީ އެންމެ ފަހު ވަގުތާ ޖެހެން ދެން ވެސް ކުޅުންތެރިން މަސައްކަތް ކުރަމުން އަންނަ މަންޒަރު ފެނުން ކަމަށާއި، އެކަމަކީ އޭނާ އަށް އޮންނަ ހިތްހަމަ ޖެހުމެއް ކަމަށް ވެސް މަރެސްކާ ބުންޏެވެ. މަރެސްކާ ބުނީ އޭނާ ހިތްހަމަ ނުޖެހޭނީ، ޗެލްސީގެ ކުޅުން ދަށްވެއްޖެ ނަމަ ކަމަށާއި، މިވަގުތަށް ބަލާއިރު އޭނާ ހުރީ ހިތްހަމަ ޖެހިގެން ކަމަށެވެ.

އަމިއްލަ ދަނޑުގައި އާސެނަލް އަތުން ހޯދި ޕޮއިންޓާ އެކު ޗެލްސީން ވަނީ ލީގު ތާވަލްގެ ތިން ވަނަ މަގާމަށް ޖެހިލައިފަ އެވެ. އެއީ މިހާތަނަށް ލީގުގައި ކުޅުނު 11 މެޗުން 19 ޕޮއިންޓު ހޯދައިގެންނެވެ. ޗެލްސީގެ ނަތީޖާތައް ދަށްވުމުގެ ސަބަބުން މިދިޔަ ސީޒަނަށްފަހު އެ ޓީމުގެ ކޯޗަކަށް ހުރި އާޖެންޓީނާގެ މައުރީސިއޯ ޕޮޗެޓީނޯ މަގާމުން ވަކިވުމުން، ދެން އެ މަގާމަށް ގެނައީ މަރެސްކާ އެވެ. ޗެލްސީން މަރެސްކާއާ ހަވާލު ކޮށްފައިވާ އެންމެ ބޮޑު މަސައްކަތަކީ އެ ޓީމުގެ ނަތީޖާތައް ރަނގަޅު ކުރުމެވެ.